107
Hay Pangulgudan hinan Amaphod Apo Dios
1 Munyaman tu'un Apo Dios ti nahamad di aatna,
ya nidugah di pamhodnan minaynayun hi mid pogpogna!a
2 Da'yun amin an binaliwan Apo Dios di mangat ete ti da'yu nan nabaliwan hinan buhulyu
3 ti inamung da'yun inilpuh nan numbino'ob'on an babluy an nete"ah buhu'an di algaw ta engganah nan alimuhana,
ya nete"ah appit hi agwan ya iggid hi un hagangon di buhu'an di algaw.
4 Mu din udumna ya unda limmane'le'od hinan mapulun an mi'id di iniladah dalan an miyuy hinan babluy an mabalin hi pi'hituwanda.
5 At hinoltapday hinaangda ya inuwawda,
at la'tot ya limmungtuyda.
6 Ya unat goh mid mahkay abalinanda ya nunluwaludan Apo Dios,
at binaliwana didah nan nunligligatanda.b
7 Ya binadangana dida,
at intuduna nan ma'andong an dalan hi nange'wanda
ta engganay unda nidatong hinan babluy an punhituwanda.
8 At hay maphod hi atonda ya munyamandan Apo Dios hinan nidugah an homo'nan dida,
ya an amin hinan nidugah an immipanoh'an inatnan namadang ay dida!c
9 Ti impa'inumana din na'uwaw,
ya pinangana ta nun'abhug din munhinaang.
10 Mu din udumna ya wah didah nan hehellong an agogohgoh ti nunholholtapda ya nun'akanhilanda.
11 Ya manu ay immatdahna ti agguyda inunud nan Hapit Apo Dios,
ya pinahiwda nan nanugun nan nidugah an na'abbagbagtu.
12 At hiyaat unna nunholholtapon didah nan naligat an tamu ya hinan nida'lehanda,
ya mi'id ah bimmadang hi namohwat ay dida.
13 Mu unat goh nunluwaludan Apo Dios ya binadangana didah nan nunholholtapanda
ya hemmo'na goh dida,
at binaliwana didah ligatda.d
14 At enekakna didah nan helong an nihinanda,
ya numpoghatna din kanhel an bangkeleng din nun'abalud.
15 At maphod hi unda munyaman ay Apo Dios hinan nidugah an pamhodna
ya nan nidugah an umipanoh'an inatnan dida!e
16 Ti numpa"ina nan gambang an tangob di baludan,
ya nun'ipungna din gumo' an da'igna!
17 Nan udumnan dida ya nginumhaydan dimmalat nan nappuhin ina'inatda,
ya nan udumnan dida ya nunholholtapdah ligat an dimmalat nan baholda.
18 At la'tot ya adida pohdon an mangan,
at nun'a'ung'ungdan magadyuh matoyda.
19 Ya unat goh immatdah na ya nunluwaludan Apo Dios ta binadangana dida,
at nabaliwandah nan nunligligatanda.f
20 Ya un anggay din hinapitna ya inyadaogna dida,
at pinumhodda an agguyda nun'atoy,
at nelwangdah nan nappuhin ma'at ay dida.
21 At maphod hi unda munyaman ay Apo Dios an dumalat nan nidugah an pamhodna
ya an amin nan nidugah an umipanoh'an inatnan dida!g
22 Ya mahapul an e'nongda nan Onong an Punyamananda,
ya maphod goh hi unda iyam'amlong an ikankanta nan nahamad an inatna.
23 Ya nan udumnan dida ya nunlugandah nan pupul ti numbaatda,
ya hidih baybay di nange'wandah din nungkumilduanda,
24 at hidiy nanginnilaandah aat di umipanoh'an abalinan Apo Dios hi inatnah nan maluhung an baybay.
25 Ya minandalna nan tuyup ta bimmi'ah,
ya nuntu"ugna din danum hinan baybay,
at o"ongol di dalluyun an malupilupig.
26 At gun natu"ug din pupuldah ya gun nagah an niba'nog hinan danum,
at nidugah di timma'tan din numpunlugan.
27 Ya umatdah nan nun'abutong ti munhinaggawda,
ya nun'atu"inda,
ya mi'id ahan di abalinandah aton.
28 At nunluwaludan Apo Dios eden nunholholtapanda,
ya binadangana didah nan nunligligatandah
29 ti impadinongna din puo',
ya dimminong goh din dalluyun.
30 At nun'am'amlongdah din dimminngan di puo' ya dalluyun,
ya binadangan Apo Dios dida ta engganay immatamdah din dimma'alan di pupulda.
31 At maphod hi unda munyaman ay Apo Dios hinan adi malumluman an pamhodna
ya an amin nan nidugah an umipanoh'an inatnan dida!i
32 Ya maphod goh hi unda ipa'innilah nan a'amungan di do'ol an tatagu nan nidugah an abalinana,
ya ipabagbagtuda goh Hiyah nan way a'amungan nan a'ap'apuh nan abablubabluy.
33 Ya tindu' Apo Dios nan danum hinan wangwang ta na'ammaganan nan luta,
ya tindu'na goh nan a'obo'obob ta nun'adnga' nan luta,
34 ya numbalinona nan lo'eh an luta ta umat hi ahin an pinumhaw,
at mid hulbina ti dimmalat nan nun'appuhin gun inat nan tatagun numpunhituh di.
35 Ya numbalinona nan mapulun hi puhung,
ya limmunay obob hinan mamagan luta
36 ta hidiy nangiyayanah nan tatagun nun'abtel ta nunhitudah di,
at binabluyanda an hidiy nunhituwanda.
37 At binogayanda nan papayawda,
ya nuntanomdah do'ol hi greyp,
ya amunganda din nun'ihabalda.
38 Ya nidugah an dimmo'ol di holagda ti winagahan Apo Dios dida,
ya dimmo'ol goh di bakadan gun ma'ud'udman.
39 Mu immitang nan holag Israel,
ya numbalindan nidugah an nawotwot ti nidugah di numpaholholtapan di buhuldan dida.
40 Ya impattig Apo Dios di boholnah nan nangipaligligat ay dida,
at mid poto' di limmane'le'dandah nan mapulun.
41 Mu binaliwna nan nun'awotwot hinan punligligatanda,
ya impado'olnay holagdan umat hinan ado'ol di kalnilu.
42 Ya ma'innila an umamlong nan maphod di ugalidah unda tigon di umat hitun ma'at,
mu an amin nan nappuhiy ugalida ya didindinongda.
43 At maphod hi un nan nun'ala'eng ya nomnomonda hanan na'na'at
ta nan adi malumluman an pamhod Apo Dios di amnawanda!