99
Hi Apo Dios di Na'abbagbagtu
1 Hi Apo Dios di Ali an inumbun hinan pun'ap'apuwanah nan numbattanan di cherubim,
at wumogwog nan Hentil hitun luta,
ya umalyog tun luta ti nidugah di abalinana.
2 Nidugah di abalinan Apo Dios ad Zion,
ya Hiyay Ap'apun an amin nan babluy hitun luta.
3 Ya dayawon an amin di tataguy ngadanan madayaw ya umipanoh'a ti me"gonan ahan Hiya!
4 He"an Ali an abalinam an amin ya pa'appohpohdom di ma'andong ya nan makulug
an hiyah ne din inatmuh nan holag Jacob ti napapaddung di inatmun dida.
5 At dayawon tu'u nan Ap'apu an Dios tu'u,
ya munhippi tu'uh hinagangna ti nidugah an me'gonan!
6 Ti ta"on da Moses ay Aaron an papadina ya hi Samuel an ohah nan baalna ya gunda nunluwalun Apo Dios,
ya numpabadangdan Hiya,
at binadangana dida.
7 Ya hidih nan ma'ugtul an bunut hi wadam an Dios ya ni'hapit'an dida,
ya dengngolda nan inalim,
ya inunudda.
8 Apo Dios an Diosmi, inatmu din imbagan nan tatagum
ta nangipattigam an inaliwam di baholda an ta"on hi unmu minolta didah nan nibahhawanda.
9 At ipabagbagtu tu'uh Apo Dios an Dios tu'u,
ya dayawon tu'u Hiyah nan me'gonan an duntugnad Jerusalem ti Hiya an Dios tu'u ya me'gonan!