23
Hay Nipa'innilah Ma'at ad Tyre ya ad Sidon
(Tyre: Ezek. 26:1-28:26; Joel 3:4-8; Am. 1:9-10; Zech. 9:3-4) (Sidon: Ezek. 28:20-26)
1 Hiyah te hinapit Apo Dios hinan tatagun mumpungkumildud Tyre. An inalinay,
“Da'yun mumpuntamuh nan pupul di iTarshisha ya awniat
ikilayuy punlungdayaanyuh apa"ian nan duma'alan di pupulyub ya nan a'abungyud Tyre.
Ya hay a'atan te ya donglonyuh dumatnganyud Cyprus.”
2 Ya inalin goh Apo Dios hinan iSidonc di,
“Duminong ayu adya ta nomnomnomonyu nan ma'at ay da'yun iSidon
an mumpungkumildu an numpunhituh pingit di baybay
an immadangyan an dumalat di nungkumilduanyu.
3 Ti nun'iluganyuh nan pupul di ikumilduyun bogah
an nalpuh nan inliya'dah nan pingit di wangwang hi ad Shihor,d
ya inyuyyu nun'ila'uh abablubabluy.
4 Mu nan babluyyud Sidon an wah nan pingit di baybay an ma'al'ali ya nidugah di ipa'ampaana
ti adi mahkay mabalin an umuy ayu mungkumildu
ti un gulat ta humapit nan baybay at alyonay,
Mi'id mahkay di imbabaluy'u.”e
5 Ya inalin goh Apo Dios di,
“Ya ta"on hi un nan i'Egypt ya nidugah di punlungdayaandah
pangngolandah napa"ian ad Tyre.
6 At an amin ayun numpunhituh nan pingit di baybay
ya odolnah un ayu munlugan hi pupul ta lumayaw ayu ta ekayud Tarshish.
Ya ingkilayuy punlungdayaanyu.”
7 Ya alyon nan tataguy,
“Undan hiyah ne numbalinan ad Tyre an din siudad hidin penghana?f
Hidin hopapna ay ya gunda umamlong nan numbabluy hitu,
ya nonongan immuydah udum an babluy ta hidiy pungkumilduanda ya pi'hituwanda.
8 Mu hay nunnomnom an mama"id Tyre an babluy di ma'al'alih tun luta
an hay mumpungkumilduh di ya nan imbabaluy di ali?”
9 Ya ha"in an hi Isaiah di mambal an alyo' di,
“Hi Apo Dios an nidugah di abalinanay nunnomnom ta pogpogonay pumpahiyaanda
ya ta way aton nan e'gonan di tataguh tun lutan mabainan!
10 At da'yun tatagud Tyre ya puntammanyu mahkay nan lutayu
ti mi'idda mahkay nan pupul an gun duma'al hinan babluyyu.
11 Hi Apo Dios ya nidugah di abalinana,
at hiyanan mabalin an pa"ionay babluy an pun'ap'apuwan di tataguh tun luta.
Ya hiyanan iyabulutnay apa"ian ad Phoeniciag an wah pingit di baybay
ta mapogpog di abalinanda.
12 Ti inalin goh Apo Dios di,
Ta"on hi un da'yun iSidon hinad Phoenicia an nangipa'enghah pun'amlongan
ya mapogpog mahkay ti munholholtap ayud ugwan.h
At ta"on hi un ayu lumayaw ta umuy ayud Cyprus ya adi ayu damdama lumenggop hidi.
13 At tigonyuy aton nan i'Assyria hi ad Babyloni an gubatonda dida,
ya pina"idan amin nan wah din babluy
an ta"on hi un nan allup hinan nunlene'woh.
14 Da'yun gun milugan hi pupul ya awniat ikilayuy punlungdayaanyuh
apa"ian ad Tyre an pundenolanyu!
15 At ma'aliwan mahkay nan babluy ad Tyrej hi napituy tawon an hiyah ne mabalin an pi'taguan di ohan ali. Mu awniat mababluyan goh hi alpahan di napitun tawon at umat hinan kantan di babain mumpappabayad an alyonay,
16 He"an babain mi'lala'i ya naliwan da'a mahkay.
At hiyanan odnam nan alpa ta mungkankanta'a goh
ta ma'agay'ayan nan linalai ta umalidan he"a.
17 Ya hay pohdonan hapiton ya hay angunuh nen napitun tawon ya haggungon mahkay Apo Dios ad Tyre, mu agguy naluman din aat nan tatagud Tyre an un hay pungkumilduanday nomnomnomonda, ya naliwandaat hi Apo Dios, at mipaddungda damdamah nan mi'lala'in hiyay bumo'laanah pihhuh tun abablubabluy hitun luta. 18 Mu hay umangunuh ya bo'on hiyay manamtam hinan bino'lana ti hi Apo Dios ya idatnah nan tataguna ta way pangngalandah do'ol an ma'an ya nan mun'aphod an lubungda.”