106
Hay Amaphodan Apo Dios hinan Tatagunaa
(Ex. 14:10-31; 15:1-21; 32:1-33:6; Num. 11:4-33; 13:31-14:45; 16:1-50; 20:1-13; I Chron. 16:34-36)
1 Madayaw hi Apo Dios!b
At munyaman ayun Hiya ti ma"aphod di aatna,
ya adi mapogpog nan nidugah an pamhodna!c
2 Mi'id ah way abalinanan mangibaag hinan nidugah an umipanoh'a an gun aton nan Dios,
ya undan goh waday hay way abalinanan mangulgud hinan a'al'alyana?
3 Mipa'amlong nan tagun mangunud hinan nahamad an Tuguna
ya inaynayunan gun aton di nepto'.
4 Nomnomona' ni', O Apu, hinan gutud di pamadangam hinan tatagum,
ya idduma' ni' an pi'baliw ay dida
5 ta way ato' an mannig hinan pumhodan nan pento'mun tatagum,
ya ta mi'yam'amlonga' hinan umamlongan nan tatagum an pento'mu,
ya ta midduma' goh ay didan mangul'ulgud hinan a'al'alyam.
6 Umat amih din a'apumi an numbahol goh ti gunmi inat di nun'appuhi,
ya adi ami goh mangngol.
7 Hidin wadan din o'ommodmih ad Egypt ya agguyda na'awatan di aat nan umipanoh'an ina'inat Apo Dios,
ya inaliwanda goh nan gunna nammonammo'an ay dida,
ya undaat goh binohol hidin wadandah nan Mumbolah an Baybay.d
8 Mu ta"on hi un umat hinay aat nan tatagu mu binaliwana damdama dida ti hiyah ne din intulagna,
ta way atondan mannig hinan nidugah an abalinam.
9 At hiyanan minandalna nan danum hinan Mumbolah an Baybay,
at natob'a' an nun'aha"ad hinan numpinangngel din danum,
ya impanguluna din tataguna ta nan mamagah bunol di baybay di dinalanda an bimmad'ang.
10 At binaliwana didah nan namohol ay dida,
ya hinandiana didah nan nangubat ay dida.
11 Mu din nangubat ay dida ya nun'alnongda an mi'id ah na'angang,
12 at kinulug mahkay nan tataguna din intulagna,
ya ingkankantada mahkay di nundayawdan Hiya.e
13 Mu un na'amtang ya inaliwanda din inatnan dida,
ya agguyda henod di itugunah atonda
14 ti hidin wadandah nan mapulun ya do'ol di imbagadah mahapulda ta nampongdan Hiya.
15 At indatnan dida din imbagadan pa'appopohdonda,
mu iniddumnan ni'yidat nan atata'ot an dogoh ay dida.f
16 Ya din wadandah dih nan mapulun ya immamoh nan tatagun da Moses
ay Aaron an nidawat ta baal Apo Dios.
17 Ya dimmalat hanan aatda ya nanga' nan luta,
at na'unug hi Dathan,
ya nagabunan hi Abiram ya nan udumna an ni'yibbana,
18 ya waday nun'a'agah hi apuy an nalpud daya ta nunggohobna din i'ibbada
ya an amin din tatagun nun'appuhiy pangatda.g
19 At nun'ammadah bulul an umat hi bakah din wadandah nan Duntug an Sinaih
ta dinayawda an hay balitu' di niyamma.
20 At inhukatda nan immannung an Dios hinan bulul an umat hi manilhig an baka an holo' di tanudna.i
21 Ya inaliwanda nan Diosda an namaliw ay dida an din nangat hi numbino'ob'on an umipanoh'ah din wadandad Egypt
22 ti do'ol di immipanoh'ah inatnah did Egypt,
ya nidugah goh an immipanoh'a din inatnah nan Mumbolah an Baybay.
23 At inalin Apo Dios di ubahona nan tataguna,
mu hi Moses an pento'nah baalna di hiyay nangiyalun hinan tatagu ay Apo Dios ta na'al'alu' Hiya,
at na'uyah din bungotna ta agguyna intuluy an inubah dida.j
24 Ya pinahiwda din ma"aphod an lutan nidat ay dida ti agguyda kinulug din intulagna ay dida.
25 Ya undaat goh nilu'u' hinan tuldada,
ya immulu'ulu'da ti agguyda inunud hi Apo Dios.
26 At hiyaat un inhapatan Apo Dios an pumpatoyna didah nan mapulun,
27 ya pun'iwa'atnay holagdah nan adadagwin bo'onda babluy,
ya hidiy atayandah nan babluy an iwa'atanda.k
28 Latot ya binalbaliyanday odoldah nan ni'dayawandan Ba'al an bulul hidid Peor,
ti ne"andah nan ne'nong hinan mi'id di lennawanan bulul.
29 At impabungotdah Apo Dios hinan nun'appuhin ina'inatda,
at hiyay dimmalat ya nundoghon Apo Dios dida.
30 Mu la'tot ya bimmungot hi Phinehas,
ya numpatoyna din numpumbahol,
at dimminong mahkay din ligatda.
31 At henen maphod an inatnay dimmalat hi nangibilangan Apo Dios ay hiyah nahamad,
ya agguy na'al'alliwan henen inatnah engganad ugwan.l
32 Ya hidih nan way obob ad Meribahm ya impabungot goh din tataguh Apo Dios,
ya hi Moses di na'amuyuan hinan inatda.
33 At la'tot ya impah'it ahan Moses din ina'inatdan namahiw hinan Na'abuniyanan an Lennawa,
at himmapit ay didah nappuhi.n
34 Ti agguy inunud nan holag Israel din intugun Apo Dios ay didan
inalinay pumpatoydan amin nan tatagun wah nan babluy an datnganda.
35 Mu undaat goh ni'yappuan ay dida,
ya inyunnuddah nan nappuhin ugalida,
36 ya ni'dayawdah nan bululda,
at hiyay dimmalat hi nunligatanda.
37 Ya ta"on un nan imbaluydan lala'i unu babai ya ene'nongdah nan bulul ad Canaan.
38 Hay pinatoyda ya nan imbabaluydan ung'ungungngan mi'id di baholda ta ene'nongdah nan bulul hidid Canaan,
at pinuhin nan daladay lutah di.o
39 At pimmuhiy aatdan nen nun'appuhin inatda an paddungnay unda immilugtap.
40 Ya bimmungot hi Apo Dios hinan tataguna
ti himmiga ahan hinan nun'appuhin ato'atonda.
41 At impa'abakna didah nan tataguh nan udumnan babluy
ta danen agguy kimmulug di a'ap'apuda.
42 Ya nuntamuonda dida,
ya pinalpaligatda dida,
ya an amin di alyonda ya mahapul an unudonda.
43 Ya gun intugtugan Apo Dios an namaliw ay dida,
mu agguyda damdama natugun ti binoholda damdama Hiya,
at hiyanan namaman nabaholanda.
44 Mu hemmo' Apo Dios damdama dida ti dengngolna din numpahpahmo'anda,
45 ya ninomnomna din intulagnan dida,
at inggohgohana dida an dumalat nan adi mapogpog an pamhodna.
46 At impa'uyanay nomnom nan buhulda ta hom'onda dida.
47 Apo Dios an Diosmi, baliwan ni' da'mi, ta amungon da'min tatagum an nun'iwa'at hinan abablubabluy
ta malammung ami ta way atonmin mangulgud hinan maphod an inatmu,
ya munyaman amin He"a.p
48 At dayawon tu'uh Apo Dios an Dios nan holag Israel ad ugwan hi engganah mi'id di pogpogna,
ya alyon tu'un amin di, “Amen!”
Madayaw hi Apo Dios!q r