39
1 Ya intuluy Apo Dios an himmapit an inalinay,
“Inilam dan di na'luman nan agguy na'amun gandeng hinan duntug hi inalahan,
ya hinamadmu dan an tinnig di ni'luman nan agguy na'amun ulha?
2 Inilam dan hi un atnay bulan hi alu'unanda ya unda ma'lum,
unu inilam di algaw hi gutud di a'lumanda?
3 Ya mundu"undah un dumgoh nan putuda ta way atondan mangi'lum hinan imbaluyda,
4 ya home'on nan imbabaluydah nan inalahan,
at agguyda na'amu,
ya taynanda nan ommodda,
ya adida mumbangngad ti mabi'ahda.
5 Hay nangabulut hinan agguy na'amun dongki ta okoddah ayanda?
6 Indat'un dida nan mapulun ta ihinanda,
at Ha"in ya nunhituwo' didah nan lutan mi'id ahan ah humangaw.
7 Ya miyadagwidah nan babluy
ta adida ma'amu ta puntamuonda dida.
8 Nan inalahan di panganapandah ononda,
at manganapdah nan timmubun holo' hi mungmungandah ononda.
9 Mabalin dan an itamum nan agguy na'amun nuwang,a
ya undan mabalin an mihinah nan kolalmu ta molo' hidih nan mahdom?
10 Mabalin dan an eg'odmuy aladuh nan agguy na'amun nuwang
ta aladuona nan payaw unu pungguludon?
11 Ya mabalin dan an e'kodmuh nan amabi'ahna ta hiyay manamuh nan tamum?
12 Ya kulugom dan an okod hiya ya inyanamutna nan paguy an nagapas,
ya inyuynah nan wadan di pun'elekan ta amungona?
13 Nan animal an ostrich ya maphod di atonan mangipayagpag hi paya'na,
mu agguy nipaddung hinan amaphod di paya' nan hamuti an kulung.
14 Ya hay umitlugan nan ostrich ya unna ipu'upu' hinan luta ta nan hupu' di mangipadolnat,
15 ya adina iyod'od hi un way mangigatin hi mamhal hinan itlugna,
unu nan agguy na'amun animal di mamhal ay dida.
16 Ya adina halimunan nan imbabaluyna an paddungnay unna bo'on imbaluy,
ya adina nomnomon di nunligatana an ta"on un way ma'at ay dida
17 ti agguy'u indatan an Dios hiyah la'eng unu ta"on un ah itang hi nomnom.
18 Mu wa ay ta tumagtag ya abakona nan mabi'bi'ah an kabayu ya nan nuntakay.
19 He"a mah, Job, di nangidat hi bi'ah di kabayu
unu nan maphod an adudu"oy an buu' an nihophop hinan tangodna?
20 Ya undan mabalin an ipalattu'mu hiyan umat hi aton nan dudun an mabi'ah an lumattu'?
Wa ay ta ipagangohna nan olongna ta munhodohda ya ipata'otnay tatagu,
21 ya ehi'adnay hu'inah nan luta ta ipa'innilanay aat di amabi'ahna,
ya mi'puddugan an mi'yuy hinan nuntakay an umuy mi'gubat.
22 Ya mi'id di inilanan tuma'ot unu mun'od'od,
ya adi tuma'ot hinan hanggap,
at hodonan adi lumayaw.
23 Ya nan gina'un di mi'gubat an nitayun hinan bane'engna
ya ahikekeleng ya ahi'e'elat nan hanggap ya hapiaw.
24 Ya dumalat nan nidugah an umiyahupana ya nun'alu"ungan nan lutah atona ti umelah,
ya wa ay ta donglona nan gangoh di talampet ya umiyahup an umuy mi'gubat.
25 Ya gun ma'agumuhan an homodohdah nan pangngolanah nan gumanghan di talampet,
ya mabalin an hunghungonay awadan di gubat an ta"on hi un adagwi,
ya pa"adngolona goh di aton nan a'ap'apun mummandal hinan tindaluda.
26 Undan he"ay nangitudtuduh nan gayangb hi atonan tumayap
ta umuy hi appit hi agwan hi un hagangon di buhu'an di algaw?
27 Undan he"ay mummandal hinan ongol an hamutin agila
ta tumayap an umuy hinan ata'nang an duntug ta hidiy pangiyammanah agabana?
28 Ya nan ata'nang an daplah di punhituwana
ta nan mahdom ya nan maluhung an lingab di punhaniana.
29 Ya hidih nan awadana ya unna am'amangon
an ta"on hi un adagwih un way mabalin hi umuyna alan hi onona.
30 Ya nan bunun an imbabaluyna ya wada ay di mapatoy
ya immuy ta pun'inumnay dalana.”