Gàlátì ŋa 2

Kpɔ́lù kpàɖé bá adzítsɛ́-Yèésù ŋa ńYèrúsàlɛ́mì

Ɔɖɔ̃́ máàmɛ́ɛrɛ̃ náànyì-bɛ́ɛ̀ ró#ɛ́, èmi Bànàbá méèdzì àa wáa lɔ ńYèrúsàlɛ́mì. Tsí ǹ gbɛ̃́ Títò gbo tɛ̀ náànyì. 2 Ǹ lɔ bɛ̀, iŋɛ́ yèé tse#ɛ́, Ɔ̀ɖáyé nyàá ŋà mí ní èmi kó lɔ bɛ̀ ni. Kíbí ǹ lɔ#ɛ́, ǹ dzokó bá ɛnɛ yèé ŋa dzɛ́ ɔ̀nyà-gbadzúmà ŋa#á níìkã̀, tsí ikɔ̀ ɖíɖɔ̃̀ yèé ǹ wà dzɛ́ fúnɛ nérè-ɛnɛ yèé kò dzɛ́ ɔma-Ìyúɖà ŋa#á, ǹ nya òkpì-ikɔ̀ ɖíɖɔ̃̀ yèé ǹ wà dzɛ́#ɛ́ fú ŋa. Ó ɖi, ǹ wà sá ní itsɛ́ yèé ǹ wà tse báàyí#ɛ́ òŋu yèé ǹ ti tse wáa lɔ gbo#ɛ́, kó máa wáa dzɛ́ itsɛ́-akpotu. 3 Títò enìkéèdzì-mi yèé dzɛ́ ɔma-Gɛ̀rɛ́kì ŋa gìɖì#ɛ́, à kò dzɛ̃̀ŋù báa ní kó ɖákó† kíbí ó wà nórò-ɔma-Ìyúɖà† ŋa#á. 4 Ó ɖi, ɛnɛ yèé ŋa wà mú ara-ŋa kpe ìnàbí-wa olí-Yèésù ŋa#á òŋu, à sì wò bɛ́ɛ̀. À tsolè wɔ̀ náàŋírĩ-wa, tsí waà tsɔ́ wa wò nára-kíbí Yèésù Kírísítò gbà wá dzɔ̀ɔ́ nɔ́wɔ́-ɛkpa-Mɔ̀ɔ́sè†, tsí ó wà gbɛ̃́ wa gbo#ɛ́. À wà wo ká tse tsí àa kó sɛ̃̀ ɖi arú ɛkpa-Mɔ̀ɔ́sè#ɛ́ ró ni. 5 Ó ɖi, àtsùgbée ikɔ̀-òtítɔ́ ti nára-Yèésù kó wà si fú ŋɛ́#ɛ́, àa kò tì fú ɛnɛ ŋa#á nɔ́ɔ̀nà gìɖì fírífírí.

6 Ńbɛ̀ɛ́, à wà rí ɔ̀nyà kã̀ŋa ní à dzɛ́ ɔ̀nyà-gbadzúmà ŋa, tsí bí à sì dzɛ́ ɔ̀nyà lákṹ nódzú-ɔ̀nyà ŋa#á, kò tsi iŋɛ́ yèé à dzɛ́ wáa lɔ#ɛ́ ní kpã́dzú fú èmi#ɛ́, iŋɛ́ yèé tse#ɛ́, èmi ǹ dzɛ́ bɛ́, mà tse bɛ́, Ɔ̀ɖáyé òŋu kò ma nyɛ̀ŋɛ̀. Ɔ̀nyà-gbadzúmà ŋa#á, à kò sì mú ifɛ̀ɛ́nɔ́-kã̀ kpókpó má itsɛ́#ɛ́ fú mi. 7 Kà kàa bɛ́ɛ̀, à rí mà ní Ɔ̀ɖáyé mú itsɛ́-kã̀ bɔwɔ́-Òkúta ní kó wà dzíkɔ̀ ɖíɖɔ̃̀ fú ɔma-Ìyúɖà ŋa. Bɛ́ɛ̀ ké ní à rí mà ní Ɔ̀ɖáyé mú itsɛ́-kã̀ bɔwɔ́-èmi gbo ní èmi kó wà dzíkɔ̀ ɖíɖɔ̃̀ fú ɛnɛ yèé kò dzɛ́ ɔma-Ìyúɖà ŋa#á. 8 Ó ɖi, Ɔ̀ɖáyé ní fú Òkúta ńkpá ní kó ɖi adzítsɛ́-Yèésù† fú ɔma-Ìyúɖà ŋa#á, tsí ó fú èmi gbo ńkpá ní èmi kó ɖi adzítsɛ́-Yèésù fú ɛnɛ yèé kò dzɛ́ ɔma-Ìyúɖà ŋa#á. 9 Tsí Yàkúbù òŋu Òkúta má nára-Yòhánà†, àŋa ní wà kíbí kpàkàlà, tsí gba ɛgbɛ́-Kírísítò#ɛ́ ɖóro si#ɛ́, à rí mà ní Ɔ̀ɖáyé tse ore-ɔ̀fɛ́ fú mi, tsí mú itsɛ́#ɛ́ bɔwɔ́-mi, tsí à ta ɔwɔ́ bɔ̀ fú èmi Bànàbá méèdzì, tsí wà ń nyà ɖíre ní àŋa gbà si ńǹtá‐ɛ̀. Ó ɖi, Ɔ̀ɖáyé bɛ àwa òŋu làkóò ńɖi-ɛnɛ yèé kò dzɛ́ ɔma-Ìyúɖà ŋa#á, tsí ó bɛ àŋa gbo làkóò ńɖi-ɔma-Ìyúɖà ŋa. 10 Tsí iŋɛ́ yèé à wò ní àa kó tse#ɛ́ gé ní wà dzɛ́ ní: Àa kó wà tédzú olákèmà yèé ŋa wà nɛ́gbɛ́-Kírísítò ńYèrúsàlɛ́mì#ɛ́, tsí àa kó wà mɔ́wɔ́ gbè fú ŋa. Tsí mà sì tseé gbo bɛ́ɛ̀ nɔ́wɔ́ nɔ́wɔ́.

Kpɔ́lù wà bá Òkúta fɔ̀

11 Ńbɛ̀ɛ́, ó wáa ɖi ńǹwèrè-kã̀, tsí Òkúta wáa tó ńǹlú-Àntìyɔ́tsì ti ilɛ̀-Sìrí. Kíbí ó wá bɛ̀#ɛ́, ó lìlò kòdzɔkòdzɔ-kã̀, tsí ǹ kɔ̀ɔ́ fúu gãgã nódzú-ɔ̀nyà kpó. 12 Afɔ̀#ɛ́ ní wà dzɛ́ ní ɔ̀nyà kã̀ŋa ti ńɖi-Yàkúbù, tsí wá ńǹlú#ɛ́ bɛ̀. Tã́ná ɛnɛ nyɛ̀ŋɛ̀ ŋa ká wáa tó#ɛ́, Òkúta òŋu ìnàbí-wa olí-Yèésù yèé ŋa kò dzɛ́ ɔma-Ìyúɖà ŋa#á, à dzɔ́ wà dzɛŋɛ́. Ó ɖi, kíbí ɛnɛ ŋa#á wáa tó#ɛ́, Òkúta nya ɔwɔ́ ńdzídzɛ#ɛ́, tsí nya ara‐ɛ̀ si níìkã̀. Ó tse bɛ́ɛ̀, iŋɛ́ yèé tse#ɛ́, ó wà sá fú atɛ̀náànyì-Yèésù yèé ŋa wà fɔ̀ ní ká tɔ́ wà tsorò-ɔma-Ìyúɖà ŋa ró#ɛ́ ni. 13 Kíbí ó tsìyɛ̀ bɛ́ɛ̀#ɛ́, ɛnɛ yèé ŋa gbo wà bɛ̀, tsí dzɛ́ ɔma-Ìyúɖà† ŋa#á, àŋa gbo, à tsìyɛ̀ bɛ́ɛ̀ ké títí à sɔ́ Bànàbá gìɖì gbo si ńnɛ̀. 14 Ó ɖi, kíbí ǹ rí bɛ́ɛ̀#ɛ́, ǹ rí mà ní ìlò yèé à lò#ɛ́, kò ɖé bá ikɔ̀-òtítɔ́ ti Yèésù Kírísítò. Ńbɛ̀ɛ́, ǹ wí fú Òkúta nódzú-ɔ̀nyà kpó ní: Ìwɔ, ɔma-Ìyúɖà ní ò dzɛ́#ɛ́, tsí ìtsèntse‐ɛ̀ɛ sì wà kíbí ɛnɛ yèé kò dzɛ́ ɔma-Ìyúɖà#á. Kí tse tsí ò wà wo o mú ɛnɛ yèé kò dzɛ́ ɔma-Ìyúɖà ŋa#á ńkpá báàyí ní ká wà tsorò-ɔma-Ìyúɖà ŋa ni? Kò sã̀ nɛ́.

15 Ó ɖi àwa òŋu, ɔma-Ìyúɖà ŋa bíbí ní àa dzɛ́#ɛ́. Àa kò tsi ɔ̀nyà-ìlú-àledzò ŋa yèé kò wà rɛ̃̀ si nɛ́kpa-Ɔ̀ɖáyé#ɛ́. 16 Tsí àa mà ní kò tsi ɛnɛ yèé wà rɛ̃̀ si nɛ́kpa-Mɔ̀ɔ́sè†#ɛ́ ní Ɔ̀ɖáyé náa gbà nɔ́ɔ̀nyà-atsòtítɔ́ nódzú-ara‐ɛ̀#ɛ́. Ó ɖi, ɛnɛ yèé mú àkaralé‐ɛ̀ si ńǹtá-Yèésù Kírísítò#ɛ́ gé ní náa gbà nɔ́ɔ̀nyà-atsòtítɔ́ nódzú-ara‐ɛ̀#ɛ́. Náàtsùgbée bɛ́ɛ̀#ɛ́, àwa gbo, àa mú àkaralé-wa si ńǹtá-Yèésù Kírísítò, tsí Ɔ̀ɖáyé kó gbà wá nɔ́ɔ̀nyà-atsòtítɔ́ nódzú-ara‐ɛ̀. Tsí ó gbà wá bɛ́ɛ̀ ti nára-kíbí àa mú àkaralé-wa si ńǹtá-Yèésù Kírísítò#ɛ́ ni. Kò tsi àtsùgbée kíbí àa rɛ̃̀ si nɛ́kpa-Mɔ̀ɔ́sè#ɛ́ ní tse#ɛ́. Iŋɛ́ yèé tse#ɛ́, Ɔ̀ɖáyé kàkó nyáa gba ɔ̀nyà-kã̀ kpókpó nɔ́ɔ̀nyà-atsòtítɔ́ nódzú-ara‐ɛ̀ náàtsùgbée kíbí ó wà rɛ̃̀ si nɛ́kpa-Mɔ̀ɔ́sè#ɛ́. 17 Báàyí#ɛ́, kíbí àa mú àkaralé-wa si ńǹtá-Yèésù Kírísítò, tsí Ɔ̀ɖáyé kó gbà wá nɔ́ɔ̀nyà-atsòtítɔ́ nódzú-ara‐ɛ̀#ɛ́, à wà rí àwa gbo kíbí ɛnɛ yèé ŋa wà dzàbi-Ɔ̀ɖáyé#ɛ́. Tsí kíbí à wà rí wa bɛ́ɛ̀#ɛ́, ó wà nyà ɖíre ní Kírísítò wà sɔ́nɛ ní ká wà dzàbi-Ɔ̀ɖáyé ńnɛ̀ɛ́ nɔ̀. Láyé! Kírísítò kà tse bɛ́ɛ̀!

18 Ó ɖi, ɛkpa-Mɔ̀ɔ́sè yèé ǹ kɔ̀ dzɔ̀ɔ́#ɛ́, bí ǹ tɔ́ wà mú àkaralé si ńǹtá‐ɛ̀ ró#ɛ́, ó wà nyà ɖíre ní ǹ wà ɖáàbi fú ara tèmi ká-mi ńnɛ̀ɛ́. 19 Iŋɛ́ yèé tse#ɛ́, ǹ rí ní ɛkpa-Mɔ̀ɔ́sè kà sɔnɛ ɖi ɔ̀nyà-atsòtítɔ́ nódzú-Ɔ̀ɖáyé. Kíbí ǹ rí bɛ́ɛ̀#ɛ́, ó wà kíbí à kpa mí nóòkú báa ńǹrɔ́-kã̀ ńnɛ̀ɛ́, tsí ɛkpa#á kò nɛ́kpá si ńǹtá-mi ró. Iŋɛ́ ŋa#á lɔ bɛ́ɛ̀, àtsùgbée n wà náàyɛ̀ si nódzú-Ɔ̀ɖáyé. Ó ɖi, ńǹwèrè yèé à kã Yèésù Kírísítò si ńǹtá-egi-ìɖáàgàlàdzà†, tsí kpaá nóòkú#ɛ́, ó wà kíbí à kpa èmi gbo nóòkú báa ńǹrɔ́-kã̀ ńnɛ̀ɛ́. 20 Tsí kíbí ǹ wà náàyɛ̀ si#ɛ́, kò tsi èmi ká-mi ní wà gbɛ̃́ ara-mi ró#ɛ́. Ó ɖi, Kírísítò ní wà ńnɔ́-mi si, tsí wà gbɛ̃́ mi#ɛ́. Báàyí#ɛ́, ǹ wà náàyɛ̀ si ńǹtalɛ̀ bí. Ó ɖi, àyɛ̀#ɛ́ ti ńɖi-kíbí ǹ mú àkaralé-mi si ńǹtá-Ɔma bíbí-Ɔ̀ɖáyé#ɛ́ ni. Ɔma bíbí-Ɔ̀ɖáyé#ɛ́, ó nɛ́ àmúɖɔ̃̀ fú mi, tsí ó mú ara‐ɛ̀ tsɛbɔ néwo-mi. 21 Ńbɛ̀ɛ́, ǹ kò wà mú ore-ɔ̀fɛ́-Ɔ̀ɖáyé taánù. Ó ɖi, bí ɛkpa-Mɔ̀ɔ́sè nákó nyáa tse tsí Ɔ̀ɖáyé kó gbanɛ nɔ́ɔ̀nyà-atsòtítɔ́ nódzú-ara‐ɛ̀#ɛ́, à wà fɔ̀ ní ikú-Kírísítò dzɛ́ iŋɛ́-akpotu ńnɛ̀ɛ́.