108
Hay Luwaluh Pumpabaddangan hi Abaliwan hinan Buhul
Heten psalm ya kantan intudo' David.
(Psa. 57:7-11; 60:5-12)
1 O Apo Dios, nahamad an He"ay ehdol'u,
at hiyanan ikanta' di pundayaw'un He"a.a
2 Ag'agaa' an bumangon,
ya tinukal'u nan alpa ya lyre,b
ya tukalo' ta engganay un mawa'ah.
3 Ya munyamana' ay He"a, Apo Dios,
ya ikanta' di pundayaw'un He"ah nan nido'lan di tatagu.
4 Ti nan pamhodmu ya mi'id di apogpogana an lauhanad abuniyan,
ya umat goh hinan aatmun ipa'annungmun amin nan itulagmu.
5 Ya He"ay mipabagbagtu ni' hi ad abuniyan,
at mattig goh di ahaphapitam hitun luta!
6 At donglom ni' tun iluwalumin He"a ta badangan da'mih nan nidugah an abalinam
ta mabaliwan amin pohpohdom an tatagum!c
7 Ti intulagmu an Dios hidih nan Timplum an inalim di,
“Abako' di buhul'u ta gogodwo' ad Shechem
an ta"on un nan Nundotal an Sukkoth ta iyapong'u nan tatagu'.d
8 Ya hakupo' ad Gilead ya ad Manasseh,
ya puntindaluo' nan i'Ephraim,
ya pun'alio' nan iJudah.e
9 Ya nan holag Moab di baal'u,
ya nan holag Edom di himbut'u,
ya it'u"uy nangabaka' hinan iPhilistia.”f
10 Mu hay mangipangulun ha"in hinan babluy an ata'nang di allupna?
Ya hay mangitnud ay ha"in an umuy hinan holag Edom?g
11 Undan bo'on He"a, Apo Dios, an nanginganuy ay da'mi?
Ya undan goh adi'a mitnud hinan tindalumih un way gubat?h
12 Badangan da'mi ni' an umuy mangubat hinan buhulmi
ti mi'id di hulbin nan ibadang di tatagu!i
13 Mu He"a ay di bumadang ay da'mi, Apo Dios,
at mangabak ami ti abakom nan buhulmi!j