41
1 Ya intuluy Apo Dios an himmapit an inalinay,
“Abalinam dan an mampap hinan leviathana hi un hay lawid di usalom,
unu abalinam an mamobod hi hungahungna?
2 Ya abalinam dan an huliton di olongna,
unu ubuton di pangalnah nan angngul?
3 Ya al'alu'on da'a dan ta hom'om hiya,
unu ma'ma'ullay dan di panaphapitnan he"a?
4 Hiya dan hi un mi'tulag ay he"a ta awitom
ta hiyay baalmuh engganah un matoy?
5 Ya ibilangmu dan hiyah ohah ay'ayupmun ay hamuti,
unu go'dam ya indatmuh nan ung'ungngan binabai ta mi'ligwadan hiya?
6 Pohdon dan nan mungkumeldun la'uan hiya ta paltionda
ya nunggogodda ta ila'udah nan malkadu?
7 Ya abalinam dan an punggayang di up'upnan nahbitan,
unu panaon di uluna?
8 Ya gulat ta dinihom hiyah mamenghan at manomnommuy aat di pumpattayan,
at adim ahan ipidwan aton!
9 Adi ahan mabalin an madpap
ti matu"in nan tagun mannig an dumalat hi ta'otna.
10 Ya mi'id ah ohah way olognan mangihtulbun mamangon ay hiya,
at hay ngadan mah di way abalinanan mi'haggangan ay Ha"in?
11 Undan udot waday mangipadah an mungngohoy ay Ha"in hi adi mamolta?
An amin di wah tun luta ya bagi'!b
12 Ha"in ya adi' idinong an gun manapihapit hi aat di umatan nan leviathan,
ya nan aat di amabi'ahna,
unu nan aat di amaphod di odolna.
13 Ya mi'id ah ohah way abalinanan munlalat hinan up'upna
unu mangayang ta munhawang hinan ma'ugtul an up'upnan ay gumo'.
14 Wada dan di mabalin an umuy mana'ang hinan pangalna?
Mi'id ahan ti atata'ot di babana!
15 Nan lahip di bonogna ya nalu"ilu"ip,
at paddungnay un hiyay hapiawna.
16 Danen lahip ya nihamad di nalu"ilu"ipanda,
at adi mabalin an luhgon di tuyup nan numpunda"itanda.
17 Nihamad di nalu"ilu"ipan di nundada"itanda,
at adi mabalin an madi"ang di lahipna.
18 Ya wa ay ta huma'ti ya waday bumuhu' hi olongnan mun'elat,
ya nan matana ya mabnang an umat hinan potang an pa'abbuhu' hinan mawa'ah.
19 Ya gun munggeladaw nan apuy an bumuhu' hi timidna,
20 ya gun bumuhu' di ahu' hi olongna
an umat hinan uhap an bumuhu' hinan bangan nibongat hinan tu'yap di na'apuyan an holo'.
21 Ya nan hodohdana ya ipabalana nan uleng,
ya bumuhu' di apuy hi timidna.
22 Ya nidugah an mabi'ah di bagangna,
at tuma'ot an amin nan manamun hiya.
23 Ya ma'odhol an amin di lamohna
an mi'id ah muymuyammi,
24 ya ma'odhol di puhuna
an umat hinan ngalab di batun adi ahan tuma'ot.
25 Ya wa ay ta bumangon ya tuma'otdan amin nan waday nidugah di abalinana,
ya mi'id di poto' di punnomnomandan dumalat di ta'otda.
26 Nan hanggap an pamagitdan hiya ya un mede'leh,
ya umat goh hi gayang, ya nan pana, unu nan hinalung.
27 Nan leviathan ya ibilangnan ay dagami nan gumo',
ya umat goh hinan gambang an ay nadunut hinan ayiw.
28 Hiya ya adina elan nan me'nan pana,
at adi lumayaw.
Ya nan batun ipaldi'itdan hiya ya hay pun'le'nana ya un ay dagami.
29 Adina goh ma'elan nan pang'ul an ibilangnah umat hinan ohan dagami,
ya abatlana nan gayang an ihimug nan tatagun hiya.
30 Ya nan lahip hi putuna ya mun'atadom an umat hinan tadom di naphal an alewahhang,
at ma'aladu nan lutan pange'wana.
31 Ya ipaluwagna nan danum hi baybay an umat hinan nihaang hi banga,
ya mabalin an kiwalona nan maluhung an baybay.
32 Ya humilin umupag nan baybay an alauhana,
ya pumaha' an lumuwag nan dalanona.
33 Ya mi'id ah ohah nalmuh tun lutah nipaddung ay hiya
an mi'id ahan ah ita'otna.
34 Ya an amin nan nun'abagtun animal hitun luta ya hay pannignan dida ya na'ampada,
at hiyay apun an amin nan mumpumpahiyan animal.”