40
1 Ya intuluy Apo Dios an inalina goh ay Job di,
2 “Unmu dan inaynayun an mi'hongngel ay Ha"in an nidugah di abalinana?
He"a ya alyom hi un Ha"in di nibahhaw,
at ologmu dan an tabolon nan alyo'?”
Hay Himmapitan Job ay Apo Dios
3 Ya tembal Job din inalin Apo Dios an inalinay,
4 “Ha"in ya mi'id ahan di biyang'u
at hay pambal'un He"a?
Ten mi'id di olog'un mambal,
at un nonong ya empop'uy timid'u.
5 Ha"in ya nalpah an hinapit'un amin di alyo',
at mi'id di udumnah hapito' an anggaynana!”
Hay Himmapitan Goh Apo Dios ay Job
6 Ya tembal Apo Dios din inalin Job hidih nan way puo' an inalinay,
7 “Hagangona', Job, ti waday ibaga' ay he"a,
ya mahapul an tabolom nan alyo'!
8 Undan nan punhumalya' ya alyom hi un nibahhaw,
at Ha"in mah di pabaholom ta he"ay nahamad?
9 Un'a dan mabi'bi'ah ya un Ha"in,
ya undan nan alim ya ay idul an umat ay Ha"in?
10 Gulat ta umat hinay aatmu at ipattigmuy dayawmu ya nan pumpahiyaam
ta paddungnay ilubungmu nan dayawmu ya nan anabagtun di haadmu!
11 Ya ipattigmuy nidugah an bungotmu
ta tigom nan mumpahiya ta ipa'ampam dida.
12 At hamadom an tigon di aat nan mumpumpahiya ta ipa'ampam dida,
ya numpatoymu nan mangamangat hi pumbaholan hinan wadan di timma'doganda.
13 Ya nun'ilubu'mu didan amin
an paddungnay unmu ibalud didad dolom hidih nan wadan di nun'atoy.
14 Gulat ta atom di umat hina at mabalin an ta"on un Ha"in ya ipabagtu he"a
ti nan bi'ahmuy mamaliw ay he"a!
15 Tigom adya nan ongol an animal an behemotha an ni'lumu' ay he"a
an hay onona ya nan holo' an ay baka.
16 Mu henen animal ya nidugah an ma'abbi'ah di odolna ya hu'ina,
17 ya nan iwitna ya ma'andong an umat hinan ayiw an cedar,
ya ma'odhol di lamoh di ulpuna.
18 Ya umat hi gambang di tungalnan ma'odhol,
ya ay gumo' goh di hu'ina.
19 Hiya ya anggay di umipanoh'ay aatna ya un an amin hinan limmu',
at anggay nan nunlumun hiyay way abalinanan mamatoy.
20 Ya hidih nan dudunduntug an pun'ay'ayaman di udum an animal
di awadan di mun'aphod an onon nen limmu' an agguy na'amun a'animal.
21 Ya hiya ya un mali'li'uh an mihi'hi'ug hinan puun di ayiw an wadan di do'ol an hubit
ya hanian nan atata'nang an holo' hiyah nan pingit di wangwang.
22 Ya nan ayiw an humangaw hinan pingit nan unit di nunli'ub ay hiya,
ya nan hapangday munlidum ay hiya.
23 Ya hiya ya adi tuma'ot an ta"on hi un mundatong nan Wangwang an Jordan,
ya ta"on hi un gun mahuyatan di angahna ya un damdama didindinong an adi omogyat.
24 Undan way abalinan di tagun mamulaw hi matana ta dapopona,
unu huluona hiya ta tol'onay olongna ta go'dana?”