10
Chin nannakhan Hesus chin himpolo ta chugwa an apostol na
1 Enajakhan Hesus chin himpolo ta chugwa an adalana ja inchatana chicha hi apfalinan an mangpakak hi napukhit an ispiritu an khun mehoˈlong. Inchat na khu hay apfalinan cha an mangpatenong an amin hi chokhoh. 2 Ja hay hato chi ngachan hay hachi himpolo ta chugwa an nginadnana hi apostol. Chin nahhun ja hi Simon an nangadnan hi Peter, ja hi Andrew an akhi na, ja hi James an empfalay Zebedee, ja hi John an akhi na, 3 ja hi Philip, ja hi Bartolomew, ja hi Tomas, ja hi Matthew an chin khun munhenger hi pakha, ja hi James an empfalay Alfeus, ja hi Tadeus, 4 ja hi Simon an oha an Zealot, ja hi Judas Iskariot an hijay mangngina ay Hesus. 5 Hennag Hesus hay hato himpolo ta chugwa ja hijah tay chi imbilina an inali na ay chicha hi, “Achi aju umuy hana pfuglay chi Hentil ja achi aju khu umuy hana pfuglay chi Samaritan. 6 Hay pahhunon ju gwot niˈ an omajan ja hana gwachaan hachi holag Israel an amat cha hi karnero an na-utaw. 7 An amin chi omajan ju ja mangaskasaba aju ja allon ju hi, ‘Achi mapfajag hot machakngan hini Pun-ap-apugwan Apo Jos hi tatakhu.’ 8 Epatenong ju hana mumpunchokhoh, ja tinakhu ju hana natoy ja akhahan ju khu hana na-unit, ja pun-epakak ju hana napukhit an ispiritu an nun-ehoˈlong. Ja achi aju mumpapfajad, ti agkhuy ju pfinajachan hitay apfalinan an nichat ay chaˈju. 9 Achi aju mun-ochon hi pihu, 10 ja hape-eng. Achi aju mun-ochon hi hay pun-orkhan ju ja hay hapato ja hay pfunguhan. Ti an amin hana muntamu ja kalintikhan cha an omagwat hana mahapor cha ay ni takhu an piˈtamuwan cha.
11 Nu omatam aju ay ni ohan pfuglay ja tikhan ju hay takhu an mamhod an mangajakhan ay chaˈju, ja meˈheto aju ay hija ingkhana hi akakan ju ay nuy an pfuglay. 12 Nu humikhop aju ay ni pfalay ja allon ju hi, ‘Pomhod hini piˈtakhuwan ju an nunheto ay tay an pfalay.’ 13 Ja nu hini nunheto ay ni pummangiliyan ju ja apfuluton cha hitay allon ju hot pomhod cha. Muti achi cha ayya apfuluton hot mumpfangngad hini bindisyon ay chaˈju. 14 Ja nu khulat ta hana tatakhu ay nuy an pfuglay ja achi chaˈju podhon an mangiliyon ja achi cha egngor hini itudtuchu ju, ja pumpuˈpu-an ju hay chapor an nep-ot ay ni chapan ju hi akakan ju ay nuy an pfalay wenno pfuglay.a 15 Umannung hitay alloˈ ay chaˈju an umali ayya hini arkhaw an Panugijan Apo Jos hi tatakhu, ja machamchamot hini dusan hana tatakhu ay nuy an pfuglay mu hachi tatakhu ad Sodom ja Gomorah an khenhob Apo Jos chin timpon Abraham.
16 Tan pfaaloˈ chaˈju an amat hi naˈna-unnud an karnero an umuy hana achaan chi tatakhu an amat hi mun-apfungot an khenger. Hotti manomnom ja maˈma-ulloy aju koma. 17 Tikhagwun ju ti gwacha mangkay hana tatakhu an pfumuhur ay chaˈju. Ijuy chaˈju hana hugwi ta echalom chaˈju, ja ipahuplit chaˈju hichi sinagoga. 18 Ja ijuy chaˈju hana gobernador ja ar-ari khapo hi immunuchan ju ay ha-in. Ja hinuy chi timpo an puntihtikhuwan ju ay chicha ja hana Hentil ay ni hapit u. 19 Nu echalom chaˈju ja achi aju madanakhan hi hay allon ju an ehongpfat ju ay chicha. Ti ay nuy an timpo an humanguwan ju ja ituchun Apo Jos hay ehongpfat ju. 20 Ti pfu-un chaˈju ja angkhay chi munhapit, an hini Espiritun Apo Jos chi mangchalan ay chaˈju. 21,22 Ay nuy an timpo ja pfuhulon chaˈju an amin hi tatakhu khapo ay ni nangunuchan ju ay ha-in. Hana uchumna ja anong un hana a-akhi cha ja epfaag cha hana ap-apo ta patajon cha. Amat khu hina chi aton ni oha an ammod hay empfalay na. Ja hana ungunga, chuˈkhon cha hana a-ammod cha ja empapatoy cha chicha. Muti hana mangedpor hay hato ingkhanah atajan cha an achi cha epfot hini pammati cha, ja miˈtakhu cha. 23 Nu palikhaton chaˈju ay ni oha an pfuglay ja lomajaw aju ta umuy aju ay ni oha. Umannung hitay alloˈ, an achi ju pachaˈpuhon an lawlagwon an amin hana apfuglapfuglay ad Israel hot umali hini arkhaw an pumpfangngachaˈ an Na-ilangitan an Takhu.”
24 Ja inalin khu Hesus hi, “Hini mun-ad-achar ja achi nangatngato mu hini mehtolo na. Ja hini takhala ja achi napfagpfagto mu hini apo na. 25 Hotti nu ma-apfoholan hini mehtolo, ja nomnomon ni khun mitudtuchugwan an anong un hija ja ma-apfoholan khu. Ja amat ay ni himpfut, an ma-apfoholan khu nu ma-apfoholan hini apo na. Ja ay ha-in an apo ju, ja tayya an ma-apfoholanaˈ, ti nan allon cha hi un ha-in hi Beelzebul an ap-apon chi napukhit an ispiritu. Hotti achi mehalla an omom-omod an pfuhulon chaˈju an tatakhuˈ.
26 Hotti achi aju toma-ot ay chicha. Ti an amin hana ililiˈ-ud cha an aton an achi ma-innila ad ugwani muti gwa han arkhaw an ma-innila chamchama. 27 Hotti nu amat heto ja an amin hana inaliˈ ay chaˈju ad ugwani an immiˈ-igway ta-o, ja epagngor jun to hi achaan chi tatakhu. Ad ugwani ja i-am-amu heto unig muti iˈgwap jun to hichi pfutayna. 28 Ja achi aju toma-ot hay hana umali an mamatoy ay ni achor ju, ti ma-id olog cha an mamatoy ay ni lennagwa ju. Eta-ot juwot niˈ hi Apo Jos an gway apfalinana an mamaˈ-i ay ni achor ja lennagwa hichi impferno. 29 Anila ju an anong un hini chugwa an pfucheng an mahalape, ja ma-id oh-ohha hi makhah ay tay lota nu achi apfuluton Jos Ama. 30 Ja anong un hay hana pfuuˈ ju ja pfinibpfilang na. 31 Hotti achi aju toma-ot, ti napfarpfalor aju mu hay hana cho-or an pfucheng. 32 An amin hana achi mangipfa-in an mangpa-innila hi nidchuman cha ay ha-in, ja achiˈ khu ipfa-in chicha an ipa-innila hichi gwachaan Ama ad langit. 33 Muti hay hana mangipfa-in ay ha-in hi hangon hana tatakhu, ipfa-in u khu chicha hichi gwachaan Ama ad langit.
34 Un chah khemhon ju un hay apanuhan ju chi immaliyaˈ heto lota? Achi amat heto, ti hitay immaliyaˈ ja mangchat hi punchichinnuˈ-ukhan ju. 35 Khapo ay ha-in ja chuˈkhon ni lala-e hinuy ammod na an lala-e, ja chuˈkhon ni pfupfai hinuy ammod na an pfupfai, ja chuˈkhon ni na-apo an pfupfai hini ammod ni ahagwa na. 36 Hana pfuhur ni ohan takhu an namati ja hana a-akhi na. 37 Hini ayya takhu an ot-ottong chi pamhod na ay ni ammod na wenno empfalay na mu hini pamhod na ay ha-in ja achiˈ ipfilang hi takhuˈ. 38 Ja achiˈ ipfilang hi takhuˈ hini achi mami-ug ay ni kros na ta unuchonaˈ.b 39 Ti hini ayya takhu an mangpa-ennongan ay ni piˈtakhuwana heto lota ja angkhay, ja achi miˈtakhu ay Apo Jos. Muti hini takhu an man-ug ay ni piˈtakhuwana heto lota khapo hi pangunuchana ay ha-in, ja miˈtakhu ay Apo Jos hi ma-id chi pogpogna.
40 Hini mangakhamid ay chaˈju ja inakhamichaˈ khu. Ja hini mangakhamid ay ha-in ja inakhamid na hi Ama an nannag ay ha-in. 41 Hini mangakhamid ay ni profetan Apo Jos khapo ta profeta ja michatan hi lagpfu an hihiya ay ni lagpfun chi ohan profeta. Ja hini mangakhamid ay ni magpong an takhu khapo ta magpong ja michat ay hija hini lagpfun chi oha an magpong an takhu. 42 Ja alloˈ ay chaˈju an hini takhu an tomolong hi oha an nabnababba an namati khapo hi pangunuchana ay ha-in, anong un himpfahpfahhu hi chanum chi ichat na hi inumona, ja gwachay linagpfu na ay nuy an enat na.”