Gàlátì ŋa 3

Ká rɛ̃̀ si nɛ́kpa-Mɔ̀ɔ́sè nàmí ká nɛ́ àkaralé si ńǹtá-Yèésù?

Ɛ̀ŋɛ ɛnɛ-Gàlátì ŋa, éwo kò wà fú ŋɛ́! Nɛ̀ɛ́ gìɖì tútútú nyí ìsérè-ŋɛ́ kpaɖà tó bɛ́ɛ̀ ná? Nódzú tɛ̀ŋɛ ká-ŋɛ́ ŋa ní àa nya Yèésù Kírísítò ɖíre fú ŋɛ́ kíbí à kã̀ã́ si ńǹtá-egi-ìɖáàgàlàdzà†, tsí ó kú#ɛ́ nɔ̀. Kí tse tsí iŋɛ́ ŋa#á wà lɔ bɛ́ɛ̀? 2 Báàyí#ɛ́, ǹ bòkó bèrè ŋɛ́ náfɔ̀-kã̀. Ńǹwèrè yèé Mímí-Ɔ̀ɖáyé† tì wɔ̀ ńǹtá-ŋɛ́#ɛ́ fee, àtsùgbée kíbí è rɛ̃̀ si nɛ́kpa-Mɔ̀ɔ́sè†#ɛ́ ní tse tsí ó tì wɔ̀ ńǹtá-ŋɛ́#ɛ́ nàmí àtsùgbée kíbí è gba ikɔ̀ ɖíɖɔ̃̀#ɛ́ gbɔ́ ní tse#ɛ́? 3 Éwo kò wà fú ŋɛ́ ni nɔ̀. Mímí-Ɔ̀ɖáyé mɔ́wɔ́ gbè fú ŋɛ́, tsí è ɖi olí-Yèésù ŋa si. Bɛ́ɛ̀ ní è kpée si ńnɛ̀#ɛ́. Tsí báàyí#ɛ́, è wà wo e mú àmí tɛ̀ŋɛ ká-ŋɛ́ ŋa, tsí ń tseé lɔ káà dzáà? 4 Bí è wà tse bɛ́ɛ̀#ɛ́, ìréré yèé ŋa wá ńǹtá-ŋɛ́ wáa lɔ#ɛ́ dzɛ́ iŋɛ́-akpotu kpó ni. Ó ɖi, ǹ módzú si ní kò tsi iŋɛ́-akpotu ni. 5 Ńbɛ̀ɛ́, Ɔ̀ɖáyé tse tsí Mímí‐ɛ̀ wà bá ŋɛ́ si, tsí wà tse iŋɛ́-àwùsì ŋa náàŋírĩ-ŋɛ́ nɔ̀. Ǹ wà bèrè ŋɛ́ ní fee, Ɔ̀ɖáyé tse bɛ́ɛ̀ náàtsùgbée kíbí è wà rɛ̃̀ si nɛ́kpa-Mɔ̀ɔ́sè#ɛ́ nàmí kíbí è gba ikɔ̀ ɖíɖɔ̃̀#ɛ́ gbɔ́ ní tse tsí ó tse bɛ́ɛ̀#ɛ́?

6 È tsèsérè ti nára-Àbàràhámì† káyí. À kɔ si ńǸwé-Ɔ̀ɖáyé† ní: “Àbàràhámì gba Ɔ̀ɖáyé gbɔ́, tsí náàtsùgbée bɛ́ɛ̀#ɛ́, Ɔ̀ɖáyé gbàá nɔ́ɔ̀nyà-atsòtítɔ́ nódzú-ara‐ɛ̀.”^* 7 Ńbɛ̀ɛ́, ó wà ní kó yé ŋɛ́ rere ní: Ɛnɛ yèé ŋa nɛ́ àkaralé si ńǹtá-Ɔ̀ɖáyé#ɛ́, àŋa ní dzɛ́ ɔmalɔ́ma-Àbàràhámì ŋa gìɖì gìɖì#ɛ́. 8 Ìwé-Ɔ̀ɖáyé† wà nyà ɖíre fú wa ní dzɔ̀ɔ́ dzɔ̀ɔ́#ɛ́, Ɔ̀ɖáyé ti tse ètò-kã̀ si ní ìwèrè-kã̀ nákó wáa wá, tsí ɛnɛ yèé kò dzɛ́ ɔma-Ìyúɖà ŋa#á nákó mú àkaralé-ŋa si ńǹtá-Ɔ̀ɖáyé, tsí bí à tse bɛ́ɛ̀, Ɔ̀ɖáyé nákó gbà ŋá nɔ́ɔ̀nyà-atsòtítɔ́ nódzú-ara‐ɛ̀. Náàtsùgbée bɛ́ɛ̀#ɛ́, Ɔ̀ɖáyé dzíkɔ̀ ɖíɖɔ̃̀ fú Àbàràhámì ní: “Ɔ̀ɖáyé nákó tu kùsɛ̀ɛ̀ fú ɔ̀nyà-ìlú ŋa kpó gbà ńǹtá-ɛ̀ɛ.”^* 9 Ńbɛ̀ɛ́, Àbàràhámì nɛ́ àkaralé si ńǹtá-Ɔ̀ɖáyé, tsí Ɔ̀ɖáyé tu kùsɛ̀ɛ̀ fúu. Ɛnɛ yèé ŋa gbo nɛ́ àkaralé bɛ́ɛ̀#ɛ́, àŋa gbo, à wà ńnɔ́-kùsɛ̀ɛ̀-Àbàràhámì#ɛ́.

10 Ó ɖi, ɛnɛ yèé ŋa náa wà tsèsérè ní bí àŋa wà rɛ̃̀ si nɛ́kpa-Mɔ̀ɔ́sè#ɛ́, ni Ɔ̀ɖáyé nákó gba àŋa nɔ́ɔ̀nyà-atsòtítɔ́#ɛ́, èré-Ɔ̀ɖáyé nákó má ŋa, iŋɛ́ yèé tse#ɛ́, à kɔ si ńǸwé-Ɔ̀ɖáyé ní: “Bí ɔ̀nyà-kã̀ kò wà tse si ńǹtá-ìwé-ɛkpa-Mɔ̀ɔ́sè#ɛ́ dzálɛ̀ kpó títí kó máa bɔ ɔ̀kã̀ kpókpó#ɛ́, èré-Ɔ̀ɖáyé nákó máa.”^* 11 Kíbí ó dzɛ́ bɛ́ɛ̀#ɛ́, inɔ́‐ɛ̀ má fúnɛ rere ní ɔ̀nyà ɔ̀kã̀lɔ́ɔ̀kã̀ kpó, bí ó wà rɛ̃̀ si nɛ́kpa-Mɔ̀ɔ́sè#ɛ́, kàkó nyáa dzɛ́ ɔ̀nyà-atsòtítɔ́ nódzú-Ɔ̀ɖáyé, iŋɛ́ yèé tse#ɛ́, à kɔ si ńǹwé#ɛ́ ró ní: “Ɛnɛ yèé gba Ɔ̀ɖáyé gbɔ́#ɛ́, Ɔ̀ɖáyé náa gbàá nɔ́ɔ̀nyà-atsòtítɔ́ nódzú-ara‐ɛ̀, tsí ɛnɛ nyɛ̀ŋɛ̀ nákó rí àyɛ̀.”^* 12 Ó ɖi, ìyàtɔ̀ wà náàŋírĩ-ɛkpa-Mɔ̀ɔ́sè òŋu àkaralé. Ɛkpa-Mɔ̀ɔ́sè òŋu#ɛ́, afɔ̀-ká rɛ̃̀ si nɛ́kpa ni, afɔ̀-àkaralé kò wà ńnɛ̀. Kà kàa bɛ́ɛ̀, à kɔ afɔ̀-òmírɛ̃̀-kã̀ si ńǸwé-Ɔ̀ɖáyé#ɛ́ ró ní: “Bí ɔ̀nyà-kã̀ wà tse si ńǹtá-iŋɛ́ kpó yèé à kɔ si nɛ́kpa-Mɔ̀ɔ́sè#ɛ́, ɛkpa#á nákó fú ɛnɛ nyɛ̀ŋɛ̀ náàyɛ̀.”^*

13 Ó ɖi, Ɔ̀ɖáyé bɛ Kírísítò wá, tsí ó wáa gbà wá dzɔ̀ɔ́ nárũ-èré yèé wà nɛ́kpa-Mɔ̀ɔ́sè#ɛ́, èré yèé má má wa kíbí àa kò rɛ̃̀ si nɛ́kpa#á kpó#ɛ́. Tsí Kírísítò gbàá tse ti ara‐ɛ̀. Ǹ wà fɔ̀ bɛ́ɛ̀, iŋɛ́ yèé tse#ɛ́, à kɔ si ńǸwé-Ɔ̀ɖáyé ní: “Ɔ̀nyà ɔ̀kã̀lɔ́ɔ̀kã̀ kpó, bí à kã̀ã́ si ńǹtá-egi#ɛ́, Ɔ̀ɖáyé ré fúu ńnɛ̀ɛ́.”^* 14 Bɛ́ɛ̀ ní Yèésù Kírísítò tse#ɛ́, àtsùgbée ɛnɛ yèé kò dzɛ́ ɔma-Ìyúɖà ŋa#á ká tse ɔ̀kã̀ntso báa, tsí ká gba kùsɛ̀ɛ̀#ɛ́, kùsɛ̀ɛ̀ yèé Ɔ̀ɖáyé tàlé‐ɛ̀ fú Àbàràhámì#ɛ́. Èkéèdzì#ɛ́, Kírísítò tse bɛ́ɛ̀, àtsùgbée Mímí-Ɔ̀ɖáyé kó tì wɔ̀ ńǹtá-wa, àwa yèé ŋa nɛ́ àkaralé si ńǹtá-Yèésù Kírísítò#ɛ́ ni. Bɛ́ɛ̀ ní Ɔ̀ɖáyé tàlé‐ɛ̀ si#ɛ́.

Ɛkpa-Mɔ̀ɔ́sè kàkó nyáa kparɔ àlé yèé Ɔ̀ɖáyé ta si#ɛ́

15 Ìnàbí-mi ŋa, ǹ bòkó tse ìsàwé-kã̀ fú ŋɛ́ ti nára-kíbí iŋɛ́ ŋa wà gbà náyé#ɛ́. Òŋu ní wà dzɛ́ ní: Bí ɔ̀nyà-kã̀ mɔlɛ̀ ɖí iŋɛ́-kã̀, tsí mɔ́wɔ́ tɛ̀ɛ́ si kpó#ɛ́, ɔ̀nyà-kã̀ kpókpó kò wà, tsí kó nyáa nyí iŋɛ́#ɛ́ kpaɖà. Tsí ɔ̀nyà-kã̀ kpókpó kàkó nyáa mú ìsérè-kã̀ gbo máa. 16 Ńbɛ̀ɛ́, Ɔ̀ɖáyé tàlé fú Àbàràhámì†, tsí tàlé fú ɔmalɔ́ma‐ɛ̀-kã̀ gbo. Ó ɖi, à kò kɔ si ńǸwé-Ɔ̀ɖáyé#ɛ́ ní Ɔ̀ɖáyé tàlé fú ɔmalɔ́ma‐ɛ̀ ŋa. Ó má dzɛ́ bɛ́ɛ̀ ní à kɔɔ́ si#ɛ́, ó má nyà ɖíre ní ɔ̀nyà kpíkpɔ̀ ní Ɔ̀ɖáyé wà tàlé#ɛ́ fú#ɛ́. Ó ɖi, à kɔ si ńǹwé#ɛ́ ní: “Ɔ̀ɖáyé tàlé fú ɔmalɔ́ma-ɛ̀ɛ.”^* Kíbí ó dzɛ́ bɛ́ɛ̀#ɛ́, ɔmalɔ́ma ɔ̀kã̀ntso ní à wà báfɔ̀#ɛ́, tsí ɔmalɔ́ma#á, Kírísítò ni. 17 Òkpì-afɔ̀ yèé ǹ wà wo n fɔ̀#ɛ́ ní wà dzɛ́ ní: Àlé yèé Ɔ̀ɖáyé ta si fú Àbàràhámì#ɛ́, ɛkpa-Mɔ̀ɔ́sè kàkó nyáa nyàá bɔ̀. Ó ɖi, Ɔ̀ɖáyé tse ìmɔ̀lɛ̀-kã̀ bá Àbàràhámì, tsí mɔ́wɔ́ tɛ̀ɛ́ si kpó. Tsí ó tse ɔɖɔ̃́ ɔgbã̀wó lé ńrɛ̃́wó (430) wáa lɔ tã́ná kó wáa mú ɛkpa‐ɛ̀ bɔwɔ́-Mɔ̀ɔ́sè náànyìwà. Kíbí ó dzɛ́ bɛ́ɛ̀#ɛ́, ɛkpa-Mɔ̀ɔ́sè#ɛ́ kàkó nyáa nɔ ìmɔ̀lɛ̀#ɛ́ ǹɖe. 18 Ó ɖi, kò tsi kíbí à náa rɛ̃̀ si nɛ́kpa-Mɔ̀ɔ́sè#ɛ́ ní náa tse tsí à náa módzú si ní ká gba iŋɛ́ yèé ŋa Ɔ̀ɖáyé náa fú tɛ̀ɛ̀ ŋa#á. Bí ó dzɛ́ bɛ́ɛ̀, ni iŋɛ́ ŋa#á kò ti ńnɔ́-àlé yèé Ɔ̀ɖáyé ta si#ɛ́ ńnɛ̀ɛ́. Àbàràhámì fe, Ɔ̀ɖáyé gbà ńǹtá-àlé yèé Ɔ̀ɖáyé ta si#ɛ́, tsí fúu ńŋɛ́ ŋa#á ni.

19 Báàyí#ɛ́, kíbí Ɔ̀ɖáyé fú Àbàràhámì ńŋɛ́ ŋa#á bɛ́ɛ̀#ɛ́, kí tse tsí ó wáa mú ɛkpa‐ɛ̀ bɔwɔ́-wa náànyìwà? Kíbí àa wà dzàbi tó gbà#á ní tse tsí ó tse bɛ́ɛ̀#ɛ́. Tsí ó wà ní kó wà bɛ́ɛ̀ si títí ɔmalɔ́ma-Àbàràhámì#ɛ́ kó wáa tó, ɔmalɔ́ma yèé Ɔ̀ɖáyé tàlé si fúu#ɛ́. Ó ɖi, Ɔ̀ɖáyé mú ɛkpa#á bɔwɔ́-Mɔ̀ɔ́sè gbà ńǹtá-adzítsɛ́-ɔ̀rɔ̃† kã̀ŋa, tsí Mɔ̀ɔ́sè dzɛ́ ɛnɛ yèé ɖóro si náàŋírĩ-adzítsɛ́-ɔ̀rɔ̃ ŋa#á òŋu ɔ̀nyà ŋa, tsí ó wà mú ɛkpa#á bɔwɔ́-ɔ̀nyà ŋa ńǹkɛ̀ɛ́. 20 Bí ó dzɛ́ ní ɔ̀nyà-kã̀ náa ɖóro náàŋírĩ-ɔ̀nyà-kã̀ òŋu olòmírɛ̃̀-kã̀, tsí wà gba afɔ̀ fɔ̀ fú ŋa#á, kò tsi afɔ̀-ɔ̀nyà ɔ̀kã̀ntso ni. Ó ɖi, Ɔ̀ɖáyé òŋu, ɔ̀kã̀ntso gé ní wà#á, ɔ̀kã̀ kò wà ró.

21 Báàyí#ɛ́, ɛkpa-Ɔ̀ɖáyé†#ɛ́ fe, ó wà kpa àlé yèé ŋa Ɔ̀ɖáyé ta si#ɛ́ taánù ní ó dzɛ́#ɛ́ɛ̀? Láyé! Kò wà kpa ŋá taánù. Ó ɖi, ó má dzɛ́ ní ɛkpa-kã̀ wà, tsí ɛkpa#á nákó nyáa tse tsí ɔ̀nyà ŋa kó rí àyɛ̀#ɛ́, ɔ̀nyà ŋa má ɖi ɔ̀nyà-atsòtítɔ́ nódzú-Ɔ̀ɖáyé gbà ńǹtá-ɛkpa#á nɔ̀. 22 Ó ɖi, Ìwé-Ɔ̀ɖáyé† wà fɔ̀ ní ikpá-kã̀ wà, tsí náa sɔ́nɛ si ńbàɖí tsítse. Ikpá#á, ó wà kíbí ó mú ɔ̀nyà-ayé gbaŋgba#á kpó si nɛ́ɛ̀ŋà si bɛ́. Ó lɔ bɛ́ɛ̀, àtsùgbée Ɔ̀ɖáyé kó sã àlé#ɛ́ fú ɛnɛ yèé ŋa gba Yèésù Kírísítò gbɔ́#ɛ́ ni, iŋɛ́ yèé tse#ɛ́, à nɛ́ àkaralé si ńǹtá‐ɛ̀.

23 Ńbɛ̀ɛ́, ìwèrè-kã̀ wà, tsí ká nɛ́ àkaralé si ńǹtá-Yèésù Kírísítò. Tã́ná ìwèrè nyɛ̀ŋɛ̀ kó wáa tó#ɛ́, ɛkpa-Mɔ̀ɔ́sè#ɛ́ tse wá si bɛ́ kíbí ɛnɛ yèé fɔ̀ ní à náa wà ɖenɛ nɛ́ɛ̀ŋà bɛ́#ɛ́ ni. Tsí ó tse wá si bɛ́ɛ̀ títí fú ìwèrè yèé Ɔ̀ɖáyé kó nyà ɖíre fúnɛ ní ká nɛ́ àkaralé si ńǹtá-Yèésù Kírísítò#ɛ́ kó tó. 24 Ó ɖi, ɛkpa-Mɔ̀ɔ́sè#ɛ́ wà kíbí agbɛ̃́nɛ bɛ́, tsí ó wà gbɛ̃́ wa bɛ́ɛ̀ títí wáa fú ìwèrè yèé Kírísítò wáa tó#ɛ́. Tsí ó lɔ bɛ́ɛ̀, àtsùgbée bí àa nɛ́ àkaralé si ńǹtá-Kírísítò#ɛ́, Ɔ̀ɖáyé kó gbà wá nɔ́ɔ̀nyà-atsòtítɔ́ nódzú-ara‐ɛ̀. 25 Báàyí#ɛ́, ìwèrè yèé ǹ wà báfɔ̀#ɛ́, ìwèrè-ká nɛ́ àkaralé si ńǹtá-Kírísítò#ɛ́, ìwèrè#ɛ́ tó. Ó ɖi, agbɛ̃́nɛ#ɛ́ kò wà gbɛ̃́ wa ró.

26 Ìɖéǹɖè ni. Kíbí è nɛ́ àkaralé si ńǹtá-Yèésù Kírísítò#ɛ́, ɛ̀ŋɛ kpó, è dzɛ́ ɔma-Ɔ̀ɖáyé gbà ńǹtá-Yèésù Kírísítò#ɛ́. 27 Ó ɖi, kíbí à wìwɛ̀-Yèésù† fú ŋɛ́#ɛ́, è tse ɔ̀kã̀ntso bá Kírísítò si, tsí ńǹtsèntse-ŋɛ́ ŋa#á, è mú Kírísítò wɔ̀ si kíbí àwù bɛ́. 28 Ti nára-bɛ́ɛ̀#ɛ́, ìyàtɔ̀-kã̀ kpókpó kò wà ró. Ìyàtɔ̀ kò wà náàŋírĩ-ɔma-Ìyúɖà† òŋu ɛnɛ yèé kò dzɛ́ ɔma-Ìyúɖà#á ró. Ìyàtɔ̀ kò wà náàŋírĩ-arú òŋu ɛnɛ yèé wà nɔ́wɔ́-ara‐ɛ̀ si#ɛ́ gbo ró. Tsí ìyàtɔ̀ kò wà náàŋírĩ-ɔnɔkɛ̃̀ɛ̃ òŋu ɔnɔbɛ̃̀ɛ̃ gbo ró. Ó ɖi, ɛ̀ŋɛ kpó, è dzɛ́ ɔ̀nyà ɔ̀kã̀ntso bá Yèésù Kírísítò si ni. 29 Tsí kíbí è dzɛ́ ti Yèésù Kírísítò si#ɛ́, è dzɛ́ ɔmalɔ́ma-Àbàràhámì ŋa. Tsí àlé-iŋɛ́-ire yèé ŋa Ɔ̀ɖáyé ta si#ɛ́ ɖi tiŋɛ́.