4
Hay pangngarig chin khun munhamar an munhapuwaˈ hi pfugwa
1 Gwa khu han namenghan ja immuy hi Hesus hichi pingngit chi baybay ja ente-a na an muntudtuchu. Munhihiˈ-ig hachi atakhutakhu an mali-ub ay hija, hotti immuy nunlukhan han pfalangay an nebnebtaw ay chuy palantag an timmataˈchukhan chin cho-or an tatakhu, ja inumpfun ta muntudtuchu. 2 Ja cho-or chin intuchun Hesus an in-ari-arig na. Ja inali na hi, 3 “Ep-ephod ju an chonglon. Gwa han ohan takhu an immuy nunhapuwaˈ hi pfugwa hichi hapfar na. 4 Khun munhapuwaˈ ja nepochag chin uchumna ay ni chalan, ja numpanga-ali chin hagwiti ja nun-a-an cha. 5 Chin uchumna ja nepochag chin mapfinato an lota. Khagkhaju cha an hemmangaw ti maymayyapit chin lota, 6 muti chin apfi-ahan chuy hukhit ja naˈleng, ti un nitutu-i chin hemmangagwana. 7 Nepochag khu chin uchumna chin achoˈlan chi holoˈ an nun-apakhatan. Un chaagkhu hemmangaw ja emmaˈlap hachi nun-apakhatan an holoˈ ja hinaˈpfungan cha chin nitanum, hotti agkhuy niˈpfunga. 8 Ja chin uchumna ja nepochag chin maphod an lota, ja numpangahangaw cha ja numpangapfunga cha. Ja hachi uchumna ja pfimmunga cha hi hintotlompolo, ja hachi uchumna ja pfimmunga hi unum chi polo, ja hachi uchumna ja pfimmunga hi hingkhahot.” 9 Ja inalin khu Hesus hi, “Pa-ennongan ju an munchongor ay tay alloˈ.”
Empfaag Hesus hini podhon ni pangngarig an hapiton
10 Unot nakak hachi cho-or an tatakhu, ja immuy hachi himpolo ta chugwa an adalan Hesus ja hachi uchumna an nitnud ay chicha, ta i cha hanhanan ay Hesus hay podhon chin pangngarig an hapiton. 11 Ja inalin Hesus hi, “Aa, chaˈju hana pangpa-innilaan Apo Jos ay ni omaˈ-atan ni Pun-ap-apugwana an agkhuy na empfaag chin hophopapna. Hana ayya achi miˈ-unud ja pangngarig hini atoˈ an mangtuchugwan ay chicha. 12 Hot anong un himulimuli hini mata cha ja achi cha khun tikhan hana khun u aton, ja anong un nun-alu-angan hana inga cha ja achi cha chamchama ma-awatan hana khun u itudtuchu. Chuˈkhon cha koma hana pfahor cha ta pakawanoˈ chicha.”a 13 Ja inalin khu Hesus ay chicha hi, “Umannung chah an agkhuy ju anila hitay an pangngarig? Ngay aton ju mah an mangannila hi uchumna? 14 Hitay hini podhona an hapiton. Hachi pfugwa an nihapuwaˈ ja hija hini Hapit Apo Jos an khun mitudtuchu. 15 Ja hana nepochag ay ni chalan ja hija hana tatakhu an nunchongor ay ni Hapit Apo Jos muti immuy hi Satanas ta akagwona chin hapit an chengngor cha. 16 Ja hana ayya nepochag ay ni mapfinato an lota ja hija hana tatakhu an nun-an-anla an nunchongor ay ni Hapit Apo Jos ja inapfulut cha gwot, 17 muti un naˈnaˈ-omtang, ti agkhuy limmamot hini hapit na ay chicha. Unchani ta umali hana apalikhatan ja apahigwan khapo hi nangapfulutan cha ay ni Hapit Apo Jos ja chin-ug chaot hini pammati cha. 18 Ja hana ayya nepochag ay ni achoˈlan chi holoˈ an napakhatan ja hija hana tatakhu an nunchongor, 19 muti immali ayya hana pundanakhan ay tay piˈtakhuwan ja hana homalegwa an nomnom hi omachangjanan ja hana uchumna an ma-amnagwan, ja nahi-ig hini Hapit Apo Jos ja achi cha miˈpfunga. 20 Hana ayya nepochag ay ni maphod an lota ja hija hana nunchongor ay ni Hapit Apo Jos, ja inapfulut cha ja inunud cha, ingkhana hi matikhaw hana maphod an pfunga cha. Hachi uchumna ja hintotlompolo, ja hachi uchumna ja hin-uˈnum chi polo, ja hachi uchumna ja hinkhakhahot chi pfunga cha.”
Hay pangngarig han panor an nepataw
21 Inalin khu Hesus hi, “Achi ta-o torkhan hay panor ja i ta-o halinan wenno epachaor hi kama, ta un ta-o gwot epattoˈ hay napataw. 22 Ja amat hina khu hay hato in-arig u, ti an amin hana enhaˈpfan Apo Jos an agkhuy na pay impa-innila ja umali han arkhaw hot ipa-innila na. Ja hana achi ma-awatan ja umali khu han arkhaw hot ma-awatan. 23 Hotti pa-ennongan ju an munchongor ay tay alloˈ.”
24 Ja inalin khu Hesus hi, “Ehemad ju an munchongor hay hato alloˈ. Hini lopong ni aton ju ja hija khu hini lopong ni aton Apo Jos ay chaˈju ja ma-ug-ugman pay. 25 Hini takhu an gway pamhod na an miˈ-unud ay ni ituchuˈ ja umannung an ma-ug-ugman hini anila na. Hini ayya takhu an una lamangon an achi miˈ-unud ay ni ituchuˈ ja anong un hini maphod an anila na ja ma-utaw ay ni nomnom na.”
Hay pangngarig ni omaˈ-atan ni homangaw an pfugwa
26 Inalin khu Hesus han pangngarig an amat heto. “Hini Pun-ap-apugwan Apo Jos ja mipadchung ay ni ma-at nu gway i munhamar hi pakhuy. 27 Napfalin ja khun um-umuy chi arkhaw ja maloˈ hini khun muntamu hi amadhomadhom hon pfimmangon hi nun nanong an i muntamu. Ja khun homangaw chin intanum na, ja achi na anila hini aton cha an khun homangaw, 28 ti un cha ikhad. Mahhun hini lumipiyana ja unot mumpfoto ja unot mumpfohpfoh. 29 Unchani ta natong ja immuy khu hini nangtanum ta i na pfot-on, anong una agkhuy inannila hini enat cha an hemmangaw.”
Hay pangngarig ni pfugwan chi lakotta
30 Inalin khu Hesus hi, “Tayya han oha an i-arig u an pipadchungan tay Pun-ap-apugwan Apo Jos. 31 Mipadchung ay ni ohan pfugwan chi lakotta an hija hini it-ittangan an amin hi pfugwa heto lota. 32 Muti hemmangaw ayya ja khun um-umuy chi arkhaw ja umajiw ja ot-ottongan mu hana uchumna an hamchaˈ. Umanchu-oy hana hepeng na ja hijay pun-emengan chi hagwiti.”
33 Ja cho-or pay chin pangngarig an inalin Hesus hi khuna puntudtuchugwan ay ni Hapit Apo Jos, an ne-anoˈnong ay ni kaya cha an ma-awatan. 34 An amin chin nuntudtuchugwana ja pangngarig chin khuna aton, muti unchani ta umi-igway cha ayya hana adalana hon empfaag na ay chicha hini podhona an hapiton.
Chin nangpitaˈchukhan Hesus han puwoˈ
35 Unot gwa an nahilip ja inalin Hesus hachi disipolo na hi, “Pfumad-ang ta-o ay tay baybay.” 36 Hotti niˈlukhan cha chin pfalangay an inu-umpfunan Hesus ja tenaynan cha hachi tatakhu. Ja nitnud khu hachi uchumna an pfalangay. 37 Unagkhu himpfumagkha ja gwacha han mapfi-ah an puwoˈ. Ja mapfi-ah an muntipjaˈ-ong chin chanum ja nittugwan chin pfalangay ja gwa an munlinong. 38 Hi Hesus ayya ja i nanalloˈ han opfog ay chuy halugitiw chin pfalangay. Immuy hachi disipolo na ja pfinangon cha hi Hesus. Ja inali cha hi, “Rabbi! Anagkha ta nanalloˈ a ti tayya an marteng ta-o!” 39 Enelan Hesus ja inali na chin puwoˈ ja chin chanum an khun muntipjaˈ-ong hi, “Khomenong aju!” Khemmenong cha ja munnaud an malenong. 40 Ja inalin Hesus hachi disipolo na hi, “Anagkha ta temma-ot aju? Un chah ma-id pammati ju ay ha-in?” 41 Ja nang-entata-ot cha ja khun cha allon chi, “Nga chah ay chita tay an takhu? Anong un puwoˈ ja chanum ja unuchon cha hini allona!”