Gàlátì ŋa 1

Ìwé fú ɛnɛ-Gàlátì ŋa

1-2 Èmi, Kpɔ́lù adzítsɛ́-Yèésù† òŋu ìnàbí-wa yèé ŋa kpó wà ńɖɔ̀-mi bí#ɛ́, àwa ní wà tse ìwé yèé bɛ́ fú ɛgbɛ́-Kírísítò yèé ŋa wà nérè-Gàlátì#ɛ́, àa wà kí ɛ̀ŋɛ kpó. Itsɛ́-adzítsɛ́-Yèésù#ɛ́, kò tsi ɔ̀nyà ní múu bɔwɔ́-mi#ɛ́, tsí kò tsi gbà ńǹtá-ɔ̀nyà-kã̀ kpókpó gbo ni. Ó ɖi, Yèésù† Kírísítò† òŋu Ɔ̀ɖáyé Boba, ɛnɛ yèé dzíi ti náàŋírĩ-òkú ŋa wá náyé#ɛ́, àŋa ní mú itsɛ́#ɛ́ bɔwɔ́-mi#ɛ́.

3 Ɔ̀ɖáyé Boba-wa òŋu Yèésù Kírísítò Ɔlá-wa méèdzì ká tse ore-ɔ̀fɛ́ fú ŋɛ́, tsí ká fú ŋɛ́ ńtútùúrɔ̀ gbo. 4 Yèésù Kírísítò#ɛ́ ní mú ara‐ɛ̀ sã́ã̀bi si nárũ-wa#á. Ó tse bɛ́ɛ̀, àtóoríi kó gbà wá dzɔ̀ɔ́ nɔ́wɔ́-ikpá-ayé-íbàɖí yèé àa wà si báàyí#ɛ́ ni. Bɛ́ɛ̀ ní Ɔ̀ɖáyé Boba-wa wò gbà#á. 5 Ká wà nyɛ̀ɛ́ títí lɔ náàrìtã́. Ɛ̀tsɛ.

Ikɔ̀ ɖíɖɔ̃̀-Yèésù#ɛ́, ìrɔ́ ɔ̀kã̀ntso gé ní wà#á

6 Ó mù mí héŋú ní kò gba ìwèrè-kã̀, tsí è wà nyí sɛ̃̀ náànyì-Ɔ̀ɖáyé, ɛnɛ yèé kpè ŋɛ́ ní ɛ̀ŋɛ kó gba ore-ɔ̀fɛ́-Kírísítò#ɛ́, tsí è wà gba ikɔ̀ ɖíɖɔ̃̀ òmírɛ̃̀ gbɔ́. 7 Ká fɔ̀ gìɖì#ɛ́, ikɔ̀ ɖíɖɔ̃̀ òmírɛ̃̀-kã̀ kpókpó kò wà. Ɔ̀nyà kã̀ŋa gé ní wà, tsí wà fɔ afɔ̀ kã̀ŋa, tsí wà ń ròmá ìsérè fú ŋɛ́#ɛ́. À wà wo ká nyí odzú-ikɔ̀ ɖíɖɔ̃̀-Kírísítò#ɛ́ ɖélɛ̀ ni. 8 Ó ɖi, kíbí ǹ wà fɔ̀ɔ́ yí, bí ɔ̀nyà-kã̀ wáa dzíkɔ̀ ɖíɖɔ̃̀ òmírɛ̃̀-kã̀ fú ŋɛ́, bí ó dzɛ́ àwa gìɖì gbo nàmí adzítsɛ́-ɔ̀rɔ̃†-kã̀ gìɖì ti ńǹgbèrí, bí ó wáa dzíkɔ̀ ɖíɖɔ̃̀ òmírɛ̃̀-kã̀ fú ŋɛ́, tsí ó gbà níìkã̀ fú yèé àa wáa dzɛ́ fú ŋɛ́#ɛ́, èhée fú ɛnɛ nyɛ̀ŋɛ̀. 9 Kíbí àa ti fɔ̀ɔ́ fú ŋɛ́ wáa lɔ#ɛ́, ǹ wà fɔ̀ɔ́ fú ŋɛ́ nɔ́mbɛ́ ró ní: Bí ɔ̀nyà-kã̀ wà dzíkɔ̀ ɖíɖɔ̃̀ òmírɛ̃̀-kã̀ fú ŋɛ́, tsí ó gbà níìkã̀ fú yèé àa wáa dzɛ́ fú ŋɛ́, tsí è gbàá#á, èhée fúu.

10 Kíbí ǹ wà fɔ̀ bɛ́ɛ̀#ɛ́, kò tsi ní ǹ wà wo n dzɔdzú-ɔ̀nyà ŋa ni nɛ́. Ɔ̀ɖáyé ní ǹ wà wo n dzɔdzú#ɛ́. Tsí ǹ kò sì wà wo n mú ara-mi tse ɔ̀nyà-ire nódzú-ɔ̀nyà ŋa gbo nɛ́. Ó má dzɛ́ bɛ́ɛ̀ ní ǹ wà wo n tse#ɛ́, ǹ kàá nyáa dzɛ́ àtsìtsɛ́-Kírísítò.

Ɔ̀ɖáyé tsã Kpɔ́lù ní kó dzɛ́ adzítsɛ́-òŋu

11 Ìnàbí ŋa, ǹ wà wò ní kó yé ŋɛ́ ní ikɔ̀ ɖíɖɔ̃̀ yèé ǹ wáa dzɛ́ fú ŋɛ́#ɛ́, kò ti ńɖi-ɔ̀nyà ŋa. 12 Ó ɖi èmi òŋu, kò tsi ɔ̀nyà-kã̀ ní múu bɔwɔ́-mi#ɛ́, tsí ǹ kò gba ɛ̀kɔ́‐ɛ̀ ti ńɖi-ɔ̀nyà-kã̀ kpókpó gbo. Ó ɖi, Yèésù Kírísítò òŋu ká‐ɛ̀ ní nyàá ɖíre fú mi#ɛ́.

13 È ma kíbí ǹ gbé gbà dzɔ̀ɔ́ dzɔ̀ɔ́ ńǹwèrè yèé ǹ wà tsorò-ɔma-Ìyúɖà† ŋa#á. Mà múgírí si kũkũ, tsí wà tsoró bá ɛgbɛ́-Kírísítò ŋa, tsí mà wò ní ká ra kpó múnúmúnú. 14 Ńǹwèrè nyɛ̀ŋɛ̀#ɛ́, ǹ kà dzɛ́ ńǹɖì-orò-ɔma-Ìyúɖà ŋa gìɖì. Mà tseé láre ɔdzɔ́ɔ̀gbà-mi ɔma-Ìyúɖà ŋa. Ara-mi náa gboná si ńnɛ̀, tsí mà wà ɖu orò-gbágbóǹgbàgbò-mi ŋa tó bɛ́ɛ̀.

15 Ó ɖi, Ɔ̀ɖáyé ti tsã̀ mí si títí ńnɔ́-ìnà-mi ni. Tsí ó kpè mí ní n dzɛ́ tɛ̀ɛ̀ si gbà ńǹtá-ore-ɔ̀fɛ́‐ɛ̀. 16 Tsí ó ɖi nɔ́dzɔ́-kã̀, tsí ó dzɔdzú‐ɛ̀, tsí ó nya Yèésù Ɔma bíbí‐ɛ̀ ŋà mí. Ó tse bɛ́ɛ̀, àtsùgbée n lɔ káà dzíkɔ̀‐ɛ̀ fú ɛnɛ yèé kò dzɛ́ ɔma-Ìyúɖà ŋa#á ni. Kíbí iŋɛ́ ŋa#á lɔ bɛ́ɛ̀#ɛ́, ǹ kò gba ifɛ̀ɛ́nɔ́ ti ńɖi-ɔ̀nyà-kã̀ kpókpó, 17 tsí ǹ kò sì lɔ ńYèrúsàlɛ́mì ńɖi-adzítsɛ́-Yèésù† ŋa#á gbo. À ti dzɛ́ adzítsɛ́-Yèésù bɔ̀ fú mi. Ó ɖi, gbòkã́ gé#ɛ́, ǹ ǹɖe, tsí lɔ ńlɛ̀-Àrábì, tsí ǹ sɛ̃̀ bɔ̀ wáa lɔ ńǹlú-Ɖàmásì.

18 Ɔɖɔ̃́ mɛ́ɛta náànyì-bɛ́ɛ̀#ɛ́, ǹ lɔ ńYèrúsàlɛ́mì, tsí káà rí Òkúta.^* Tsí ǹ gbé bɛ̀, tsí tse ɔdzɔ́ mɛ́ɛɖógú ńɖɔ̀‐ɛ̀. 19 Ńǹwèrè nyɛ̀ŋɛ̀#ɛ́, odzú-mi kò kã adzítsɛ́-Yèésù òmírɛ̃̀-kã̀ kpókpó ró náànyì-Yàkúbù ìnàbí-Yèésù Ɔlá-wa. 20 Afɔ̀ yèé ŋa ǹ wà kɔ si ńǹwé fú ŋɛ́ bɛ́#ɛ́, ǹ wà fɔ̀ɔ́ nódzú-Ɔ̀ɖáyé ní ǹ kò wà tsòɖòbò. Afɔ̀-òtítɔ́ ni.

21 Náànyì-bɛ́ɛ̀ ró#ɛ́, ǹ lɔ ńlɛ̀-Sìrí òŋu ńlɛ̀-Sìlíkì. 22 Ńǹwèrè nyɛ̀ŋɛ̀#ɛ́, ɔma-ɛgbɛ́-Kírísítò yèé ŋa wà nérè-Yùɖéyà ŋa#á, àŋa gbo, à kò rí mi wòrí. 23 Ó ɖi, iŋɛ́ yèé à náa wà gbɔ́ ti nára-mi#ɛ́ gé ní dzɛ́ ní: Idza yèé náa wà tsoró bá àŋa dzɔ̀ɔ́ dzɔ̀ɔ́#ɛ́ fe, báàyí#ɛ́, ó wà dzíkɔ̀ ɖíɖɔ̃̀ fúnɛ, ikɔ̀ yèé àa gbà gbɔ́, tsí òŋu ká‐ɛ̀ wò ní òŋu kó bàdzɛ́ dzɔ̀ɔ́ dzɔ̀ɔ́#ɛ́. 24 Tsí kíbí olí-Yèésù ŋa náa wà gbɔ́ bɛ́ɛ̀#ɛ́, à náa wà nyɛ Ɔ̀ɖáyé fú iŋɛ́ yèé ŋa ó tse fú mi#ɛ́.