25
Nan Kantah Ipabagtuan Apo Diosa
1 O Apu an Dios'u,
He"ay e'gona' ya ipabagbagtu'.
Ti umipanoh'an amin nan ina'inatmu
an hiyana tuwali din ninomnommuh din penghanan alyom hi atom.
2 At pumpa"im nan babluyb an ta"on hi un nahamad di allupna,
at midipat hinan luta.
At ma'ubah mahkay heden palasyun di tataguh udum an babluy,
at adi mahkay mabalin an mawada goh.
3 At nan tatagun ongol di abalinanda ya awniat hapitonday anabagtum,
ya nan mun'abungot an tatagu ya ta'tan da'a.
4 Ti He"ay pumpabadangan nan nun'awotwot an maligligatan,
ya He"ay paddungnay ihi'ugandah un way puo' unu ongol an potang.
Ti nidugah di pangat di buhul an umat hinan mabi'ah an puo'
5 unu nan nidugah an potang hinan mapulun,
at mun'ohab.
At He"a, Apo Dios, di ay bunut an nihanih nan potang
ti agguymu inyabulut an nan buhul di mangabak,
at impadinongmu didan mangikantah nangabakanda.
Hay Pangidadaanan Apo Dios hinan Maphod an Ma'an hi an Amin an Tatagu
6 Hi Apo Dios an nidugah di abalinana
ya idadaanah nan Duntug an Zion di mun'aphod an ma'an
an iyayagnah an amin an tataguh tun luta.
Ti piliona nan ma"aphod an mihda an nan way tabana an dotag di baka
ya nan na"apgot an bayah an ma'appaganah.
7 Ya heten duntug goh di pamogpoganah nan dumalat hi punlungdayaan
an amin nan tataguh tun luta.
8 Ya pogpogonay abalinan di atoy hi munnanannong,c
ya paddungnay apulugonan amin di lugwan di tataguna,d
ya pogpogonay abainandah abablubabluy hitun luta.
Hiyah ne intulag Apo Dios hi atona.
9 At awniat alyon nan tataguy,
“Immannung an hi Apo Dios di Dios tu'u ya nangedenolan tu'u,
at hiyanan binaliwan ditu'u!
At mun'amlong tu'uh nanaguanan ditu'u!”
Hay Miyadwah Nipa'innilah Pummoltaan Apo Dios hinan iMoab
(Isa. 15:1-16:14; Jer. 48:1-47; Ezek. 25:8-11; Am. 2:1-3; Zeph. 2:8-11)
10 Ya ipapto' Apo Dios heten Duntug an Zion an gapuh nan abalinana,
mu nan iMoab ya pun'igatina dida ta umatdah nan dagamin mun'ibilud hinan ta"i.
11 Ya ta"on hi unda ipatnan bumangon ta makakdah di mu adi iyabulut Apo Dios
an unnaat goh iyal'allan bainon dida ta mapogpog di pumpahiyaanda.
12 Ya pumpa"in Apo Dios nan allup di babluyda
ta midipatdah nan luta ta mumbalindah hupu'.