38
Hay Himmapitan Apo Dios hi Nambalanan Job
1 Ya tembal Apo Dios hi Job an hay adngolan di hapitna ya hinan puo' an inalinay,
2 “Ngadan ne han mummahmah hi aat di la'eng'u?
Mi'id ahan di inilanah aat di hapitona!
3 Idadaanmuy odolmu, Job, an umat hi aat di lala'i ti baga' he"a,
ya mahapul an tabolom di alyo'.
4 Hay wadam nin hidin gutud di nunlumuwa' hitun luta?
Mahapul an tabolom ta ibaagmuh unmu inila!
5 Hay nampong hi aat di inongol tun luta,
ya hay nunlukud hi inabellogna?
Ibaagmu mah hi unmu inilay ngadana!
6 Hay namdon mah hi nipabunanan tun luta,
ya hay nangiyammah nan batun pognad
7 hidin immanlaan an amin nan mamigat an bittuan
ya hidin nun'am'amlongan an amin nan a'anghel?
8 Ya hay nanawan mah hinan danum ta waday ipogpogandah din nabhiyan tun luta
ta numpangabuhu' di danum?
9 Henen timpu ya hinophopa' nan baybay hinan ma'ugtul an bunut,
at paddungnay inulha' hinan pa'ahhelong an mangmangitit an bunut.
10 Ya inyamma' di ipogpogan nan danum ta unda munnononnong hinan inyamma' an igad.
11 Ya inali' goh enen timpu di,
Hiyah te igad hi egpongam,
ya adi mabalin an lauham nan igad an inyamma',
ya hiyah te goh di egpongan nan atata'ot an dalluyunmu.
12 Undan he"ay nummandal ta mawaday helhelong,
unu he"ay nangalih bumuhu' nan potang?
13 Ya undan he"ay nangalih nan potang an patalanan amin tun luta ta engganah nan pingitna
ta pumbudhana ta mun'attigda nan mangamangat hi nappuhih nan helong?
14 Ya mattig di aat tun lutah un mapatalan
an umat hinan map'ol an uklit an ul'ulodyon ya pumbalinon nan munduwin hi panginnilaan an gina'u
unu umat hinan lo'ob an palpaliwan ya pumbalinon nan munda'it hi panginnilaan an lubung.
15 At abakon nan patal nan gun mangat hi nappuhi,
ya ipadinongna dida ta mi'id ologda.
16 Undan immuymu tinnig nan obob an nalpuwan nan danum hi baybay,
unu immuymu dan lene'od nan dotal di maluhung an baybay?
17 Ya wada dan di nangitudun he"ah awadan di pantaw di nahelngan an awadan di nun'atoy,
18 ya ininnilam mah goh di inan'ongol ya inabellog tun luta?
At ulgudom ay Ha"in di aatnah un immannung an inilam!
19 Hay nalpuwan mah di patal,
ya hay ayan mah di helong?
20 Abalinam dan an mangitnud ay dida ta iyuymuh nan nihinanda,
ya inilam dan di owom an umuy hidi?
21 Mabalin nin an abalinam ti limmu da'ah nahhun ya un mawadan amin tun nalmu,
ya ten na'alla'ay'a,
at do'ol di inilam!
22 Ya immuy'a dan ta himmigup'ah nan nitalepnan di dalallu,
at tinnigmu dan di niyammana ya hay nitalepnana?
23 Hana ya nun'italepon'u ta engganah tun gutud di algaw an pumpapattayan nan munggugubat.a
24 At hay wadan mah di dalan an miyuy hinan lugal an wadan di bumnangan nan mumbanigit an ilat,
unu nan lugal hi alpahan di tuyup?
25 Ya hay nunlumuh nan ginnaw an pange'wan nan ongol an udan,
ya hay nangituduh pange'wan di ilat?
26 Ya hay nangidat mah hi udan hinan lutan mi'id ah nunhitu,
27 ya hay mangipa'udan mah hi manepnah nan mamagan nun'abhin luta
ta way aton nan ayiw ya holo' an tumubu?
28 Wada dan di ommod di udan ya nan dulnu,
29 ya hay ngadan mah di ommod di dalallu?
Hay nangitungaw mah hinan napinun dalallun magah an malpud dayah
30 un umodhol nan danum an umat hi ama'odhol di batu
ta nan tu'yap nan lobong ya umodholda?
31 Abalinam dan an punhuhu"upon nan natuntunud an bittuan an Pleiadesb
unu punhiyanon nan na'amung an bittuan an Orion?c
32 Ya abalinam dan an mangituduh nan numbino'ob'on an bittuand ta way atondan bumuhu',
ya abalinam dan an mangituduh dalanon nan abittubittuan an Beare
ya nan paddungnay imbabaluynan bittuan ad daya?
33 Inilam dan di uldin hi ma'unud ad abuniyan
ya nan aton Apo Dios an mangipapto' hitun luta?
34 Ya abalinam dan an tu'u'an an mandalon nan bunut
ta way atonan mangipa'alih udan ta lobngona tun luta?
35 Ya abalinam dan an honogon nan ilat
ta unudonday pohdom hi ayanda an alyondan he"ay,
Tiya an immali ami!
36 Hay nangidat hi abalinan di tagu ta mawaday pun'awat ya ananomnomanda?
37 Wada dan di nala'eng an mangyap hinan bunut,
unu ngadan di way abalinanan mangihiit hinan nittuwan di danum ad dayah
38 un mumpanga'odhol nan hupu' ya nun'ap'ol nan luta?
39 Ya abalinam dan an iyanupan nan layon ta bubuhgom
nan i"itang an imbabaluydan munhinaang
40 hi unda mipo"oy hinan liyang
unu unda munhood hinan wadan di nipo"oyanda?
41 Ya ngadan di mangidadaan an mangidat hi onon nan gayang
hi un mumpabadang nan imbabaluydan Ha"in
hi unda munhinaang an mi'id di pangngalandah ononda?”