35
1 Ya innaynayun goh Elihu an inalinay,
2 “Adi maphod, Job, hi unmu alyon ay Apo Dios
hi un mi'id di baholmun Hiya!
3 Ya anaad ta alyom goh ay Hiyay,
Mi'id di hulbin di pangun'unuda' ay He"a,
ya hay lagbu' an agguy numbahol?
4 Ya hay pambal'un he"a enen inalim ya hi an amin hinan liligwam ya alyo' di,
5 Tangadom ad daya,
ya nuntiggatiggaw'a,
ya inhamhamadmun mannig hinan bunut hi bagtun nan wadam.
6 Gulat ta mumbahol'a ya undan way ma'at ay Apo Dios?
Ya ta"on hi unmu iyal'allan gun mumbahol ya undan pumuhih Apo Dios?
7 Ya undan way ibadang nan maphod an inatmun Apo Dios?
Ya undan way mahapulnan he"a!
8 Hay ilagat nan maphod unu nappuhin inatmu ya nan tatagu ya anggay.
9 Nan tatagun mipaligligat ya la'tot ya kumiladan dumalat nan nidugah an holholtaponda,
ya ngumulngulda ta mabaliwandah nan pangat nan nidugah di abalinanda.
10 Mu bo'on hi Apo Dios an nunlumun diday pumpabaddanganda
an ta"on hi un Hiyay gun mangal'alu' hinan tatagu ta way atondan mungkanta
an ta"on hi un hinan mahdom.
11 Dida ya adida e'kod ay Apo Dios an nangidat hi anala'eng tu'u
ta ditu'uy nala'la'eng ya un nan animal ya an amin hinan numbino'ob'on an tumayap.
12 Ya manu ay adi badangan Apo Dios didah unda mun'adaw hi badangna
ti nan pumpahiyaanda ya nan gunda pangatan hi nappuhi.
13 At mi'id di hulbin di pun'adawandah badang Apo Dios an nidugah di abalinana
ti adina donglon di ibagada.
14 Ya inyal'allanan adi da'a donglon, Job, hi unmu alyon di adim tigon Hiya,
mu nalpah an nidat nan diklamun Hiya at mahapul an mehodan'a.
15 Undan hay ninomnommu ya adi tigon Apo Dios nan mumbahol,
at adina moltaon?
16 He"a, Job, ya mi'id di hulbin nan gunmu hapiton
ti ma"innilan ay nakudang di nomnommu!”