3
Hay Panumalyaan Apo Dios hinan Tatagu
1 Ya wada goh di impa'innilan Apo Dios ay ha"in an inalinay,
“Awni ta madatngan di gutudnaa
at ipabangngad'un amin nan maphod an nitaguanyud Judah ya nan kapitulyu an ad Jerusalem.
2 Mu nan malpuh an amin hinan udum an babluy
ya ma'amungdah nan Nundotal an Ma'alih Jehoshaphatb an panumalyaa' ay dida
an dumalat hinan nangiwa'atandan da'yun tatagu' an holag Israel hinan abablubabluy
ta nunggogodwonda nan babluy'ud Israel.
3 At numbibinnunutda ta nangamung di mangngal hinan tatagu',
ya nun'ihbutda nan ung'ungungnga ta way pumbayaddah nan putan binabai,
ya ta way ila'uda goh hi inumonda.c
4 Ya da'yun tatagud Tyre, ya ad Sidon, ya da'yun amin hinan abablubabluy ad Philistia undan way iballohyun Ha"in hi nappuhih inat'u? Gulat ta waday iballohyun Ha"in ya elanyuat ti un himbumaggay ato' an mangiballoh an amin hinan inatyu! 5 Ti nun'alayuy silver'u ya balitu"u, ya din udumnan mun'apla'an an inadangyan'u ta nun'iyuyyuh nan timplun di dayawonyu. 6 Ya nun'ihbutyu nan iJudah hi ad Greece ta nun'iyadagwidah nan babluyda!
7 Mu ad ugwan ya bangngado' didah nan nangihbutanyun babluy, ya ato' ay da'yu nan umat hi inatyun dida! 8 At ipihbut'u nan imbabaluyyuh nan iJudah ta ahida goh ihbut didah nan tatagud Sheba an niyadagwin babluy.d Hiyah ne inalin Apo Dios.”
Hay Awagahan nan Tatagun Apo Dios
9 Ya ha"in an hi Joel ya inali' di,
“Ipa'innilayuh nan Hentil hinan abablubabluy ta mundadaanda
ta amungondan amin nan nun'ala'eng an mi'gubat!
10 Ya alyonyu goh ta bohalonda nan aladudah ispadada,
ya bohalonda goh nan pahuldah bangidda.e
Ya ta"on un nan nalogoy ya alyonday,
Mabalin an mi'gubat ami goh damdama!
11 At punnaudonyu an da'yun Hentil an wah nan nunlene'woh an abablubabluy
ta ma'amung ayun amin hidih nan Nundotal an Ma'alih Jehoshaphat!”
Ya inali' ay Apo Dios di,
“Ipiyalim ni' nan tindalum ta gubatonda dida!”
12 Ya inalin goh Apo Dios di,
“Mahapul nongkay an umalidah nan Nundotal an Ma'alih Jehoshaphat
nan nalpuh nan abablubabluy ta humalyao' dida
13 ti adi ahan maphod nan ato'atonda!
At hiyanan pumpalang'u dida ti nadatngan di pummoltaa' ay dida
an umatdah nan paguy an natong, at mabto',
ya umatda goh hinan greyp an ma'apal ta maheptan!”
14 Ya ha"in an hi Joel ya inali' di,
“Linibuan linibuy tatagun umalih dih nan punhumalyaan Apo Dios ay dida!
15 Ya mipaddeh an adi bumnang di bulan,
ya algaw,
ya bittuan.
16 Ya umat hi alin di layon di alin Apo Dios hi ad Zion,
ya umalyog di luta,
ya miwogot ad abuniyan.
Mu ditu'un holag Israel ya paddungnay mihi'ug tu'un Apo Dios an Apu tu'u!”
17 Ya inalin goh Apo Dios di,
“Dumalat ay daten ato' ya innilaonyun Ha"in an Dios an Apuyu,
ya wagwadaa' hinan nammagtud Zion an me'gonan,
at nihakup ad Jerusalem ay Ha"in.
At hiyanan adi mahkay mabalin an hakupon nan tataguh udum an babluy.
18 Henen a'atana ya maho'napan nan duntug hi nitanom an greyp,
at do'ol di ma'inum,
ya do'ol di lumane'le'od hi baka,
at do'ol di gatas.
Ya waday malpuh nan Timplu' an Dios an danum
hi mananum hinan namaganan an awadan nan a'ayiw an akasya,f
at do'ol di danum ad Judah.
19 Mu ad Egypt ya mumbalin hi mapulun,
ya ad Edom ay ya minganuy ta matawan
ti nidugah di nangatdan da'yun holag Judah an numpatoydan ta"on un mi'id di baholyun dida.
20 Mu minaynayun mahkay hi engganay tatagun mumpunhituh nan kapitulyud Jerusalem
ya an amin hinan babluyyud Judah.
21 Mu nan buhul an pimmatoy ya moltao' mahkay dida.
Ya Ha"in an Dios an Apuyu ya mi'hitua' ad Zion!”g