32
Hay Ni'hapitan Elihu hinan Liligwan Job
1 Nan tulun liligwan Job ya unda didindinong an agguyda tembal din inalin Job ti agguyna inabulut hi un waday baholna. 2 Mu hi Elihua an hina' Barakel an nalpud Busb an holag Ram ya ma'abbungot ay Job hi numpahiyaana, ya bo'on at goh hi Apo Dios. 3 Ya ma'abbungot goh hiyah nan tulun liligwan Job ti mi'id ah ninomnomdah maphod hi nambaldan hiya, mu pinahiwdah Job damdama. 4 Ya hehennod Elihu ta diday mahhun an humapit ay Job ti mina'ma'ellogda ya un hiya. 5 Mu unat goh ininnilanan mi'id ah ohan didah mambal ya ma'abbungot ay dida. 6 At hi Elihu an hina' Barakel an nalpud Bus ya inalinay,
“Da'yu ya mina'ma'ellog ayu,
at hiyaat un'u hehennod an agguy'u imbaag din ninomnom'uh pambal'u.
7 Alyo' at goh hi nomnom'uy,
Da'yun mina'ma'ellog di humapit ti nan mina'ilog ya nun'anomnomanda.
8 Mu immannung an nan Na'abuniyanan an Lennawan miyo'odol hinan tagu
an nalpuh nan Nidugah di Anabagtuna ya Hiyay mangipala'eng ay dida.
9 At bo'on nan mina'ma'ellog ya anggay di way la'engna,
ya bo'on goh dida ya anggay di nanginnilah aat di nahamad an napto'.
10 At donglonyu ni' ahan ta ulgudo' an amin nan wah nomnom'u.
11 Ha"in ya inanuha' an nundongol hinan nanahapitanyuh
atonyun mangipadah hinan abalinanyun mangal'alu' ay Job,
12 ya dedengngol'u nan nunhahapitanyu,
mu mi'id ah ohan da'yuh nambal hinan hinapitna.
13 Ya hay umatan mah nan pangalyanyuh unyu inah'upan di la'eng?
Mu ta"on ya inaliyu goh di mahapul an hi Apo Dios di okod an mambal ay Job ti nen mi'id di ologyu.
Hiyah ne inaliyu!
14 Mu gulat un ha"in di ni'hapit ay Job
at adi umat hinan nambalyuy ato' ti waday nat'on hi pambal'u.
15 Nan tulun liligwam, Job, ya manoh'adan mi'id di pambalda
an unda didindinong ti mi'id ah nomnomondah pambaldan he"a.
16 At ngadan di ato'?
Un'u mah hodhodon di humapitanda,
unu nonong ya unna' didindinong?
17 Mu adi umat hina ti mahapul an humapita' damdama
ta ibaag'uy inila' an wah nomnom'un pambal'u.
18 Adia' ahan pa"edpol hi unna' adi humapit
ti do'ol di ninomnom'uh pambal'u!
19 Adi' ay hapiton tun do'ol an inila'
at umata' hinan nittuwan di pa"alhag hi bayah an na"apnu,
at bumdu'!
20 At mahapul an humapita'
ti ten adia' mehodan ta alyo' tun pambal'u.
21 Ya mi'id di ohan da'yuh pangipangngila' unu ipahiya'
22 ti gulat ta ato' hene at ummannung an moltaona' hinan nunlumun ha"in.”