100
Hay Mikantah Pundayaw ay Apo Dios
Hete ya psalm an punyamanan.
1 An amin tu'un tataguh tun luta ya mun'amlong tu'un mungkantah pundayaw tu'un Hiya,
2 ya umamlong tu'un mundayaw ay Hiya,
at it'u' tu'uy pundayaw tu'un Hiya.
3 Ya innilaon tu'u an hi Apo Dios ya Dios,
ya Hiyay nunlumu ay ditu'u,
at hakup ditu'u,
ya ditu'uy tataguna an paddungnay kalniluna.
4 Munyaman tu'un Hiyah nan humigupan tu'uh nan pundayawan tu'un Hiyah nan Timpluna,
at maphod hi un tu'u munyaman ya ipabagbagtu tu'u Hiya!
5 Ti hi Apo Dios ya maphod,
ya nan pamhodna ya minaynayun hi enggana,
ya umat goh hinan atonan mangipa'annung hinan itulagna an minaynayun hi enggana!