27
Chin nang-ajan chan Hesus ay Pilato
1 Unot gwa an nagwa-ah ja na-amung chin a-ap-apon chi papachi ja chin uchumna an a-ap-apon chi Hudju ta nunhahapit cha hay i cha aton an mamatoy ay Hesus. 2 Napfalin ja pinawwid cha chin ngamoy na ja in-uy cha ay chuy Gobernador an hi Pilato ta mahumarja.
Chin natajan Judas
3 Hi ayya Judas an nangngina ay Hesus, unaot inannila an hugijon cha hi Hesus ta matoy, ja nuntutuju chin enat na. Enala na chin tolompolo an pelaˈ an inchat hachi a-ap-apon chi papachi ja hachi uchumna an ap-apo, ja immuy ay chicha. 4 Ja inali na hi, “Pfimmaholaˈ ti ingnginaˈ han takhu an ma-id pfahor na ja tan patajon cha hija.” Ja inali cha hi, “He-aot ti un chah gway anila mi?” 5 Hotti impuchit Judas chin pelaˈ hichi Templo ja nakak. Immuy numpfeˈkhor ja natoy.
6 Nun-alan hachi a-ap-apon chi papachi chin pelaˈ ja inali cha hi, “Achi ay chita mapfalin ay ni urchin ta-o an i ta-o idchum hitay ay ni pihun ni Templo, ti hijay palit chi ohan takhu. Hot ngay pang-atan ta-o?” 7 Hay nunhahappittanan cha ja pomlaˈ cha han lotan chin khun munchugwin hi pfanga ta gway panglub-an cha hu-un gway matoy hi mangili cha. 8 Hijaot un cha nginadnan hichuy lota hi Lota an Negwaˈgwa-an hi Chala, ja hijay ngachana ingkhana ad ugwani. 9 Hotti nipa-annung chin inalin Jeremiah an profetan Apo Jos hi nangarjana hi,
“Enala cha chin tolompolo an pelaˈ an nunhahappittanan cha chuy Hudju an holag Israel hi palit na.
10 Ja inchat cha an pfajad han lotan nuy khun munchugwin hi pfanga, ti hijah tay chi inalin Apo Jos ay ha-in hi ma-at.”a
Chin nunhumarjaan Pilato ay Hesus
11 Timmataˈchug hi Hesus hi gwachaan gobernador Pilato ja inalin Pilato ay hija hi, “Un chah he-a hini Arin chi Hudju?” Tempfar Hesus ja inali na hi, “Ti niya mah an inalim.” 12 Muti agkhuy henongpfatan Hesus hachi cho-or an empapfahor hachi a-ap-apon chi papachi ja hachi uchumna an a-ap-apon chi Hudju. 13 Ja inalin Pilato ay hija hi, “Un chah achim chonglon hay hato cho-or an epapfahor cha ta achim topfalon?” 14 Muti agkhuy tenomtompfar hi Hesus, ja nanor hi Pilato.
15 Hay khun aton gobernador Pilato hi un Pfehtan Chin Nalohan Chin Angher Apo Jos, ja emmengha ay hija an khun mangpfu-aan hi oha hi nipfalud an piliyon hachi tatakhu. 16 Ja netongor ay chuy an timpo ja gwa han nipfalud an hi Barabasb chi ngachana, ja nunchongor hachi nun-apupukhit an enat na. 17 Gwa an na-amung hachi atakhutakhu ja inalin Pilato ay chicha hi, “Ngachan nuy penhod ju hi ipfu-aaˈ hi pfalud ad ugwani an pfehta? Hi Barabas wenno hi Hesus an ma-ali hi Kristo?” 18 Inali na hitay ti anila na an hachi a-ap-apo chi nang-agwat ay Hesus khapo hi ámoh cha, ja podhona khu an chonglon nu ngay piˈ-alin hachi tatakhu.
19 Hay oha khu hi pamhochan Pilato an mangpfu-aan ay Hesus ja, ay chuy inu-umpfunana ay chuy umpfunan chi munhugwi, ja gwa han empaad cha an inalin ni ahagwa na an, “Achi a manger-er hi im aton ay nuy an takhu an ma-id pfahor na, ti enenop u ad a-ukhab, ja atattata-ot ja tan unaˈ omelo-elob.” 20 Muti hay hachi a-ap-apon chi papachi ja hachi uchumna an a-ap-apo ja enchokhochokhor cha hachi tatakhu ta allon chay Barabas chi mipfu-aan, ja matoy koma hi Hesus. 21 Hotti chin piggwana hi nangarjan Pilato hi, “Hot ngachan ni penhod ju hi mipfu-aan ay cha tay an chugwa?” ja inali cha gwot hi, “Hi Barabas!” 22 Ja inalin khu Pilato hi, “Nu amat hina ayya ja ngay allon ju hi atoˈ ay tay an hi Hesus an ma-ali hi Kristo?” Ja hi-a-ali cha hi, “Epepfakhat mu hi kros!” 23 Ja inali na khu hi, “Anagkha? Ngay tugwali pfahor na?” Muti en-ar-alla cha an nangiˈgwap hi, “Epepfakhat mu!”
24 Amat hichi ja tinnikhaw Pilato an achi ma-arjan hachi tatakhu ja gwa an munhohongnger cha. Hotti empa-ala na han pfatja an nittugwan hi chanum ja numpfulu ta tikhan hachi atakhutakhu. Ja inali na hi, “Tayya an pfinulugwaˈ hay hato ngamoy u ta panginnilaan ju an agkhujaˈ neˈ-ampoy ay chaˈju ay tay i ju pamatajan ay tay an takhu. Hotti nangamong aju!” 25 Ja inalin hachi tatakhu hi, “Aa, nangamong ami. Epapatoy mu ja anong kay ja chaˈmi ja hana holag mi chi ipuypujan chi pfahor.” 26 Hotti na-arjan hi Pilato ja impfu-aana hi Barabas, muti hi Hesus ja impahuplit na ja impulang na hachi hinchalo na ta i cha epfakhat hi kros.
Chin nanangkhatangkhaan cha ay Hesus
27 Initnud hachi hinchalo hi Hesus an inhikhop chin pfalay chi gobernador, ja inamung cha an amin chin nun-ibpfa cha an hinchalo. 28 Enaan cha chin lopfong na ja linupfungan cha han lopfong an mumpfolah an amat hi lopfong chi ari. 29 Ja pfenalengawngaw cha han pagwit ja impihuˈlub cha ay chuy ulun Hesus an amat hi korona. Ja enala cha han lunu ja empachon cha chin agwan an ngamoy na an amat hi hinjar chi ari. Nunheppe cha ay hija hon tenangkhatangkhaan cha hi khun cha pangarjan hi, “Madaydayaw a, he-a an Arin chi Hudju.” 30 Hon tinuppaan cha ja enala cha khu chin lunu ja impakhuh cha ay chuy ulu na. 31 Himmikha cha an nangekejan ay hija ja enaan cha chin impilopfong cha an mumpfolah ja empallog cha chin lopfong na. Ja initnud cha an i epfakhat hi kros.
Chin nangpfakhatan cha ay Hesus
32 Hi khun cha omajan ja chinittum cha han hi Simon an eCyrene. Impapilit hachi hinchalo an pi-ukhona chin kros Hesus. 33 Ja emmatam cha ay chuy pfulludna an nangadnan hi Golgota, an hay podhona an allon ja pfulludna an amat hi ulun chi paang. 34 Ja allon chaot ta ipa-inum cha ay Hesus han pfajah an nidchuman hi mumpa-it ta poh-onay chokhoh hi pangpfakhatan cha ay hija. Muti unaagkhu tenamtaman ja achi na penhod hotti agkhuy na ininum.
35 Amat hichi ja empfakhat cha. Ja numpfepfeleng hachi hinchalo ta machotoˈ hay mumpangala hachi lopfong Hesus. 36 Ja inumpfun cha an khun mumpfantay. 37 Ja gwa han neˈpfakhat cha ay chuy uhun chin ulu na an natutula-an ay ni chiklamu cha ay hija, an hay nitulaˈ ja, “Hitay hi Hesus an Arin chi Hudju.” 38 Ja gwacha khu han chugwa an lala-e an napfahulan an neˈchehhan an nepfakhat, hotti nun-appiton cha hi agwan chin kros Hesus chin oha an kros, ja nun-appit hi ikhid chin oha. 39 Gwa hachi tatakhu an naloh ja munggwiggwikhigwig cha hon pinahiw cha hi Hesus 40 an inali cha hi, “Un mangkay tugwali he-a hini nangali hi paˈ-iyom hini Templo muti un umuy hi toloh arkhaw ja ehaˈ-ad mu khu! Hot chaadma mah hini apfalinam ta takhuwom hinuy achor mu? Nu umannung an he-a hini Empfalay Apo Jos, ja mun-opah a ay nuy kros!” 41 Amat khu hina an tenangkhatangkhaan chin a-ap-apon chi papachi ja hachi memehtolon chi urchin Moses ja hachi uchumna an a-ap-apon chi Hudju, an khun cha allon hi, 42 “Tinakhu na hana uchumna an tatakhu muti ma-id olog na an manakhu ay chuy achor na. Hija anu hini Ari ta-o an holag Israel, hotti mun-opah koma ay chuy kros hot mamati ta-o ay hija. 43 Mamati hija anu ay Apo Jos ja allona an hija hini Empfalay Apo Jos, hotti hi Apo Jos chi manakhu ay hija nu penhod na.” 44 Anong un chin chugwa an neˈpfapfakhat ja khun cha piˈpahiw hi Hesus.
Chin natajan Hesus
45 Unagkhu gwa an nahaˈ-ad ja himpfumagkha ja hemmelong an amin ay chuy an lota ingkhana hichin napujaw. 46 Ja chin napujaw ja unagkhu la-ahna ja nun-ugwap hi Hesus an nangali hi, “Eli, Eli, lama sabachtani?” an hay podhona an hapiton ja, “Jos u, Jos u, anagkha ta tene-a-anaˈ ay he-a?” 47 Chengngor hachi uchumna an niˈtataˈchug hichuy an iniˈgwap na ja inali cha hi, “Niya an khuna ajakhan hi Elijah an manakhu ay hija.” 48 Chin oha ja temmagtag an i emmala han omaˈ-at hi apoh ja entamor na han pfimmanger an pfajah, ja empa-aw na han paor. Immuy ay chuy kros ja intumuˈ na chin ta-on Hesus ta inumona. 49 Muti inalin hachi uchumna hi, “Khenong adchiya tugwali ta tikhan ta-o hu-un umali hi Elijah an manakhu ay hija.” 50 Ja impiggwan Hesus an nun-ugwap ja na-ongoh chin hochohcha na.
51 Ja hichi Templo ad Jerusalem ja himpfumagkha ja na-ittang chin ma-uˈtor an kurtina an nanahhalin ay chuy Na-assantuwan an Kwarto, nete-a chin uhuna ja chimmapoh chin puuna. Ja nungkhihu, ja naphar hachi o-otong an pfato. 52 Ja nipfughor hachi lupfuˈ ja timmakhu hachi cho-or an nun-a-atoy an tatakhun Apo Jos, 53 ja pfimmutay cha ay ni lupfuˈ cha. Nalahin chin nummahuwan Hesus ja immuy hato an namahuwan an tatakhu ad Jerusalem an Siudad Apo Jos, ja cho-or hachi nanikhaw ay chicha.
54 Chin kapitan chi hinchalo ja chin numpun-ibpfa na an khun mumpfantay ay Hesus ja naleˈna cha chin khihu ja tinnig cha hachi na-at, ja nang-entata-ot cha. Ja inali cha hi, “Umannung ay chita an Empfalay Apo Jos hitay an takhu!”
55 Ja gwah chi chin cho-or an pfinapfai an nenebtaw an nannig chin natajan Hesus. Chicha hana ninitnud ay Hesus nete-a chin agawwachaana ad Galilee an khun tomolong ay hija. 56 Ja nidchum cha Mary Magdalen, ja hi Mary an ammod cha James ay Josep, ja hini ahagwan Zebedee.
Chin nilub-an Hesus
57 Unot gwa an mahilip, ja emmatam han achangjan an lala-e an e-Arimatea, an hi Josep chi ngachana. Oha hija an disipolon Hesus. 58 Immuy ay Pilato an i nangippug ta i na ilupfuˈ chin achor Hesus. Inapfulut Pilato ja inali na ta opahon cha chin achor Hesus ja inchat cha ay Josep. 59 Enalan Josep ja pinuttiputana han pfinacha an maphod ja maleneh. 60 Ja in-uy Josep chin achor Hesus ay chuy paˈ-ephod cha an linijangan cha an pfato an hijay ilub-ana hu-un matoy. Ja impahikhup na chin achor Hesus ja inulina han otong an pfato an tanglib chin lupfuˈ ja unot makak. 61 Ja gwah chi khu cha Mary Magdalen ja chin oha an Mary an inu-umpfun cha an homahhakhang ay chuy lupfuˈ.
Chin nangpapfantajan cha chin nilub-an Hesus
62 Hichuy an arkhaw ja Alemana an Punhakhanaan hachi Hudju ay ni Hapfachu an khun cha ngilinon. Ja chin nun-ingwiˈgwiit an ngilin ja immuy hachi a-ap-apon chi papachi ja hachi Farisee ay Pilato 63 ja inali cha hi, “Apo gobernador, nenomnom mi an chin atattakhun nuy munlahlah an hi Hesus, ja inali na hi mummahu hija ay ni me-atloh arkhaw hi natajana. 64 Hotti un chah achi mapfalin an gway im pumpfantajon ay nuy lupfuˈ na ingkhanah chin me-atloh arkhaw ay ni natajana? Ti khemhon ja gway umuy hana disipolo na an i manglajaw ay nuy achor na ta gway aton cha an mamarpfalijan hato tatakhu an allon chay nummahu hija. Hot pa-am-amchon cha chin lahlah na.” 65 Ja inalin Pilato hi, “Aa, ajakhan ju hana hinchalo ta ep-ephod ju an pfantajan hinuy lupfuˈ.” 66 Hotti immuy cha hichi lupfuˈ ja linita cha hi maphod chin tanglib ta matikhaw nu gway mangpfughor, ja empapfantay cha hachi hinchalo.