26
Chin nunhahappitanan cha hi aton cha an mamatoy ay Hesus
1 Napfalin an intuchun Hesus hay hato ja inali na hachi disipolo na hi, 2 “Anila ju an malahin chi chugwah arkhaw hot machakngan chin Pfehta an Pangnomnoman cha chin Nalohan chin Angher Apo Jos chin A-apo cha ad Egypt, ja ha-in an Na-ilangitan an Takhu, me-agwataˈ hana pfuhur u ta epfakhataˈ han kros.”
3 Netongor ja na-amung hachi a-ap-apon chi papachi ja hana uchumna an a-ap-apon chi Hudju hichi pfalay nuy Natakhay an Pachi, an hi Kayfas. 4 Nunhahappittanan cha hay aton cha an maniliw ay Hesus ta ma-id oh-ohhah manginnila ta epapatoy cha. 5 Ja inali cha hi, “Achi ta-o koma etongor ay tay umali an pfehta an achoˈlan chi tatakhu, ti unchani ja chumalat ja gway pumpapattajan chi tatakhu.”
Chin nanghiitan han pfupfai hi lanob chin ulun Hesus
6 Hichin agawwachaan cha Hesus ad Betani hi pfalay cha Simon an oha an na-unit an enakhahan Hesus 7 ja khun cha mangan hi himmigpan han pfupfai. Inu-ugnana han alabastro an pfoterja an nittugwan hi naˈ-angngina an lanob. Nehnot chin pfupfai ay Hesus ja inhiit na chin lanob chin ulu na. 8 Unot tinnig hachi disipolo na ja lemmallataˈ cha ja khun cha allon hi, “Ay-ayyu a mah hichuy an lanob an una am-amhan. 9 Uchuˈchuna agkhu niˈ una ingngina ta ichat na hini pfajad na hay hana napubli.” 10 Muti anilan Hesus hini khun cha allon ja inali na hi, “Achi ju amujuwan hija! Pfuher hitay enat na ay ha-in. 11 Hana ayya publi ja gawwacha cha ay chaˈju hi a-arkha-arkhaw, muti ha-in ja nehnot chin arkhaw an panaynaˈ ay chaˈju. 12 Hitay an pfupfai ja inhiit na hitay lanob ay tay achor u ta mehahagkhana ay nuy umali an pilub-aˈ. 13 Umannung hitay alloˈ. An amin chi omajan hana mangkaskasaba ay ni Ebanghelyo ay tay nunleneˈgwoh tay lota, ja pigpiggwon cha hitay enat tay pfupfai ta achi malidlichuwan.”
Niˈ-apfulut hi Judas hi pamatajan cha ay Hesus
14 Amat hichi ja immuy hi Judas Iskariot, an oha ay cha chuy himpolo ta chugwa an adalan Hesus, ta i niˈhapit hachi a-ap-apon chi papachi. 15 Inali na ay chicha hi, “Atanay lagpfuˈ nu e-agwat u hi Hesus ay chaˈju?” Ja inchatan cha hija hi tolompolo hi pelaˈ.a 16 Hotti nete-a ay chuy ja henehemmon Judas hay atona an mangtuchu ay Hesus ta tiligwon cha.
Chin niˈ-orpfungan Hesus hachi adalana chin Pfehta
17 Nachakngan chin penghan chi arkhaw chi Pfehta an Panganan cha hi Tenapay an Ma-id Pfinoˈpfoˈ na.b Immuy hachi adalan ay Hesus ja inali cha hi, “Ngay podhom hi i mi punhakhanaan ay ni anganan ta-o ay tay Pfehta?” 18 Ja inalin Hesus hi, “Umuy aju ad Jerusalem hichi pfalay nuy lala-e an anila ta-o, ja allon ju ay hija hi, ‘Empaad nuy Apo ta-o an allon mi hi gwa an machakngan hini timpo an pa-atan chin eneˈchan Apo Jos an ma-at ay ha-in. Hotti umaliyaˈ an midchum hana adalan u ta heto pfalay ju chi anganan mi ay tay an Pfehta.’” 19 Hotti inunud hachi adalan chin inali na ja immuy cha ta i cha nunhakhana ay ni anun cha ay chuy an pfehta an i cha Pangnomnoman chin Nalohan chin Angher Apo Jos.
20 Unagkhu nadhom ja neˈ-orpfong hi Hesus hachi himpolo ta chugwa an adalan ay chuy an pfalay. 21 Khun cha mangan ja inalin Hesus hi, “Umannung hitay alloˈ ay chaˈju, an gwa han oha ay chaˈju an i mangpfaag ay ha-in hana pfuhur u.” 22 Magkhoh hi punleˈnaan hachi adalan ay chuy inalin Hesus ja un gwahchinonon hon at hi mangpfokha hi, “Apo, un chah ha-in hini allom an mangat?” 23 Tempfar Hesus ja inali na hi, “Hini mangngina ay ha-in ja oha an khun meˈhawhaw ay ha-in hi tenapay ay tay chuju. 24 Ti ha-in an Na-ilangitan an Takhu ja matojaˈ an matoy ta mipa-annung chin impatulaˈ Apo Jos hachi profeta chin hopapna. Muti un kaykhu ka-ahi hini mangngina ay ha-in! Toˈ-onot un agkhuy netoˈkhong hija!” 25 Ja himmapit hi Judas an hija hinuy mangngina ay Hesus ja inali na hi, “Apo, un chah ha-in hini mangat?” Ja inalin Hesus hi, “Aa, he-a.”
Chin angonoh chi piˈ-orpfungan Hesus hachi adalan
26 Gwa an khun cha mangan ja unot alan Hesus han tenapay ja nunyaman ay Apo Jos ja initta-ittang na. Ja enggwanah na chin adalan ja inali na hi, “Tayya, alaon ju hitay tenapay ja inan ju, ti hitay hini achor u.” 27 Ja enala na khu chin pfahu an nittugwan hi chanum chi ubas. Nunyaman ay Apo Jos ja inchat na ay chicha ja inali na hi, “Hiniˈ-itangon ju an inumon 28 ti hijah tay hini chalaˈ an mangpa-annung hi neˈtobpfalan Apo Jos ay chaˈju. Umajuh hitay chalaˈ ta gway aton chi pfahor hana cho-or an tatakhu an mapakawan. 29 Alloˈ ay chaˈju hi hitay chi ang-angonohna hi piˈ-inumaˈ hi chanum chi ubas ingkhanah chin arkhaw an piˈ-inumaˈ ay chaˈju ay nuy nat-on an chanum chi ubas ay nuy Pun-ap-apugwan Ama.”
30 Emmopoh hitay inalin Hesus ja engkanta cha han ohan Psalm ja un chaot epacheh an umuy hichi pfulludna an ad Olibo.
Impa-innilan Hesus chin nanghaotan Peter ay hija
31 Inalin Hesus chin adalana hi, “Ad ugwani an lapfi ja anilaˈ an te-a-anaˈ ay chaˈju. Ti allona ay ni hapit Apo Jos hi, ‘Patajoˈ hini khun mumpahtor hot mahihijaˈ hay hana karnero.’c 32 Muti nummahuwaˈ ayya ja ipanguluˈ an umuy ad Galilee ta hichi punchichittuman ta-o.” 33 Himmapit hi Peter ja inali na hi, “Anong un chi-a taynan hato uchumna an adalan, muti ay ha-in ja achiˈ mangkay taytaynan he-a.” 34 Ja inalin Hesus ay Peter hi, “Umannung hitay alloˈ. Ehaotaˈ ay he-a hi mumpitlo ad ugwani an lapfi ja unot tumalanu.” 35 Muti inalin Peter hi, “Achiˈ ehaot he-a, anong unaˈ me-etoy.” Ja amat khu hina chin inalin an amin hachi adalan.
Chin nungkalalakhan Hesus ad Getsemane
36 Amat hichi ja immuy cha Hesus han lukhar an nangadnan hi Getsemane, ja inali na chin adalan hi, “Mehetay aju ta umujaˈ mungkalalag.” 37 Muti initnud na cha Peter ja hachi chugwa an empfalay Zebedee. Munnaud an munchokhoh hi punnomnomana, 38 hotti inali na ay chicha hi, “Ma-id ay chita an munnaud an machamot hi punleˈnaaˈ ja tan omataˈ hi matoy. Hotti mehetay aju ja achi aju agkhu maloˈ ta un aju miˈtu-ar ay ha-in.” 39 Ja pfinumtaw ja i nunheppe an nungkalalag ja inali na hi, “Ama, nu mapfalin koma, ja i-achawwim adniˈ hini umali an apalikhataˈ. Muti pfu-un hini podhoˈ chi ma-at ta hini podhom.” 40 Numpfangngad hi Hesus chin agawwachaan chin tolo an adalana ja chinakngana chicha an nanalloˈ. Ja inali na ay Peter hi, “Un chah achi mapfalin an miˈtu-ar a ay ha-in hi ohay upfun mah niˈ? 41 Achi aju agkhu maloˈ ta un aju gwot meˈkalalag ta achi aju ma-apfak nu matopngan hini pammati ju. Ti anilaˈ an ay ni nomnom ju ja podhon ju an miˈ-unud muti ma-id olog ni achor ju.” 42 Amat hichi ja immuy an i khu nungkalalag ja inali na khu hi, “Ama, nu achi mapfalin an ergwangaˈ ay tay ujaˈ apalikhatan ja apfulutoˈ ta ma-at hini penhod mu.” 43 Numpfangngad khu chin agawwachaan hachi tolo an adalan ja chinakngana chicha an nanalloˈ, ti achi medpor chin enloˈ cha. 44 Hotti tenaynana khu chicha ja immuy nungkalalag an hihiya chin engkalalag na. 45 Chin petlon chi pumpfangngachana ja inali na hachi adalan hi, “Hot anagkha mah un aju mamamalloˈ ja mun-en-enana? Pfumangon aju ti toja an nachakngan hitay timpo an eneˈchan Apo Jos hi ipulangaˈ an Na-ilangitan an Takhu ay cha nuy napfahulan an tatakhu. 46 Lomeggwat aju, ti chuja an umali hichuy nangngina ay ha-in.”
Chin naniligwan cha ay Hesus
47 Khun pay munhapit hi Hesus ja emmatamot hi Judas, an oha ay cha chuy himpolo ta chugwa an adalan, an impfupfulog na hachi cho-or an tatakhu an numpumpfangid ja numpumpang-or cha. Hay nannag ay chicha ja chin a-ap-apon chi papachi ja chin uchumna an a-ap-apon chi Hudju. 48 Ja intuchun Judas han pangmatunan cha ay Hesus, an hini takhu an agwalona ja hija chi tiligwon cha. 49 Un chaot emmatam ja immuy hi Judas ja enagwar na hi Hesus ja inali na hi, “Immali ami, Apo!” 50 Ja inalin Hesus ay hija hi, “Akhiˈ, anagkha ta immali a heto?” Ja nehom hachi numpun-ibpfan Judas an i numpangugnan ay Hesus.
51 Henoˈnot chin oha an nun-ibpfan Hesus chin pfangid na ja impakhit na chin takhalan chi natakhay an pachi hotti nakhingahan chin inga na. 52 Ja inalin Hesus hi, “Ehe-ot mu gwot hinuy pfangid mu. Ti nu pomatoy a an usarom chi pfangid ja mumpfangngad an hija khu chi im atajan. 53 Khemhom un amat hetoy atom an tomolong ay ha-in muti agkhuy mu nenomnom an nu podhoˈ an mumpatolong hot alloˈ ay Ama ta honakhona gwot hay hingkhahot hi lipfu an angher ta gway tomolong ay ha-in. 54 Muti nu atoˈ hitay ja ngay mah aton ni nitulaˈ an Hapit Apo Jos an mipa-annung?”
55 Ja inalin Hesus hachi atakhutakhu hi, “Unaˈ chah ngumangannu ta numpfapfangid ja numpun-ochon aju hi pang-or an immali an mampap ay ha-in? A-arkha-arkhaw ja gawwacha ta-o an amin hichi Templo hi khun u puntudtuchugwan ja agkhujaˈ tiniliw. 56 Muti na-at hay hato ta mipa-annung hana impatulaˈ Apo Jos chin profeta.” Nakhibpfoh hitay an inalin Hesus ja nahijaˈ hachi adalan ja nataynan hija.
Chin nanumarjaan chin a-ap-apo ay Hesus
57 Hay hachi naniliw ay Hesus ja in-uy cha hija ay ni pfalay chin natakhay an pachi an hi Kayfas, ti hichi chi na-amungan chin memehtolon chi urchin Moses ja chin uchumna an a-ap-apon chi Hudju. 58 Khun mangun-unud hi Peter ingkhanah emmatam chin partug chin pfalay chuy natakhay an pachi. Himmikhop ja ni-ipfun hachi gwarja ta annilaona hay ma-at.
59 Chin a-ap-apon chi papachi ja an amin chin numpun-ibpfa cha an membron chi Sanhedrin, ja henehemmon cha hay panghiˈ-ingan cha hi pamatajan cha ay Hesus, anong un achi ohto. 60 Muti ma-id chinakngan cha, anong un cho-or hana nunlahlah an nuntihtikhu. Unot napfaypfajag, ja gwa han chugwa an immuy hichi sango, 61 ja inali cha hi chengngor cha an inalin Hesus hi, “Paˈ-iyoˈ hini Templon Apo Jos muti un umuy chi toloh arkhaw hot ehaˈ-ad u khu.” 62 Hotti timmaˈchug chin Natakhay an Pachi ja inali na ay Hesus hi, “Anagkha ta achi a tompfar? Ngay pampfar mu hay hato epapfahor cha ay he-a?” 63 Muti khemmegkhenong hi Hesus. Ja inalin khu chin natakhay an pachi hi, “Alloˈ ay he-a hi mahapor an ipudnum khapo ay tay mamattakhu an Jos nu he-a chah hini Mamahhod an Empfalay Apo Jos?” 64 Tempfar Hesus ja inali na hi, “Ti niya mah an he-a chi nangali. Ja hay alloˈ khu ay chaˈju ja umali han arkhaw an panikhan ju ay ha-in an Na-ilangitan an Takhu an mi-i-ibpfun ay ni nun-appit hi agwan Apo Jos an gway apfalinana. Ja tikhanaˈ khu hi pumpfangngachaˈ an marpu ad uchu an midchum hi pfonot.” 65 Amat hichi ja hinaˈ-in chin natakhay an pachi chin lopfong na khapo hi pfungot na. Ja inali na hachi tatakhu hi, “Tayya an chengngor ta-o hitay inali na an ipadchung na hitay achor na ay Apo Jos. Hotti un chah khahin khu un gway muntihtikhu? 66 Ngay allon ju tugwali?” Ja hi-a-ali cha hi, “Un ta-o gwot epapatoy, ti otong chi pfahor na!” 67 Ja tinuppaan cha chin angah na ja hinuntuk cha, ja henoplat chin uchumna 68 hon inali cha hi, “Nu profeta a, he-a an Kristo, ja pfugwaom adchiya nu nga chah nuy nanuntuk ay he-a.”
Chin nanghaotan Peter ay Hesus
69 Ay chuy an ni-i-ibpfunan Peter chin partug chuy pfalay ja immuy han pfalahang an takhala ay hija ja inali na hi, “Oha a jaˈ an khun mitnud ay Hesus an eGalilee.” 70 Enhaot Peter ja inali na hay hachi gwah chi hi, “Pfu-un mangkay! Ma-id anilaˈ ay nuy allom.” 71 Immuy hichi pingngit chin partug ja tinnig han oha khu an pfalahang an takhala. Ja inali na hachi niˈtataˈchug hi, “Hitay an lala-e, ja hija chi oha an khun mitnud ay Hesus an eNazaret.” 72 Ja hen-enhaot khu Peter an inali na hi, “Anilan Apo Jos an umannung an agkhuy u anila hinuy an takhu.” 73 Unot achi mapfajag ja immuy hachi niˈtataˈchug ta inali cha ay Peter hi, “Umannung an nidchum a ay chicha, ti omod hinuy atom an munhapit an hapit chi eGalilee.” 74 Ja hen-enhaot Peter an inali na hi, “Pfu-un numpay! Anong ja dusaonaˈ ay Apo Jos hi un lahlah hitay alloˈ, ti agkhuy u anila hinuy an takhu an khun ju hapiton.” Ja timmalanu gwot chin agwitan. 75 Ja nenomnom Peter chin inalin Hesus ay hija an, “Ehaotaˈ hi mumpitlo ad ugwani an lapfi ja unot tumalanu.” Pfimmutay hi Peter ja achi anhan chin kila na khapo hi tutuju na.