34
1 Ya himmapit goh hi Elihu an inalinay,
2 “Da'yun nun'anomnoman ya nun'ala'eng ya donglonyu tun hapito'!
3 Nan inga ya hiyay mangimmatun hinan maphod an hapit,
ya umat hinan timid an hiyay manamtam hinan maphod an ma'an.
4 At un ditu'uy manamad hi immannung,
ya ditu'uy manahapit hinan maphod di aatna
5 ti inalin Job di,
Mi'id di bahol'u,
mu adi abuluton Apo Dios di aat'u!
6 Ya inalina goh di,
Ta"on hi un nahamad di aat'u mu imbilanga' hi munlayah,
ya ten nidugah di indat Apo Dios hi dogoh hi holholtapo' an ta"on hi un mi'id di inat'uh nappuhi!
7 Waday tinnigyuh taguh umat ay Job
an pahiwonah Apo Dios an adina ahan e'gonan?
8 Ti nan i'ibbana ya nan tatagun nun'appuhiy pangatda,
ya mimiddum goh hinan gun nun'abaholan.
9 Ya inalina goh di,
Mi'id ahan di lagbun di tagun mangunud hinan pohdon Apo Dios!
10 At da'yun numpanginnila ya donglonyu tun hapito'
ti an amin di tatagu ya iniladan hi Apo Dios ya adi ahan mumbahol,
ya Hiya an Nidugah di Anabagtuna ya adi ahan mibahbahhaw.
11 Nan tagun mangat hi maphod ya idat Apo Dios di maphod hi lagbuna,
ya nan mangat hi nappuhi ya nappuhi goh di midat hi lagbuna.
12 Immannung ahan an hi Apo Dios an nidugah di abalinana ya adina aton di nappuhi,
ya adina ahan ipangngel di panumalyana.
13 Undan way nat'on hi nangidat hi abalinan Apo Dios,
ya undan way namto' ay Hiya ta Hiyay mangipapto' hitun tatagu?
14 Gulat hi unna pohdon ta bangngadona nan amatagun inhodohdana ay ditu'un tatagu
15 at munnaud an mun'atoy tu'un amin ta mumbalin tu'uh hupu'.
16 At gulat ta waday la'engmu at donglom hete,
ya ingaom ta ihamadmun innilaon.
17 Undan mabalin an mumpapto' nan mamahiw hinan nahamad an panumalya?
Adi ahan mabalin!
At undan mabalin an boholom, Job, nan munhumalya an nahamad di pangatna ya nidugah di abalinana?
18 Hi Apo Dios ya boholona nan a'ali ya nan a'ap'apuh tun lutan nun'appuhiy pangatdan mumpapto'
19 ti Hiya ya adina itigaw hinan aat di abalinan nan tagu,
ya adina goh ipangngel di pangatnah nan adangyan ya nan nawotwot
ti Hiyay nunlumun amin ay dida.
20 Ditu'un tatagu ya un na'amtang at mun'atoy tu'uh tongan di labi,
at mun'a'ubah tu'u.
Hay udum ya awiton Apo Dios dida,
at mami'idda.
Ta"on nan a'ap'apu ya matoyda an dumalat hi Apo Dios an bo'on hay taguy mamatoy.
21 Ya ihamad Apo Dios an titiggon di aat di nitaguan nan tatagu
ya an amin nan gunda aton.
22 Hiya ya mapatal di pannigna
an mi'id ah helong hi mabalin an mananih ipo"oyan nan nun'abaholan an mangamangat hi nappuhi.
23 Ya adi mahapul hi unna ibaag di algaw hi gutud di ahumalyaan nan tatagu
24 ya adi mahapul hi unna ipa'innilay pangaananah nan ohan ap'apu
ta ihukatnay udum hi mumpapto'
25 ti Hiya ya i'innilanay gunda aton an nappuhi,
at anona didah nan haadda,
ya nun'ipapatoyna didah nan tongan di labi.
26 Ya paligatona danen nun'abaholan hinan wadan di hinagang di do'ol an tatagu
27 ti din'ugda Hiyan unudon
ti agguyda ahan inat nan miyunnudan hi pohdona.
28 Ya diday gun dumalat hi punlilian nan nun'awotwot ay Apo Dios,
at donglona nan ililin nan maligligatan an mumpabadang.
29 Mu gulat ta un didindinong hi Apo Dios
at undan way biyang nan mamahal ay Hiya?
Mi'id di abalinan di tataguh un adi haggungon Apo Dios.
30 Ya atona hana ta ibaliwnay pumpapto'an nan tagun agguy kimmulug
hinan atondan mamalbalih nan tatagun paddungnay unda iyammay huluda.
31 He"a, Job, ya unmu dan inalin Apo Dios di,
Ha"in ya immannung an numbahola',
mu adi' mahkay ipidpidwan mabaholan.
32 At itudum nan inat'un agguy'u inila,
ya gulat ta numbahola' at adi' ipidpidwan aton.
33 Un mah mabalin an abuluton Apo Dios nan odowom ay Hiyah un'a adi muntutuyuh baholmu?
At hay maphod ya he"ay okod an munnomnom hi atom ta bo'on ha"in,
at ibaagmuy maphod hi inilam.
34 An amin di mundongol ay ha"in an ta"on hi un nan nun'anomnoman ya nan nun'ala'eng an mangngol
ya abulutonday alyo',
ya alyonday,
35 Manu ay umat hinay panaphapit Job
ya un mi'id di inilanah ibalbalinah nan al'alyona.
36 At pa"innilaonyu adya nan inali'alin Job
ta innilaonyu an nan panaphapitna ya umat hinan panaphapit di nun'appuhin tatagu.
37 Ma'innila an nidugah di boholna ti gunna itugtugan humapihapit,
ya din'ugna goh hi Apo Dios ti gunna pihulon Hiyah hinagangna.”