Itsɛ́ 2

Mímí-Ɔ̀ɖáyé tì wɔ̀ ńǹtá-atɛ̀náànyì-Yèésù ŋa

Ó ɖi nɔ́dzɔ́-kã̀, tsí ɔma-Ìyúɖà† ŋa wà dzɛ ɔɖɔ̃́-kã̀. À náa kpe ɔɖɔ̃́#ɛ́ ní ɔɖɔ̃́-Dzídzɛ titɔ̃†. Ńbɛ̀ɛ́, atɛ̀náànyì-Yèésù ŋa kpérí má náàdzɔ́, tsí wà ńnɔlé-kã̀ si. 2 Gbòkã́#á, igbe lákṹ-kã̀ ti nɔ́ɔ̀rɔ̃. Igbe#ɛ́ wà ɖɔ̃́ kíbí awu lákṹ-kã̀ náa wà tse bɛ́#ɛ́, tsí igbe#ɛ́ gba ilé#ɛ́ ńbí à wà si#ɛ́ kpó. 3 Tsí à wà rí iŋɛ́ kã̀ŋa, tsí iŋɛ́ ŋa#á dzɔ kíbí à náa tɔ́ná, tsí arũ‐ɛ̀ náa wà gbã̀ tsóróó bɛ́#ɛ́. Tsí iŋɛ́ ŋa#á kpɛ̃́, tsí ɖi kpíkpɔ̀, tsí wà dzì ńǹtá-ɔ̀nyà kã̀kã̀ kpó. 4 Gbòkã́ gé#ɛ́, Mímí-Ɔ̀ɖáyé† tì wɔ̀ ńǹtá-ŋa kpó, tsí à kpé ìlú-òmírɛ̃̀ ŋa wíwí, ìlú yèé ŋa Mímí-Ɔ̀ɖáyé fú ŋa ńkpá ní ká wí#ɛ́.

5 Ńbɛ̀ɛ́, ɔma-Ìyúɖà yèé ŋa náa nɛ́ àrísá fú Ɔ̀ɖáyé#ɛ́, tsí ti ńǹlú ńǹlú ŋa náyé gbaŋgba#á kpó, tsí wáa kí ńYèrúsàlɛ́mì si#ɛ́, 6 kíbí à gbɔ́ igbe-ɔ̀nyà ŋa#á bɛ́ɛ̀#ɛ́, àŋa kpó, à wá, tsí wáa kpérí, tsí ɛnɛ kṹnukṹ wà gbɔ́ ìlú‐ɛ̀ nárũ-atɛ̀náànyì-Yèésù ŋa. Ńbɛ̀ɛ́, àŋa kpó, ó mù ŋá, tsí à kò ma bí ká tse fáà gìɖì. 7 Tsí ó mù ŋá si, tsí láre arũ fú ŋa, tsí à wà fɔ̀ ní: Ɛnɛ yèé ŋa wà wíìnyɛ̀ bɛ́#ɛ́, ɛnɛ-ɔwɔ́-Gàlìlé ŋa ni nɔ̀. 8 Bí à tse fáà títí wà wí ìlú-ɛnɛ-kṹnukṹ fúu bɛ́ɛ̀? 9 Náàŋírĩ-àŋa#á, ɔ̀nyà kã̀ŋa ti ńlɛ̀-Kpárítì, tsí ɔ̀nyà kã̀ŋa gbo ti nérè-Mɛ̀ɖíyà, tsí ɔ̀nyà kã̀ŋa gbo ti ńǹlú-Èlámì, tsí ɔ̀nyà kã̀ŋa gbo ti ńlɛ̀-Mɛ̀sòkpòtámì, tsí ɔ̀nyà kã̀ŋa gbo ti nérè-Yùɖéyà, tsí ɔ̀nyà kã̀ŋa gbo ti ńlɛ̀-Kàkpàɖɔ́kì, tsí ɔ̀nyà kã̀ŋa gbo ti nérè-Kpɔ̃́tì, tsí ɔ̀nyà kã̀ŋa gbo ti ńlɛ̀-Àsíyà, 10 tsí ɔ̀nyà kã̀ŋa gbo ti nérè-Fìrìdzí, tsí ɔ̀nyà kã̀ŋa gbo ti ńlɛ̀-Kpã̀fílì, tsí ɔ̀nyà kã̀ŋa gbo ti ńlɛ̀-Èdzíkpítì† òŋu nérè-Líbì sɔ́má-ìlú-Sìrɛ́nì. Tsí ɔ̀nyà kã̀ŋa gbo ti ńǹlú-Rómà†, 11 tsí ɔ̀nyà kã̀ŋa gbo ti ńlɛ̀-Kɛ̀rɛ́tì òŋu ńlɛ̀-Àrábì. Tsí ɔma-Ìyúɖà ŋa òŋu ɛnɛ yèé wà tsorò-ɔma-Ìyúɖà ŋa#á gbo wà náàŋírĩ-ŋa. Tsí àŋa kpó, àŋa wà gbɔ́ kíbí à wà wí ìlú-kṹnukṹ fúu, tsí wà wíìnyɛ̀ ti nára-iŋɛ́ lákṹ lákṹ yèé Ɔ̀ɖáyé tse ŋa kpó#ɛ́.

12 Tsí ó mù ŋá si, tsí à kò tì ma ìsérè yèésí ká tse ró. Tsí à wà bere ara-ŋa ní: Òkpì-iŋɛ́ yèé àŋa wà gbɔ́ bɛ́ ŋa#á fáà?

13 Ó ɖi, ɔ̀nyà kã̀ŋa wà mú atɛ̀náànyì-Yèésù ŋa tse, tsí wà fɔ̀ ní: Ɔtí ní wà ŋɔ́ ŋa bɛ́ɛ̀#ɛ́.

Òkúta wà dzíkɔ̀-Ɔ̀ɖáyé fú ɔ̀nyà ŋa

14 Ńbɛ̀ɛ́, Òkúta ǹɖe ɖóro òŋu adzítsɛ́-Yèésù† máàwɔɔ̀kã̀ ŋa#á, tsí wà wíìnyɛ̀ ɖúgbe, tsí wà wí fú ɔ̀nyà kpó yèé wà bɛ̀#ɛ́ ní: Ɛnɛ-erè-Yùɖéyà ŋa òŋu ɛnɛ-Yèrúsàlɛ́mì ŋa gbo, àŋa kpó ká rɛ̃tígbè rere, tsí ká gbɔ́ òkpì-iŋɛ́ yèé wà tse#ɛ́. 15 À ɖédzú ɔtí ní wà ŋɔ́ ŋa bɛ́ɛ̀#ɛ́ɛ̀? Òò, kò tsi ɔtí ni. Ńǹyálɛ̀-àwúrɔ̀ gé ní àŋa wà si báàyí#ɛ́. 16 Ó ɖi, iŋɛ́ yèé agbáfɔ̀-Ɔ̀ɖáyé fɔ̀† Yòwɛ́lì ti wí wáa lɔ#ɛ́ ní wà tse nɔ́mbɛ́, tsí à wà rí#ɛ́. Yòwɛ́lì#ɛ́ fɔ̀ ní:

17 “Ɔ̀ɖáyé ní: Nɔ́dzɔ́-ìtã̀ntã́ ŋa#á,

màa tse tsí Mímí-mi nákó tì wɔ̀ ńǹtá-ɔ̀nyà kpó.

Tsí ɔma-ŋɛ́ ŋa, ɔnɔkɛ̃̀ɛ̃ gbo, ɔnɔbɛ̃̀ɛ̃ gbo,

àŋa kpó, à nákó wà gba afɔ̀-Ɔ̀ɖáyé fɔ̀,

tsí màa tse tsí ɔmɔ̀tsɔ́ ŋa nákó wà ródzú,

tsí màa wíìnyɛ̀ fú arúkà ŋa gbo ńnɔ́-àlá ŋa.

18 Ɛ̃ɛ̃, ńnɔ́-ɔdzɔ́ nyɛ̀ŋɛ̀ ŋa#á,

màa tse tsí Mímí-mi nákó tì wɔ̀ ńǹtá-àtsìtsɛ́-mi ŋa,

ɔnɔkɛ̃̀ɛ̃ gbo, ɔnɔbɛ̃̀ɛ̃ gbo, tsí à nákó wà gba afɔ̀-Ɔ̀ɖáyé fɔ̀.

19 Tsí màa tse iŋɛ́-àwùsì lákṹ lákṹ ŋa ńǹgbèrí òŋu ńǹtalɛ̀.

Iŋɛ́ ŋa#á ní dzɛ́ àmbara òŋu iná

má nára-òwúrɔ̀ ɖúɖú kìnɖìɖìì-kã̀#á.

20 Odzúùrɔ̃̀ nákó kpòkùkù kpó kpìrìm,

tsí òtsùkpá gbo nákó ɖi kpikpa hɛ̀ɛ̀ kíbí àmbara bɛ́,

tã́ná tsí ɔdzɔ́-Ɔlɔ́dzɔ́ kó tó,

ɔdzɔ́ yèé lákṹ láre ɔdzɔ́-àtíbɔ̀ ŋa kpó#ɛ́.

21 Nɔ́dzɔ́-ɔdzɔ́ nyɛ̀ŋɛ̀#ɛ́, ɔ̀nyà kpó,

bí ó kpe Ɔlɔ́dzɔ́ ní kó wáa gbà òŋu là#á, nákó gbàá là.”^*

22 Tsí Òkúta tɔ́ wà wí fú ŋa ró ní: Ɔma-Ìsàràyɛ́lì† ŋa, àŋa kpó ká rɛ̃tígbè, tsí ká gbɔ́ iŋɛ́ yèé òŋu bòkó fɔ̀ fú ŋa#á. Ɔ̀ɖáyé tsã ɔ̀nyà-kã̀, tsí mɔ́wɔ́ tɛ̀ɛ́. Ɛnɛ nyɛ̀ŋɛ̀ ní dzɛ́ Yèésù ti Nàsàrɛ́tì#ɛ́. Ɔ̀ɖáyé tse iŋɛ́-ikpá lákṹ lákṹ ŋa òŋu iŋɛ́-àwùsì ŋa ńǹrɔ́ǹrɔ́ gbà ńǹtá‐ɛ̀, tsí ká ń rí kíbí ó mɔ́wɔ́ tɛ̀ɛ́ gbà#á. Náàŋírĩ-ŋa ní ó tse iŋɛ́ nyɛ̀ŋɛ̀ ŋa kpó#ɛ́, tsí àŋa ká-ŋa, à mà bɛ́ɛ̀. 23 Yèésù#ɛ́, Ɔ̀ɖáyé ti mà ní à nákó múu tà fú ŋa. Ó ti tse ètò ti nára‐ɛ̀ bɛ́ɛ̀ si. Tsí à múu bɔwɔ́-ɔ̀nyà-íbàɖí ŋa, tsí à kã̀ã́ si ńǹtá-egi-ìɖáàgàlàdzà†, tsí ó kú. 24 Tsí Ɔ̀ɖáyé dzíi ti náàŋírĩ-òkú ŋa wá náyé. Ó nyàá ǹɖe ńɖíɖɔ̃̀ yèé wà ńkú#ɛ́. Ó ɖi, ikú kò nɛ́kpá, tsí kó nyáa gbàá si. 25 Ɖàfíɖì† gbo wíìnyɛ̀ ti nára-Yèésù#ɛ́ wáa lɔ. Ó ní:

“Mà wà rí Ɔlá-mi, tsí náa wà ńwádzú-mi si ńǹwèrè kíìwèrè.

Náa wà nɔ́wɔ́-àwóòtã́-mi si,

àtsùgbée ɛ̀ɖɔ̃̀ kó kã̀ mí.

26 Àtsùgbée bɛ́ɛ̀ ní ayè tɛ́ mi si,

tsí iŋɛ́ yèé wà bɔ́ nárũ-mi ŋa#á dzɛ́ ayè títɛ́ si kpó#ɛ́ ńnɛ̀ɛ́.

Bí ó dzɛ́ gìɖì ní àmí tã́ ɖí mí#ɛ́,

odzú-mi wà nɔ́ɔ̀nà si fú ìwɔ, Ɔlɔ́dzɔ́.

27 Iŋɛ́ yèé tse#ɛ́, ò kàkó kɔ̀ mí dzɔ̀ɔ́ ńlé-ikú,

tsí ò kàkó wò gìɖì ní èmi yèé dzɛ́ tɛ̀ɛ akpá akpá, ɛsɛ̀ ɛsɛ̀#ɛ́,

ni ara-mi kó dzirà si ńfò.

28 Ò ɖíre ɔ̀nà yèé màa fà, tsí rí àyɛ̀#ɛ́ fú mi.

Nà wà bá mi si, tsí nà mú ayè tɛ́ mi si gé ni.”^*

29 Tsí Òkúta tɔ́ wà wí fú ŋa ró ní: Ìnàbí-mi ɔma-Ìyúɖà† ŋa, ó wà ní òŋu kó wíìnyɛ̀ ti nára-Ɖàfíɖì gbágbóǹgbàgbò-àŋa fú ŋa rere, tsí ká gbɔ́. Ɖàfíɖì#ɛ́ ti kú, tsí à rìí wáa lɔ, tsí érì‐ɛ̀ wà ńɖi-àŋa si títí wáa fú òní. 30 Òŋu ká‐ɛ̀, agbáfɔ̀-Ɔ̀ɖáyé fɔ̀ ní ó dzɛ́#ɛ́, tsí ó mà ní Ɔ̀ɖáyé tàlé fú òŋu, tsí le oŋù si ńnɛ̀ ní: “Ɔ̀nyà-kã̀ náàŋírĩ-ɔmalɔ́ma-òŋu ŋa nákó wáa dzokó náàntã̀-oyè-òŋu.”^* 31 Ɖàfíɖì ti rí iŋɛ́ yèé ŋa nákó wáa tse náànyìwà#á, tsí ti wíìnyɛ̀ ti nára-kíbí Kírísítò nákó sɛ̃̀ dzí ti náàŋírĩ-òkú ŋa wá náyé#ɛ́. Ńnɛ̀ ní ó fɔ̀ ní:

“Ɔ̀ɖáyé kò dzɔ̀ɔ́‐ɛ̀ ní kó kí ńlé-ikú,

tsí ara‐ɛ̀ gbo kò dzirà si ńfò#ɛ́.”^*

32 Ó ɖi, Yèésù#ɛ́, Ɔ̀ɖáyé dzíi ti náàŋírĩ-òkú ŋa wá náyé. Àŋa kpó, àŋa mà, tsí àŋa nákó nyáa nya àyídzá‐ɛ̀. 33 Ɔ̀ɖáyé kɛ́ Yèésù#ɛ́ lɔ nɔ́ɔ̀rɔ̃, tsí múu káà dzokó náàwóòtã́‐ɛ̀, tsí Ɔ̀ɖáyé Boba‐ɛ̀ fúu ńMímí‐ɛ̀, kíbí ó ti tàlé‐ɛ̀ si#ɛ́. Tsí ó tse tsí Mímí‐ɛ̀ tì wɔ̀ ńǹtá-àŋa. Ó ɖi, iŋɛ́ yèé à wà rí, tsí wà gbɔ́ báàyí#ɛ́, Mímí-Ɔ̀ɖáyé†#ɛ́ ńnɛ̀ɛ́.

34 Tsí Òkúta tɔ́ wà wí fú ŋa ró ní: Kò tsi Ɖàfíɖì ní Ɔ̀ɖáyé kɛ́ lɔ nɔ́ɔ̀rɔ̃#ɛ́. Ó ɖi, Ɖàfíɖì òŋu ká‐ɛ̀ gìɖì fɔ̀ ní:

“Ɔlɔ́dzɔ́ wí fú Ɔlá-mi ní:

Wáa dzokó náàwóòtã́-mi,

35 tsí n mú ɔ̀tɛ̀-ɛ̀ɛ ŋa tsã́lɛ̀,

tsí ó mú ɛsɛ̀ lé ńǹtá-ŋa.”^*

36 Báàyí#ɛ́, àŋa, ɔma-Ìsàràyɛ́lì ŋa kpó ká mà rere ní Yèésù yèé à kã̀ si ńǹtá-egi-ìɖáàgàlàdzà#á, òŋu ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá, tsí ó dzɛ́ Ɔlá-ŋa#á.

37 Ɛnɛ yèé ŋa wà bɛ̀, tsí wà rɛ̃tígbè#ɛ́, kíbí à gbɔ́ afɔ̀ nyɛ̀ŋɛ̀ ŋa#á, ó lara-ŋa wɔ̀ gbòkã́, tsí à wà bere Òkúta òŋu adzítsɛ́-Yèésù-àtíbɔ̀ ŋa ní: Ìnàbí-wa ŋa, bí àa kó tse fáà báàyí?

38 Tsí Òkúta dzɔ́ŋù fú ŋa ní: Ká nyíìlò kpaɖà, tsí àŋa kó fɔ̀ ní ó ɖɔkpɛ́-Yèésù Kírísítò, tsí wɛ̀† fú ŋa, tsí Ɔ̀ɖáyé kó mú àbi-ŋa tɔrɛ fú ŋa, tsí à nákó gba ɔ̀yà-ɔ̀fɛ́-kã̀, ɔ̀yà#á Mímí-Ɔ̀ɖáyé ni. 39 Ó ɖi, Ɔ̀ɖáyé tàlé‐ɛ̀ fú ŋa òŋu ɔma-ŋà ŋa má nára-ɛnɛ yèé wà ńǹɖì dzídzɛ̃̀ ŋa#á gbo. Ɔ̀ɖáyé Ɔlɔ́dzɔ́ tàlé‐ɛ̀ fú ɔ̀nyà ɔ̀kã̀lɔ́ɔ̀kã̀ yèé nákó wáa kpè#ɛ́.

40 Ńbɛ̀ɛ́, Òkúta kpɛ̀rɔ́ kpíkpɔ̀ kpíkpɔ̀ fú ŋa, tsí ká rí mà ní òtítɔ́ ní ó wà fɔ̀#ɛ́. Tsí ó ɖáàmí le ŋá, tsí wà wí fú ŋa ní: Ká ǹɖe náàŋírĩ-ɛnɛ yèé ŋa kò wà tse òtítɔ́#ɛ́, tsí Ɔ̀ɖáyé kó gbà ŋá là.

41 Tsí ɔ̀nyà kpíkpɔ̀ gba afɔ̀-Òkúta gbɔ́, tsí à wìwɛ̀-Yèésù† fú ŋa. Nɔ́dzɔ́ nyɛ̀ŋɛ̀#ɛ́, ɔ̀nyà kíbí ɛgbɛ̀rú lé nɛ́gbàá (3000) bɛ́ɛ̀ wáa má atɛ̀náànyì-Yèésù ŋa.

Ìgbèngbé-atɛ̀náànyì-Yèésù ŋa

42 Ńbɛ̀ɛ́, atɛ̀náànyì-Yèésù ŋa náa ɖìgírí, tsí wà kpérí nɔ́dzɔ́ kɔ́dzɔ́, tsí wà gbɔ́ ɛ̀kɔ́-adzítsɛ́-Yèésù ŋa, tsí wà tsobí bá ara-ŋa, tsí wà dzɛŋɛ́ má náàdzɔ́,^* tsí wà wúùre gbo. 43 Tsí Ɔ̀ɖáyé wà tse iŋɛ́-àwùsì lákṹ lákṹ ŋa gbà ńǹtá-adzítsɛ́-Yèésù ŋa. Tsí kṹnukṹ náa wà nɛ́ àrísá fú Ɔ̀ɖáyé. 44 Tsí agba Yèésù gbɔ́ ŋa#á kpó, à tse ɔ̀kã̀ntso, tsí à náa wà kpɛ̃́ iŋɛ́ yèé wà fú ŋa#á fú ara-ŋà ŋa. 45 À náa wà ta iŋɛ́-ire-ŋà ŋa, tsí wà kpɛ̃́ owó‐ɛ̀ fú ara-ŋà ŋa kpó, tsí kṹnukṹ náa gba ìmarũ yèé ó wà ní kó gbà#á. 46 Nɔ́dzɔ́ kɔ́dzɔ́#ɛ́, à náa káà kpérí nɔ́gbà-ilé-Ɔ̀ɖáyé†, tsí wà sɛ̃ Ɔ̀ɖáyé, tsí à náa wà dzɛŋɛ́ ńɖi-ara-ŋà ŋa gbo náyè títɛ́ òŋu ńnɔ́ mímá. 47 À náa wà nyɛ Ɔ̀ɖáyé, tsí iŋɛ́-ŋa náa dzɔdzú-ɔ̀nyà ŋa si títítí. Tsí Ɔlá-wa náa wà mú ɛnɛ yèé ó wà gbà là ŋa#á, tsí wà ń má ŋa nɔ́dzɔ́ kɔ́dzɔ́.