Ikpá-Ɔ̀ɖáyé ní Kpɔ́lù wà ń dzíkɔ̀-Yèésù Kírísítò#ɛ́
2
Ìnàbí-mi ŋa, ńǹwèrè yèé èmi gbo ǹ wá ńɖi-ŋɛ́, tsí wáa dzíkɔ̀ ti nára-ètò yèé Ɔ̀ɖáyé tse ɖúkù si dzɔ̀ɔ́ dzɔ̀ɔ́#ɛ́ fú ŋɛ́#ɛ́,* ǹ kò ɖɔ̃ arũ fú ŋɛ́, tsí wíìnyɛ̀ ńfɛ̀ɛ́nɔ́-ɔ̀nyà. 2 Iŋɛ́ yèé tse#ɛ́, ńǹwèrè yèé ǹ wá ńɖi-ŋɛ́#ɛ́, ó tã́ ńnɔ́-mi kpó ní ǹ kàkó wíìnyɛ̀-kã̀ kpókpó náànyì-afɔ̀-Yèésù Kírísítò òŋu ikú yèé ó kú si ńǹtá-egi-ìɖáàgàlàdzà†#á. 3 Tsí kíbí ǹ wà ńɖi-ŋɛ́ si#ɛ́, àmí-kã̀ kpókpó kò wà nɔ́wɔ́-mi, tsí odzo gbo náa wà tse mí, tsí mà wà ŋá kpó kpàkpàkpà. 4 Tsí bí ǹ wà dzíkɔ̀#ɛ́ fú ŋɛ́#ɛ́, ǹ kà fɔ̀ɔ́ ń ti arũ ɖíɖɔ̃̀ nàmí ńfɛ̀ɛ́nɔ́ ti ɔ̀nyà-ayé yèé ŋa. Ikpá-Mímí-Ɔ̀ɖáyé† ní náa wà nya iŋɛ́ yèé mà fɔ̀ ŋa#á ɖíre ní òtítɔ́ ní ǹ wà fɔ̀#ɛ́. 5 Ǹ tse bɛ́ɛ̀, àtsùgbée e máa wà karalé si ńǹtá-ifɛ̀ɛ́nɔ́-ɔ̀nyà. Ó ɖi, e wà karalé si ńǹtá-ikpá-Ɔ̀ɖáyé.Kpɔ́lù wà nya òkpì-ifɛ̀ɛ́nɔ́-Ɔ̀ɖáyé fúnɛ
6 Fee, ifɛ̀ɛ́nɔ́-kã̀ wà, tsí ikɔ̀-ifɛ̀ɛ́nɔ́ nyɛ̀ŋɛ̀ ní àa wà dzɛ́ fú ɛnɛ yèé ŋa àkaralé-ŋa ti ɖonùgbó nɔ́Ɔ̀ɖáyé sísɛ̃̀#ɛ́. Ifɛ̀ɛ́nɔ́ nyɛ̀ŋɛ̀#ɛ́ kò ti ńɖi-ɔ̀nyà-ayé yèé ŋa. Kò ti ńɖi-ɛnɛ yèé ŋa dzɛ́ olí-ikpá ńǹtalɛ̀ bí#ɛ́ gbo. Olí-ikpá nyɛ̀ŋɛ̀ ŋa bòkó wáa tsɛ̀rá kpó. 7 Àwa òŋu, ifɛ̀ɛ́nɔ́-Ɔ̀ɖáyé yèé ó ti tse ɖúkù si#ɛ́ ní àa wà dzɛ́ fúnɛ#ɛ́. Ó ti tsifɛ̀ɛ́nɔ́#ɛ́ ɖúkù si títí ńǹkpìnkpìlɛ̀-ayé#ɛ́ ni. Títí ńǹwèrè nyɛ̀ŋɛ̀#ɛ́, ó ti tsúwádzú tseé si bɛ́ɛ̀ fú wa, tsí kó dzɛ́ ɔ̀nà-kã̀ yèé nákó gbà, tsí wáa mú iyì‐ɛ̀ bɔwɔ́-wa#á ni. 8 Ɛnɛ yèé ŋa dzɛ́ olí-ikpá ńǹtalɛ̀ bí#ɛ́-kã̀ kpókpó kò gbɔ́ òkpì-ifɛ̀ɛ́nɔ́-Ɔ̀ɖáyé#ɛ́. À má gbɔ́ òkpì‐ɛ̀, à kàá kã Ɔlá-wa, ɛnɛ yèé dzɛ́ olí-iyì#ɛ́ si ńǹtá-egi-ìɖáàgàlàdzà†. 9 Tsí ńǹrɔ́-bɛ́ɛ̀ ní à ti kɔɔ́ si ńǸwé-Ɔ̀ɖáyé† si ní:
“Iŋɛ́-kã̀ wà, tsí odzú-ɔ̀nyà kò kã̀ã́ wòrí.
Etí-ɔ̀nyà kò gbɔ́ɔ gbo wòrí.
Ɔ̀nyà kò tì tsèsérè ti nára‐ɛ̀ gìɖì gbo wòrí.
Iŋɛ́#ɛ́ ní Ɔ̀ɖáyé wà kpaɖí si fú ɛnɛ yèé ŋa náa nɛ́ àmúɖɔ̃̀ fúu#ɛ́.”*
10 Àwa òŋu, Ɔ̀ɖáyé sì nyàá ɖíre fú wa. Ó gbà ńǹtá-Mímí‐ɛ̀, tsí nyàá ɖíre fú wa ni. Mímí-Ɔ̀ɖáyé#ɛ́ náa ma iŋɛ́-ɔ̀kã̀lɔ́ɔ̀kã̀ kpó. Ó ma kíbí Ɔ̀ɖáyé nɔnɔ̀ tó gbà#á gìɖì gbo. 11 Fee, nɛ̀ɛ́ wà, tsí kó nyáa minɔ́-ɔ̀nyà? Ɔ̀nyà òŋu ká‐ɛ̀ gé ní náa minɔ́-ara‐ɛ̀#ɛ́. Bɛ́ɛ̀ ké ní ɔ̀nyà-kã̀ gbo kò wà, tsí kó nyáa minɔ́-Ɔ̀ɖáyé#ɛ́ ńnɛ̀ɛ́. Mímí-Ɔ̀ɖáyé gbo gé ní náa minɔ́-Ɔ̀ɖáyé#ɛ́. 12 Àwa òŋu, kò tsi iŋɛ́ yèé wà gbɛ̃́ ɔ̀nyà-ìtalɛ̀ bí ŋa#á ní tì wɔ̀ ńǹtá-wa#á. Mímí-Ɔ̀ɖáyé òŋu ká‐ɛ̀ gìɖì gìɖì ní tì wɔ̀ ńǹtá-wa#á. Ó tì wɔ̀ ńǹtá-wa bɛ́ɛ̀, àtsùgbée àa kó nyáa ma iŋɛ́-ire yèé ó fú wa ŋa#á ni. 13 Tsí bí àa wà wíìnyɛ̀ ti nára-iŋɛ́-ire nyɛ̀ŋɛ̀ ŋa#á, àa kà lo ifɛ̀ɛ́nɔ́-ɔ̀nyà, ifɛ̀ɛ́nɔ́ yèé ɔ̀nyà òŋu ká‐ɛ̀ náa ń tsɛ̀kɔ́ fúnɛ fú ara‐ɛ̀ gé#ɛ́. Àa náa wà fɔ̀ɔ́ ńǹrɔ́-kíbí Mímí-Ɔ̀ɖáyé òŋu ká‐ɛ̀ náa wà kɔ́ wa gbà#á ni. Ńbɛ̀ɛ́, Mímí-Ɔ̀ɖáyé#ɛ́ náa wà ńǹtá-wa si, tsí àa náa wà fɔ̀ɔ́, tsí wà nya òkpì‐ɛ̀ nóŋù yèé Mímí-Ɔ̀ɖáyé#ɛ́ òŋu ká‐ɛ̀ náa fú wa ŋa#á ni. 14 Ó ɖi fee, bí Mímí-Ɔ̀ɖáyé kò wà ńǹtá-ɔ̀nyà-kã̀, ɛnɛ nyɛ̀ŋɛ̀ kà gba iŋɛ́ yèé ŋa náa ti ńɖi-Mímí-Ɔ̀ɖáyé#ɛ́. Iŋɛ́ yèé tse#ɛ́, nódzú tɛ̀ɛ̀ òŋu, iŋɛ́ nyɛ̀ŋɛ̀ ŋa ni iŋɛ́-akpotu ni. Kà nyáa gbɔ́ òkpì‐ɛ̀ gìɖì gbo. Mímí-Ɔ̀ɖáyé òŋu níìkã̀ntso gé ní náa mɔ́wɔ́ gbè fúnɛ, tsí à náa nyáa gbɔ́ òkpì‐ɛ̀#ɛ́. 15 Ó ɖi, bí ɔ̀nyà-kã̀ wà, tsí Mímí-Ɔ̀ɖáyé wà ńǹtá‐ɛ̀ si#ɛ́, ɛnɛ nyɛ̀ŋɛ̀ nákó nyáa gbɔ́ òkpì-iŋɛ́ ɔ̀kã̀lɔ́ɔ̀kã̀ kpó. Ó ɖi, bí ɔ̀nyà-kã̀ wà, tsí Mímí-Ɔ̀ɖáyé kò wà ńǹtá‐ɛ̀, kàkó nyáa gbɔ́ òkpì-ɛnɛ yèé Mímí-Ɔ̀ɖáyé wà ńǹtá‐ɛ̀#ɛ́. 16 Iŋɛ́ yèé tse#ɛ́, à kɔɔ́ si ńǸwé-Ɔ̀ɖáyé si ní:
“Nɛ̀ɛ́ wà, tsí kó nyáa ma ìsérè-Ɔlɔ́dzɔ́?
Ɔ̀nyà-kã̀ kò wà gbo, tsí kó nyáa fúu ńfɛ̀ɛ́nɔ́.”*
Ó ɖi, àwa òŋu fee, àa náa tsèsérè kíbí Kírísítò náa tsèsérè gbà#á ni.