98
Hi Apo Dios di Mumpapto' hitun Luta
Hete ya psalm.
1 Ikantaan tu'uh Apo Dios hi balbalun kanta an dumalat nan do'ol an inatnan nidugah an umipanoh'a
ti nangabak an dumalat nan nidugah an abalinana,
ya inabaknay buhulna.
2 Ya ipattig Apo Dios hinan Hentil hinan abablubabluy hitun lutay nangabakana
an dumalat di abalinanan bumaliw ya nan nahamad an pangatna.
3 Ti agguyna imbahhaw din intulagnah nan holag Israel an pa'appohdona dida,
mu ipa'annungna din inalinah pumhodanda.
Ya tinnig an amin nan tataguh tun lutay nangabakan nan Dios tu'u.
4 An amin ayun tataguh tun luta ya it'u'yun mangikantah amlongyun Apo Dios,
ya hay kantaonyu ya nan umipa'amlong ay Hiya.
5 Ya hay ikantayuh ipabagtuan Apo Dios
ya tukalonyu nan alpa ta miyunnudan hinan kantayu.
6 Ya iddumyu goh an paganghon nan talampet ya nan tangguyub,
ya oltonyun mangikantah pundayawyun Apo Dios an Ali.
7 Ya ta"on un nan baybay, ya an amin nan wah din matagu,
ya nan luta, ya an amin nan numbino'ob'on an numpunhituh nan luta ya middumdan mi'yamlong,
8 ya ta"on goh da'yun wangwang ya tumalpu' ayuh amlongyu,
ya immat goh ay da'yun aduntuduntug an mungkanta ayu an dumalat di amlongyu.
9 At mahapul an dayawonyuh Apo Dios ti umalin manumalyah nan tataguh tun luta,
ya makulug di atona an adina ipangngel di panumalyana.