24
Hay Pummoltaan Apo Dios hinan Tataguh tun Luta
1 Nomnomnomon tu'un hi Apo Dios ya pa"iona tun luta,
at maluman di aatna,
at miwa'atda nan tatagu.
2 At hay aat te ya mi'id di adi milagat an ta"on un padi,
ya baal, ya nan ad baal ay dida,
ya nan luma'u, ya nan munla'u,
ya nan umutang, ya nan mumpa'utang,
ya nan nawotwot, ya nan adangyan.
3 At nidugah di apa"ian tun luta an paddungnay mihigid an amin di wada.
Hiyah te inalin Apo Dios.
4 Ti mamaganan tun luta,
at mun'alangun amin di nalmu.
Ya an amin di abablubabluy hitun luta ya ahihiga,
ya ta"on un nan a'ap'apu ya kumapuyda
5 ti dumalat nan adi pangunudan di tataguh nan Uldin Apo Dios
an nahahapit hi ma'unud hi enggana.a
6 At hiyanan pa"ion Apo Dios tun luta,
at mahapul an edpol nan tataguy punholholtapandah ligat an dumalat di bahol,
at unda tuttuluy ma'angang.
7 Ya mun'alyaw an amin nan greyp,
at mi'id di miyammah ma'inum an mangipa'amlong hinan tatagu,
at nidugah an mumpunlungdayada.
8 At mid mahkay di amlongdan muntukal hinan tambourine ya alpa,
9 ya mi'id mahkay goh di gun ma'amung ta kumanankantada ya immanin'inumda
ti mumpait mahkay di panamtamdah nan ma'inum.
10 Ya mid hulbin an amin nan babluy an nun'apa"i,b
ya an amin nan tatagu ya numpunda'igda ta mi'id humgop.
11 Ya mi'id mahkay nongkay di amlong di tataguh tun luta,
at tumu'utu'u' nan tatagun mumbagah ma'inum.
12 Ya nidugah di apa"ian nongkay di babluyda
ti mapa"i nan pantaw di allup nan babluyda.
13 At umat hinay aat di ma'at hinan abablubabluy hitun luta,
at unda tuttuluy tatagun ma'angang
an umat hinan niyoh'ohan bungan di olibo
unu greyp hi alpahan di apugahan di bungada.
14 Mu wadaday tataguh appit hi alimuhan di algaw
an pun'it'u'day pundayawdah anabagbagtun Apo Dios
an dumalat di amlongda.
15 At hiyanan da'yun tatagun wah appit hi buhu'an di algaw
ya da'yun numpunhituh nan pingit di baybay
ya mahapul an dayawonyuh Apo Dios an dayawon tu'un holag Israel!
16 Ya ta"on un nan nun'iyadagwin babluy ya awniat madngol di kantadan alyonday,
“Madayaw nan na'ahhamad di pangatnan Dios!”
Mu ha"in ya munha'it damdamay punnomnoma'
ti nan tatagu ya mumpipinna"ida.
17 At nidugah an atata'ot di ma'ma'at hitun luta
an mi'id di nanginnilah un magah hi bitu unu ma'nah nan hulu.
18 Ti lumayawta ay an dumalat di ta'ot ya ma'uhbungtah nan bitu.
Ya wa ay goh ta ipatna an umayat hinan bitu ya ma'nata goh damdamah hulu.
Ya madloh di udan an ay niguwang di lobong hi ad abuniyan,
ya umalyog tun luta,
19 at mun'anga'.
20 Ya gapuh bi'ah di alyog ya munhinaggaw tun luta an umat hinan nabutong
ya nan abung hi un mabi'ah di puo'.
At ma'at hatun gapuh nan nidugah an ngohoy di tatagun Apo Dios,
at hitun apa"iana ya adi mahkay mipaphod.
21 Ya henen gutudc ya moltaon Apo Dios nan numbahol an anghel an wad abuniyand
ya ta"on un nan a'a'lih tun luta.
22 At amungona didah nan way nabo"an an ay baludan
ta engganah tun punhumalyaanan dida ta mamoltada.
23 Ya homelong nan bulan,
ya adi bumenang nan algaw
ti hi Apo Dios an nidugah di abalinanay mun'ap'apuh nan Duntug an Zion hi ad Jerusalem.
At madilagan an amin,
ya ta"on un nan mumpangipangpanguluh nan tatagu ya tigonday benangna.