1 Kòríntì ŋa 3

Kpɔ́lù wà nya òkpì-itsɛ́-adzítsɛ́-Yèésù ŋa

Ìnàbí-mi ŋa, ǹ kò nyáa wíìnyɛ̀ fú ŋɛ́ ńǹrɔ́-kíbí à náa wíìnyɛ̀ fú ɛnɛ yèé ŋa Mímí-Ɔ̀ɖáyé† wà gbɛ̃́#ɛ́. Ǹ wíìnyɛ̀ fú ŋɛ́ ńǹrɔ́-kíbí à náa wíìnyɛ̀ fú ɔ̀nyà-ayé yèé ŋa#á gé ni. Ǹ wíi fú ŋɛ́ ńǹrɔ́-kíbí à náa wíìnyɛ̀ fú ɛnɛ yèé kò ɖonùgbó ńKírísítò sísɛ̃̀ ŋa#á. Ɔma nɔ́wɔ́ ŋa ní è dzɛ́#ɛ́. 2 Afɔ̀ yèé ǹ fɔ̀ fú ŋɛ́#ɛ́ wà kíbí omi-ɔmɔ́ ní ǹ fú ŋɛ́, tsí è mɔ#ɛ́. Kò tsi dzídzɛ òŋu ká‐ɛ̀ ní ǹ fú ŋɛ́, tsí è dzɛ#ɛ́. Iŋɛ́ yèé tse#ɛ́, è kè tóòsũ̀-e dzɛ dzídzɛ òŋu ká‐ɛ̀ wòná. Tsí báàyí gìɖì gbo#ɛ́, è kè tóòsũ̀-e nyáa dzɛɛ́ gé ní ó dzɛ́#ɛ́. 3 Iŋɛ́ yèé tse#ɛ́, kíbí ɔ̀nyà yà gbà#á, ńǹgbèngbé-ìrɔ́-bɛ́ɛ̀ ní è tɔ́ wà si ró#ɛ́. È wà dzowú-ara-ŋɛ́ ŋa, tsí wà rã́ã̀rã̀ gbo. Kíbí è wà tse bɛ́ɛ̀#ɛ́, ó wà nyà ɖíre ní kíbí ɔ̀nyà yà gbà#á, ńǹgbèngbé‐ɛ̀ ní è tɔ́ wà si ró#ɛ́. Kíbí ɔ̀nyà-ayé yèé ŋa náa gbé gbà#á, bɛ́ɛ̀ ní è wà gbé#ɛ́. 4 Ɔ̀nyà kã̀ŋa wà náàŋírĩ-ŋɛ́, tsí wà fɔ̀ ní: Náànyì-Kpɔ́lù ní àŋa wà#á. Tsí ɔ̀nyà kã̀ŋa gbo wà fɔ̀ ní: Náànyì-Àkpòlósì ní àŋa òŋu, àŋa wà#á. Ńǹwèrè yèé è wà wí bɛ́ɛ̀ gé#ɛ́, ó wà nyà ɖíre ní ìgbèngbé-ŋɛ́ wà kíbí ti ɔ̀nyà-ayé yèé ŋa ńnɛ̀ɛ́.

5 Ǹ ní fòò, kí Àkpòlósì dzɛ́? Tsí èmi, Kpɔ́lù gbo fe, kí ǹ dzɛ́? Àtsìtsɛ́-Ɔ̀ɖáyé ŋa gé ní àa dzɛ́#ɛ́ nɔ̀. Tsí gbà ńǹtá-wa ní è gba Ɔlá-wa gbɔ́#ɛ́. Tsí itsɛ́ yèé ó ɖá bɔwɔ́-wa#á, kṹnukṹ tse tɛ̀ɛ̀ ńǹrɔ́-kíbí ó ɖíreé fúu ní kó tseé gbà#á ni. 6 Ó ɖi, itsɛ́ yèé àa tse#ɛ́ wà kíbí ɛnɛ yèé fɔ̀ ní ǹ gbɛ̃ ɔma-dzídzɛ, tsí Àkpòlósì òŋu wáa tsomi fɔ̃́ɔ̃ bɛ́. Ó ɖi, Ɔ̀ɖáyé ní tse tsí ó wù, tsí ó wà ɖonùgbó#ɛ́. 7 Ńbɛ̀ɛ́, ɛnɛ yèé gbɛ̃ dzídzɛ#ɛ́ gbo, ɛnɛ yèé tsomi fɔ̃́ɔ̃#ɛ́ gbo, à kò dzɛ́ iŋɛ́-kã̀ kpókpó. Ó ɖi, Ɔ̀ɖáyé, ɛnɛ yèé tse tsí dzídzɛ#ɛ́ wù, tsí wà ɖonùgbó#ɛ́, òŋu ní kpã́dzú#ɛ́. 8 Ó ɖi, ɛnɛ yèé gbɛ̃ ɔma-dzídzɛ#ɛ́ òŋu ɛnɛ yèé tsomi fɔ̃́ɔ̃#ɛ́, ɔ̀nyà ɔ̀kã̀ntso ní àŋa kpó, à dzɛ́#ɛ́. Tsí Ɔ̀ɖáyé nákó sã owó fú kṹnukṹ òŋu tɛ̀ɛ̀ fú itsɛ́ yèé ó tse#ɛ́. 9 Iŋɛ́ yèé tse#ɛ́, àa dzɔ́ wà tsitsɛ́#ɛ́ má náàdzɔ́ bá Ɔ̀ɖáyé ni. Tsí ɛ̀ŋɛ òŋu, è wà kíbí oko-Ɔ̀ɖáyé bɛ́. Tsí è wà kíbí ilé‐ɛ̀ gbo. 10 Tsí ore-ɔ̀fɛ́ ìmarũ yèé Ɔ̀ɖáyé fú mi#ɛ́, ǹ ń tsitsɛ́, tsí kpilɛ ilé#ɛ́ si. Ǹ kpilɛ ilé#ɛ́ kíbí amalé olí-ifɛ̀ɛ́nɔ́-kã̀ bɛ́ ni. Tsí olòmírɛ̃̀ wá, tsí wáa kpé élè míma si ńǹtá‐ɛ̀ làkóò. Ó ɖi, ɔ̀nyà ɔ̀kã̀lɔ́ɔ̀kã̀ kpó yèé wà tsitsɛ́#ɛ́ làkóò#ɛ́, kṹnukṹ kó wà tsɔ́ éwo-ara‐ɛ̀ rere ńǹrɔ́-kíbí ó wà malé#ɛ́ gbà#á. 11 Iŋɛ́ yèé tse#ɛ́, ɔ̀nyà-kã̀ kpókpó kàkó nyáa kpilɛ ilé òmírɛ̃̀ ró náànyì yèé wà si#ɛ́. Yèésù Kírísítò òŋu níìkã̀ntso gé ní dzɛ́ òkpì-ilé#ɛ́. 12 Ó ɖi fee, àtsìtsɛ́ kã̀ŋa wà, tsí à nákó lo iŋɛ́ rere ŋa, tsí ń malé#ɛ́. À nákó lo siká òŋu irɛ̃-ɛ̀fɛ́ má nára-òkúta-ɛ̀fɛ́ ŋa gbo, tsí ń malé#ɛ́. Tsí àtsìtsɛ́ kã̀ŋa gbo wà#á, iŋɛ́ yèé kà kpɛ̃́ tã́ná bàdzɛ́ ŋa#á ní àŋa òŋu, à nákó lò#ɛ́. À nákó lo egi òŋu bɛlɛ má nára-ìgã́ gbo, tsí ń malé#ɛ́. 13 Ó ɖi, itsɛ́ yèé kṹnukṹ tse#ɛ́ nákó kí ńgbaŋgba, tsí nɔ́dzɔ́-ɛdzɔ́ kpíkpè-Ɔ̀ɖáyé#ɛ́, ɔ̀nyà kpó nákó ríi. Nɔ́dzɔ́ nyɛ̀ŋɛ̀#ɛ́, iná-kã̀ nákó wà, tsí itsɛ́-kṹnukṹ nákó gbà ńnɛ̀, tsí iná#á nákó tse tsí ɛ̀fɛ́ yèé itsɛ́-kṹnukṹ nɛ́#ɛ́, nákó nyàá ɖíre fúnɛ. 14 Tsí itsɛ́ yèé kṹnukṹ nákó tse#ɛ́, bí iná kũ ti ɔ̀nyà-kã̀, tsí kò dzoná ná, ɛnɛ nyɛ̀ŋɛ̀ nákó gba èrè-itsɛ́‐ɛ̀. 15 Ó ɖi, bí itsɛ́-ɔ̀nyà-kã̀ gbà ńná#á, tsí tɛ̀ɛ̀ dzoná ná, ɛnɛ nyɛ̀ŋɛ̀ òŋu sɔ̃ ɛ̀kpà, tsí mɔ́wɔ́ kó abu‐ɛ̀ ńnɛ̀ɛ́. Ɔ̀ɖáyé nákó gbàá là òŋu yá. Ó ɖi, nákó wà kíbí à náa bɔ́ nárũ-iná, tsí à kà kí ńnɛ̀ bɛ́#ɛ́ ni.

16 Fee, ilé-Ɔ̀ɖáyé† ní è dzɛ́#ɛ́, tsí Mímí-Ɔ̀ɖáyé gbo wà ńnɔ́-ŋɛ́ si. È kè mà bɛ́ɛ̀ niì? 17 Bí ɔ̀nyà-kã̀ fɔ́ ilé-Ɔ̀ɖáyé, Ɔ̀ɖáyé gbo nákó tse tsí ɛnɛ nyɛ̀ŋɛ̀ nákó tsɛ̀rá. Iŋɛ́ yèé tse#ɛ́, ilé-Ɔ̀ɖáyé#ɛ́ dzɛ́ tòŋu ká‐ɛ̀ kpó akpá akpá, ɛsɛ̀ ɛsɛ̀ ni. Tsí ɛ̀ŋɛ ní dzɛ́ ilé-Ɔ̀ɖáyé#ɛ́.

18 Ɔ̀nyà-kã̀ kpókpó kó máa wà rú ara‐ɛ̀. Bí ɔ̀nyà-kã̀ wà náàŋírĩ-ŋɛ́, tsí wà rí ara‐ɛ̀ ní òŋu dzɛ́ olí-ifɛ̀ɛ́nɔ́ ńǹrɔ́-kíbí ɔ̀nyà-ayé yèé ŋa náa módzú kpũ̀rã̀ã́ gbà#á, ɛnɛ nyɛ̀ŋɛ̀ kó ɖà kíbí éwo kò wà fúu bɛ́, àtsùgbée kó nyáa ɖi olí-ifɛ̀ɛ́nɔ́ ìɖéǹɖè. 19 Ǹ fɔ̀ bɛ́ɛ̀, iŋɛ́ yèé tse#ɛ́, ifɛ̀ɛ́nɔ́ ti ɔ̀nyà-ayé yèé ŋa dzɛ́ iŋɛ́-éwo kò sí fúnɛ nódzú-Ɔ̀ɖáyé. Ó ɖi, à ti kɔɔ́ si ńǸwé-Ɔ̀ɖáyé† si ní: “Ɔgbɔ̃́ yèé olí-ifɛ̀ɛ́nɔ́ ŋa náa ɖá#á, ńbɛ̀ ní Ɔ̀ɖáyé náa gbà, tsí mú àŋa ká-ŋa#á.”^* 20 À tɔ́ kɔɔ́ si ńǸwé-Ɔ̀ɖáyé#ɛ́ si ró ní: “Ɔlɔ́dzɔ́ ma ìsérè yèé ŋa wà néwo fú olí-ifɛ̀ɛ́nɔ́ ŋa#á. Ó mà ní ìsérè-ŋa dzɛ́ iŋɛ́-akpotu.”^* 21 Ńbɛ̀ɛ́, kò wà ní ɔ̀nyà-kã̀ kpókpó kó wà tɛ̀ náànyì-ɔ̀nyà-kã̀, tsí wà ń nya akpá. Iŋɛ́ yèé tse#ɛ́, iŋɛ́-ɔ̀kã̀lɔ́ɔ̀kã̀ kpó#ɛ́, tiŋɛ́ ní à dzɛ́ si#ɛ́. 22 Kpɔ́lù#ɛ́ gbo, Àkpòlósì#ɛ́ gbo, Òkúta#á gbo, iŋɛ́ yèé wà ńǹtalɛ̀ bí ŋa#á gbo, àyɛ̀ gbo, ikú gbo, iŋɛ́ yèé ŋa wà si báàyí#ɛ́ gbo, iŋɛ́ yèé ŋa bàkó wáa wá náànyìwà#á gbo, àŋa kpó#ɛ́, tiŋɛ́ ní à dzɛ́ si#ɛ́. 23 Tsí ɛ̀ŋɛ òŋu, è dzɛ́ ti Kírísítò, tsí Kírísítò gbo dzɛ́ ti Ɔ̀ɖáyé.