5
Chin nangpakakan Hesus chin cho-or an napukhit an ispiritu han ohan lala-e an eGerasa
1 Entortoloy cha Hesus an immuy ja emmatam cha hichi chammangna, an pfuglay hachi eGerasa. 2 Unot pfimmutay hi Hesus chin pfalangay ja chinittum na han lala-e an narpu hichi lijang an lupfuˈ ja nahuhuˈlungan hi napukhit an ispiritu. 3 Hitay an mun-angaw ja un amjaˈ na an munhehetto hana lijang an lupfuˈ, ja anong un cha epacha an pfangkelengan ja ma-id olog cha. 4 Un chaagkhu pfangkelengan hon nunhopchot na ja ad-adchi cha pa-adchon ay hija. 5 A-arkha-arkhaw ja amadhomadhom ja mihihidchi lupfuˈ ja un la-ahnaon hichi pfuludna, hon ingkhimoh na an kumii, hon nun-okhod na chin achor na hi pfato. 6 Nebnebtaw hi Hesus hi nannikhan tay an lala-e ja entagtag na an i nanittum ja nunheppe an mundayaw ay hija. 7 Ja iniˈgwap na an nangali hi, “Hesus an Empfalay chi Napfagto an Jos! Nga chah ni atom ay ha-in? Ehapatam ay Apo Jos ta achiyaˈ ad niˈ palikhaton!” 8 Hay nangarjana ay tay ja inalin Hesus ay chuy napukhit an ispiritu hi makak ay chuy takhu. 9 Ja inalin Hesus ay hija hi, “Ngay ngachan mu?” Tempfar na ja inali na hi, “Linipfulipfu ami, ti munhikhapfu ami.” 10 Ja pemmakhomakhoh hachi napukhit an ispiritu an inali cha hi, “Achi chaˈmi adniˈ epakak ay tay an pfuglay.” 11 Ja cho-or hachi apfapfupfapfuy an khun munhu-oy ay chuy an pfulludna. 12 Ja numpakpaka-ahi hachi napukhit an ispiritu an inali cha ay Hesus hi, “Hotti un ami mah niˈ mehoˈlong hay hachi pfapfuy!” 13 Ja inalin Hesus hi, “Umuy aju.” Hotti nun-a-akak hachi napukhit an ispiritu ay chuy an lala-e ja i cha nun-ehoˈlong hachi apfapfupfapfuy. Ja nungkhakhayyat hachi pfapfuy an nunchayyu ja nun-ilipaw cha ay chuy baybay ja nun-arteng cha. Ja hay pfilang chin pfapfuy ja chugway lipfu.
14 Hachi khun mumpfantay hachi pfapfuy ja nungkhakhayyat cha an nakak. Ja immuy cha hichi pfuglay cha ja hachi uchumna an pfuglay an i nangpa-innila hato an tinnig cha. Hotti napfu-ar hachi tatakhu an i miˈtikhaw. 15 Un chaot emmatam chin agawwachaan Hesus ja tinnig cha chin mun-angaw an ni-i-ibpfun an nunlolopfong ja nagwachaan hi maphod an nomnom. Ja nang-entata-ot cha. 16 Ja impa-innilan hachi nannig ay chuy na-at chin lala-e an nakakan hachi ispiritu ja chin khu na-at hachi pfapfuy. 17 Ja numpakpaka-ahi hachi tatakhu an nangali hi makak hi Hesus ay nuy pfuglay cha. 18 Gwa an miˈlukhan hi Hesus chin pfalangay ja inalin chuy an lala-e an nakakan hachi napukhit an ispiritu hi, “Mitnuchaˈ ad niˈ ay he-a.” 19 Muti inalin Hesus hi, “Un aot umanamut ta im ipa-innila hana khakhayyum mu hitay maphod an enat Apo Jos ay he-a ja hini nunnignikhaana ay he-a.” 20 Hotti immanamut ja i na impa-innila an amin chin nunleneˈgwoh an apfuglapfuglay ad Dekapolis hitay mapmaphod an enat Hesus ay hija. Ja an amin hachi nangngor ja nanannor cha.
Chin nanakhuwan Hesus chin empfalay Jairus ja chin nangpatengngana han pfupfai
21 Nunlukhan khu cha Hesus ay ni pfalangay ja numpfangngad cha chin narpugwan cha. Na-am-amamung khu hachi tatakhu ja lini-ub cha hija ay chuy agawwachaana an pingngit chi baybay. 22 Ja immuy ay Hesus han lala-e an hi Jairus an ap-apon han sinagoga hichi. Ja nunheppe ay Hesus 23 an numpakpaka-ahi an nangali hi, “Miˈjali a adniˈ hi pfalay mi, ti gwa an ma-uˈlud han empfalay u an pfupfai, ta hoˈ-om hija ta tomenong ta gway atona an miˈtakhu.” 24 Amat hichi ja nitnud hi Hesus ja immuy cha, ja khun munhihiˈ-ig hachi tatakhu an immalipfuypfuy ay hija. 25 Ja gwa han pfupfai an khun mangunud ay chicha an hay chokhoh na ja achi maymajat han chala an khun pfumutay ay hija hi hempolo ta chugwa hi tagwon. 26 Nunnaud an nalikhatan ti khinahto na an amin chi pelaˈ na an i numpa-akhah, muti agkhuy na-akhahan an unagkhu emmom-omod. 27 Immuy ay chuy negpong chin khatud Hesus ja heneˈkhad na chin lopfong na. Ti chengngor na hana impa-innila cha an khun aton Hesus, 28 ja hay gwa hi nomnom na ja un ammuna hi una heˈkhachon chin lopfong na hot tomenong. 29 Ja emmat, an najat gwot chin chala an khun pfumutay ay hija, ja naleˈna na an temmenong chin chokhoh na. 30 Naleˈnan Hesus an gwa han immuy an apfalinana han takhu hotti nunligkhoh ja inali na hi, “Ngay naneˈkhad ay tay lopfong u?” 31 Ja himmapit hachi disipolo na ja inali cha hi, “Apo, ngay machotoˈ hi naneˈkhad ay he-a, an tan cho-or hato tatakhu an nali-ub ay he-a an khun munhihiˈ-ig.” 32 Muti khun matmatmaton Hesus ta tikhana hini naneˈkhad ay hija. 33 Inannilan chin pfupfai hitay na-at ay hija ja immuy nunheppe ay Hesus ja khun mun-elob. Ja empfaag na an amin hini na-at. 34 Ja inalin Hesus ay hija hi, “Khapo ay ni pammatim ja temmenong a. Hotti mun-an-anla a an umanamut ti achi mumpfangpfangngad hini chokhoh mu.”
35 Unagkhu khun miˈhapit hi Hesus chin pfupfai ja ne-atam gwot chin hennag cha an narpu hichi pfalay cha Jairus. Ja inali cha ay Jairus hi, “Achi ta-o ungalon hitay Apo ta-o, ti natoy chamchama atag hini empfalay mu.” 36 Unot chengngor Hesus ja inali na ay Jairus hi, “Achi a mundanag. Ehchor mu ay ha-in.” 37 Amat hichi ja empacheh cha muti empagwan Hesus chi hay mitnud, hotti un angkhay hi Peter ja cha James ay John an hin-akhi chi nitnud. 38 Ne-atam cha Hesus hichi pfalay cha Jairus ja chengngor cha hachi hingalangala an tatakhu an khun cha mahanalaˈ an umiha. 39 Himmikhop hi Hesus ja inali na hi, “Anagkha ta mahanalaˈ aju an umiha? Agkhuy natoy hichuy unga an un nanalloˈ.” 40 Muti kenekejan cha hitay inali na. Amat hichi ja impapfutay Hesus chicha an amin, ja un angkhay chin a-ammod chin unga ja hachi ini-itnud na chi impahikhop na ay chuy agawwachaan chuy unga. 41 Immu-immuy hi Hesus ja inugnana chin ngamoy chin unga ja inali na ay ni hapit cha an Hudju hi, “Talita, kum” an hay podhona an hapiton ja, “Pfumangon a, hiton unga.” 42 Amat hichi ja napfanpfannangon chin unga ja chimmalan, ja nanor hachi nannig. Hitay an unga ja muntagwon hi gway hempolo ta chugwa. 43 Ja inalin Hesus hi, “Ichatan ju hitay unga hi anuna. Ja achi la-ahna ja gway i ju pangar-arjan ay tay an na-at.”