11
Chin inalin Hesus hachi hennag John Bautista
1 Napfalin hitay nuntukhunan Hesus hachi himpolo ta chugwa an adalana ja empacheh na an umuy muntudtuchu ja mangaskasaba hachi apfuglapfuglay chi Hudju. 2 Ay chuy an timpo ja nipfabpfalud hi John Bautista ja chengngor na chin khun at-aton Hesu Kristo. Hotti hennag na hana disipolo na 3 an umuy ay Hesus an i mangpfokha hu-un hija chah hini inalin John an hennag Apo Jos an hahadchon cha, wenno hay oha. 4 Enhanhan cha ay Hesus ja tempfar na ja inali na ay chicha hi, “Mumpfangngad aju ta allon ju ay John hay hato tinnig ju ja chengngor ju. 5 Allon ju chi tinnig mi an hana napfulaw ja tumikhaw cha, hana napechoy ja chumalan cha, hana na-unit ja temmenong cha, hana napo-it ja chomngor cha, ja hana nun-atoy ja timmakhu cha. Ja khun mekasaba hini maphod an Hapit Apo Jos hana napubli. 6 Ja allon ju khu chi madmachennor hini takhu an achi munhalinchugwa hini nomnom na ay ha-in.”
7 Amat hichi ja empacheh chin disipolon John an nakak ja inalin Hesus hini omaˈ-atan John ay cha chuy atakhutakhu. Inali na hi, “Chin immajan ju ay John hichi let-ang ja ngay nenomnom ju hi i ju tikhan? Unchah hay potaar an khun mumpfiwpfiwwapfiw? Pfu-un. 8 Hot ngachah mah chi i ju tinnig? Un aju chah immuy ta tikhan ju hay takhu an maphod chi lopfong na? Pfu-un khuh niˈ, ti hana ayya khun munlopfong hi maphod ja hay pfalay chi ari chi punhihittugwan cha. 9 Hotti ngachah tugwali chi i ju tinnig? Hay profetan Apo Jos? Aa, ja alloˈ ay chaˈju an napfagpfagto pay hija mu hana uchumna an profeta. 10 Ti hi John hini nitulungan ni nitulaˈ an Hapit Apo Jos hi nangarjana hi, ‘Tayya an honakhoˈ hitay mangpangpangullu ja un he-a ta ehakhana na hini agwum.’”a 11 Ja inalin khuh Hesus hi, “Umannung hitay alloˈ ay chaˈju an hi John Bautista hini napfagpfagto an amin hi hay takhu heto lota. Muti napfagpfagto pay hini nabnababba an takhu an nidchum ay ni Pun-ap-apugwan Apo Jos hi tatakhu. 12 Nete-a chin immaliyan John ja ingkhana ad ugwani ja cho-or hachi mungkhikhihhu an mun-e-egkhad an midchum ay ni Pun-ap-apugwan Apo Jos. 13 Hini omaˈ-atan chuy Pun-ap-apugwana ja intuchun hachi profetan Apo Jos ja chin Urchin Moses ingkhanah immaliyan John Bautista. 14 Ja na-awatan ju koma an hi John hinuy nipadtu an Elijah an umali. 15 Hotti pa-ennongan ju an munchongor ay tay alloˈ.
16 Alloˈ ay chaˈju hini eˈ-eˈnongan ju an tatakhu ad ugwani an timpo, an meˈmeˈnong aju hana ung-ungungnga an um-umpfun hinun palaha an munlewlegwa muti ma-id maptoˈ hi podhon cha. Ti iˈgwap hana uchumna an allon cha ay ni khun cha peˈlewlegwa hi, 17 ‘Nanongngali ami muti agkhuy aju temmajaw. Ja emmepfer ami muti agkhuy aju niˈkila.’ 18 An amat ay chaˈju an ma-id maptoˈ hi podhon ju. Ti immali hi John Bautista ja khun mun-ayunar ja achi umin-inum hi pfajah, ja allon ju hi un mun-angaw. 19 Ja tan immaliyaˈ an Na-ilangitan an Takhu, ja khunaˈ meˈ-orpfong an meˈ-an, ja nuja an pahigwonaˈ an khun ju allon hi, ‘Tikhan ju akay niˈ hitay an takhu an nahopo ja khun mapfutong. Ja niˈkhayyum khu hana khun munhenger hi pakha ja hana uchumna an nun-apfahulan an tatakhu!’ Hotti tayya an pahigwon chaˈmi an chugwa. Muti nomnomon ju hitay, an hini aphod ja kinala-eng Apo Jos ja matikhaw ay ni piˈtakhuwan hay hana nangapfulut ay ni itudtuchu mi ay John.”
Hini dusan hana tatakhu an agkhuy namati ay Hesus
20 Nunhapit khu hi Hesus ja pinahiw na hana tatakhu an gwa ay cha chuy pfuglay an nangatana hachi otong an milagro ti agkhuy cha chamchama chin-ug hana pfahor cha. 21 Ja inali na hi, “Ka-ahi cha hay hana eKorazin ja eBetsaida! Nu na-at ad Tiro ja ad Sidon hachi otong an milagro an enat u ay chuy pfuglay cha hot gwa agkhu niˈ an napfajag an nunlopfong cha hi kamma ja inlipfu chay chapor ay ni ulu cha an pangpatikhagwan chay nan-ukhan cha hi pfahor cha. 22 Alloˈ ay chaˈju hi, umali ayya hini arkhaw an Panugijan Apo Jos an amin hi tatakhu, ja machamchamot hini dusan hana eKorazin ja eBetsaida mu hay hana eTiro ja hana eSidon. Ti hay hato an eKorazin ja eBetsaida ja khun cha tikhan hay hato milagro ja achi cha chamchama chuˈkhon hana pfahor cha. 23 Ja hay hana eKapernaum, khemhon chaot un cha ma-ar-ali an napfagpfagto. Muti pfu-un an chicha chi umuy ad chalom. Ti nu na-at ad Sodom hachi otong an milagro an enat u ay nuy pfuglay cha hot chidchin-ug agkhu niˈ hachi eSodom hana pfahor cha hot agkhuy koma khenhob Apo Jos chin pfuglay cha ta gawwacha ingkhana ad ugwani. 24 Alloˈ ay chaˈju hi, umali ayya hini arkhaw an Panugijan Apo Jos hana tatakhu, ja machamchamot hini dusan hana tatakhu ad Capernaum mu hay hachi tatakhu ad Sodom an khenhob Apo Jos chin timpon Abraham.”
25 Emmopoh hitay an inalin Hesus ja nungkalalag an inali na hi, “Ama, munyamanaˈ ay he-a an Ap-apo hina ad langit ja heto lota, ta agkhuy mu impa-innila hay hato hana tatakhu an mangali an manomnom an cho-or chi achar cha, ta hay hana ma-id achar na chi nangpa-innilaam. 26 Maphod hitay, Ama, ti hijah tay hini penhod mu.” 27 Inalin khuh Hesus hachi tatakhu hi, “Empulang Ama an amin ay ha-in ta ha-in chi mangpagpong. Ma-id chi uchumnah nanginnila hi omaˈ-ataˈ nu pfu-un hi Ama ja angkhay. Amat hina khu ay Ama an ma-id chi hay nanginnila hi omaˈ-atana nu pfu-un ha-in an Empfalay na ja hana podhoˈ an pangpa-innilaan ay hija.
28 Umali aju an amin ay ha-in, chaˈju an machachamtan ja maliglikhatan.b Ehchor ju an amin ay ha-in hot ha-in chi mangchat hi pun-ar-alenagwaan ju. 29 Unuchon ju hana tukhun u ja mumpatuchu aju ay ha-in, ti ma-olojaˈ ja napakumbaba, hot mun-ar-alenagwa aju. 30 Ti hana tukhun u ja achi nalikhat hi unuchon an achi pumalikhat.”