33
1 Ya intuluy Elihu an himmapit an inalinay,
“He"a Job,
ya ihamadmun donglon tun hapito'
2 ta ipabuhu"un amin di wah nomnom'u.
3 Ha"in ya makulug an amin tun hapito'
an mi'id ah layah.
4 Nan Na'abuniyanan an Lennawa di nunlumun ha"in,
ya nan hodohdan nan na'abbagbagtuy nangidat hi nitagua'.
5 Mabalin an tabolona', Job, hi unmu abalinan,
at idadaanmuy hapitom hi pambalmun ha"in,
ya inhamadmu.
6 Ti numpaddung di aattah nan hinagang Apo Dios
ti ha"in ya nan uklit di nalmuwa' an umat goh ay he"a.
7 At adi'a tuma'ot ay ha"in
ti adia' umat hinan udumnan nabagtun tagun umipawogwog an umipata'ot ay he"a.
8 Mu he"a, Job, ya himmapit'a,
ya inhamad'un dengngol an amin din hinapitmun inalim di,
9 Ha"in ya nahamad di aat'u,
ya mi'id ah bahol'u,
ya maleneha' ti mi'id ah inat'uh nappuhi.
10 Mu hi Apo Dios ya un manganap hi pumbahola' ta pangiga'idana,
ya imbilanga' hi buhulna.
11 Ya paddungnay unna kinanhilan tun hu'i',
ya hinamadnan titinnig an amin di panalan'u ya nan gun'u aton.
12 Mu hay pambal'uh nan inalim, Job, ya nibahhaw'a
ti hi Apo Dios ya nidugah an na'abbagbagtu ya un hay tagu.
13 Ya anaad ta munlili'a ta amuyuam Hiya
an inalim hi unna adi donglon di ibagan nan tagu?
14 Hi Apo Dios ya numbino'ob'on di atonan mi'hapit hinan tatagu,
mu un hin'ing'ingaon nan tataguy alyona.
15 Ti mi'hapit hinan enap
unu un mumpa'ilah nan labih nan alenggopan di tagun molo'.
16 Ya unna goh iyab'abu'ab an ipaeng hi ingadan mi'hapit,
at tuma'otdah unda donglon nan pamadanan dida.
17 Manu ay atonah na an mi'hapit ya ta al'alu'ona dida
ta hukatanday ugalida,
ta adida gun mumbahol,
ya ta adida goh mumpahiya.
18 Ya hawanana didah nan umayandah lubu',
at elwangna dida ta adida mapatoy.
19 Hin'umu'uddum ya hay dogoh di panugun Apo Dios hinan tatagu,
ya nidugah di ha'itnan ta"on nan tungal ya ahihaha'it
20 ta omod unda adi pohdon an mangan,
ya ta"on un nan mapolhat an ma'an ya adida ahan pohdon an patnaan.
21 At ma'ung'ungdan mun'iyamit di up'updah nan tungal,
at mun'attig di talagatagda.
22 At magadyuh di atayanda,
at miyuydah lubu' an ilubu'an di matoy.
23 Mu gulat ta waday mangihapit ay dida
an ta"on hi un ohah nan hinlibun anghel ad abuniyan
ta hiyay bumadang an mangibaag hinan nahamad hi aton nan tatagu,
24 ya gulat ta igohgohana dida ti ma'ahhimo' ta alyonay,
Adiyu patayon ti waday ihandi' ay dida!
25 At pumhod di odolnan tumaba,
at ay ungay tigawna,
ya mabi'ah mahkay an umat hidin a'ungana.
26 Ya wa ay ta munluwalu ya abuluton mahkay Apo Dios,
at ipa'amlongna hiya ti numbalinon Apo Dios an nahamad di aatna.
27 At ibaagnah nan tatagun alyonay,
Ha"in ya numbahola' an nan nun'appuhiy ina'inat'u,
mu hemmo'a' ay Apo Dios ta inaliwanay bahol'u.
28 Hi Apo Dios ya binaliwana' ta agguya' impiyuy hinan wadan di nun'atoy,
at ten ad ugwan ya mi'yam'amlonga' ti maphod di nitagua' mahkay!
29 Makulug an hi Apo Dios ya adi un namenghan unu namidway nangatana
ti gunna aton hinan tatagu
30 ti binaliwana didah nan atayanda,
ya indatnay maphod hi pun'am'amlongandah nan pi'taguanda.
31 Ihamadmun mundongol, Job, at ingaom tun hapito',
ya dindinong'a ta udma' di hapito'.
32 Mu gulat ta waday pohdom an alyon ya aga ta alyom ta donglo'.
Nidadaana' an mangabulut hi un nan alyom ya nepto'!
33 Mu gulat ta mi'id di pambalmu at duminong'a ta donglona'
ta ituduwa' he"a ta way atom an luma'eng.”