4
Sota ogadin anam ma dag-en ni toon ebaliwan i toka pannemnem
1 Ebaloshak tep naka mengitosho ni maypangkep so nen Apo Jesus, isonga iyay iray shewaten ko son si-kayo. I-enam jo komay ogadiyo shi piyan nen Apo Shiyos ja dag-en ira nonta pinidi ton too to. 2 Isonga mesepol la eg kayo ontangsit, no diket mesepol la man-i-inanos kayo, ta si-katoy ka-asan to ey waray semek jo so ni sakey tan sakey son si-kayo. 3,4 Ipekat joy kabaalan jon man-i-inawatan, ta si-katoy emengi-kan ni olnos jo. Saksakey nonta Ispirito Santo nen Apo Shiyos ja wara son si-kayo; isonga may-eshig kayo ey singa saksakey bengat i bakdang jo. Sakey bengat pay i namnama jon toshongen niman na inewat shakejo nen Apo Shiyos ja too to. 5 Sakey bengat i Apo tayo, sakey ngo bengat i tayoka pemati, jet nonta inkabonjag tayo, saksakey ngo bengat i olog to. 6 Si Apo Shiyos, sakey bengat, jet si-katoy Ama ni emin na emati. Si-katoy Kangeto-an na emin, enshiy eshom, tan si-kato pay i emengitoshay son si-katejon emin, tan si-katoy eman-iyan son si-katejon emin.
7 Waren kenshat i inkaasi nen Cristo son si-katejon emin, nem aliwen nan-i-inges i dokod ni toka i-akan na kaasi so ni sakey tan sakey son si-katejo. 8 Sajay ya inpangi-kan to ni kaasi, naypadto met nonta bayag; isonga wara iya naysolat ja esel nen Apo Shiyos ja kowan to ey, “Idi dimaw shi naykayang, eshakel i intakin ton piriso, jet waray inwaris ton pansigshan ni totoo.” Kowan nonta naysolat. 9 Jet ngantoy piyan ton amta-en tayo ni inkowan to so ey dimaw shi naykayang? Enshiy eshom nem eg say piyan ton amta-en tayo koma, si Jesus, dimespag nin alid ja kad-an tayon dobong ja kabeba-an. 10 Saja si Jesucristo ja dimespag ali, si-kato met laeng nga mismo sota kimayang ded dangit ja kakedjangan, jet say kabol la kinedjangan to, say si-katoy mengitoshay ni emin na angken nganto, say enshiy pankodangan sha. 11 Jet sotan na in-akan ton kaasi, ekalkalasi; isonga ekalkalasi ngoy dag-en tayo. Jet wara iray apostol, wara iray para padto, wara iray mengikowan met laeng ni maypangkep son si-kato, tan wara iray emantosho tan emengiredan ni emati. 12 Jet say pangkep nen Apo Shiyos ni engi-kanan to so niyay, say onkedsang i pamati ira nonta emati son si-kato, ja may-eshig ey bakdang to, tan say amta-en shen emin i pesing sha. 13 Jet no sajay i medeka, manseksekey kiton emin shi pamati, tan amta-en tayon pasiya sota maypangkep so nen Jesucristo ja Anak nen Apo Shiyos, tan onba-deg kitod pamati tayo, ja enshiy pankodangan tayo, jet say ingesen tayo sota ogadi nen Jesucristo. 14 Aliwen kito on-onong koma ja singa nga-nga ni olay, ja edaken i-owapan ni toon matekal la mengi-owap, ono edaken ma-ewis nem waray badon toro. Sajay ya itsora, may-eshig nodta barkon sini-bok ni shagem, ja olay toy toshongen to. 15 Nem si-katejo, mesepol la sota podnoy medeka, ja metaksholan ni semek, say sota pamati tayo son Cristo, onba-deg; eg meki-to-an. Si Cristo, si-katoy singa toktok tayo, 16 jet si-katejon emati so nen si-kato, si-katejoy may-eshig ey bakdang to met laeng. Si-katoy esa-nopan tayo, ja singa nan-a-aspolan tayon emin ja emati. Si-katejoy nay-inges mowan nodta kaikedsang nonta bakdang. No mapteng i ka-olnos nonta bakdang, ja eman-obden emin sota olat to, onba-deg tan onkedsang sotan na bakdang. Jet no si-katejo ket, mapteng i olnos tayo, wara ni olay i semek.
17 Jet niman, iyay i ibilin ko son si-kayo ja edapo met laeng so nen Apo Jesus. Say kowan to, karejo ma onoran i ogadi ira nonta toon enshiy Shiyos sha, ta enshiy kenkenshat nonta wared nemnem sha. 18 Isonga si-kara, may-eshig ey wara ired embolinget, ta enshiy shaka ewati. Enshi son si-kara sota biyag ja enshiy to engintegan ja edapo so nen Apo Shiyos. Sajay i kasesaad sha tep etangken i nemnem sha, nakol ni enshiy amtara pangkep son Apo Shiyos. 19 Enshin polos pay i bebaing sha jet naydowam ma ira. Isonga na-alas ma ni olay i aramid sha jet pipiyan shen dag-en i angken nganton aramid ja ngaaw. 20 Nem si-kayon emati, enshiy toron sotan na inashal jo ja edapo so nen Cristo. 21 Si Jesus si-katoy kawad-an ni podno. Isonga niman, ta inewatan jo sota toron maypangkep so nen Jesus, 22 ibi-jag jo sota ngaaw wa ogadiyon sigod, ja istay joka on-onora nontan da, ta sotan na ogadi, istay ya ememilshi ni nemnem. Ta say itsora niyay ya ogadiyon sigod, joka dagdag-a sota pipiyan jon dag-en, nakol ni si-kayo met laeng i nay-owapan. 23 Mesepol la mebediwan na emin i joka pannemnem, 24 jet sota badon ogadi ma i maysa-dat ja in-akan nen Apo Shiyos son si-kayo, say mewad-an kayo ni ogadi ja inges tos Apo Shiyos. Ta say kowan ni podnon esel to, sota koskostoy dagdag-en tayo ja inges tos Apo Shiyos.
25 Isonga niman ma, ibi-jag joy pengi-o-owap, jet sota podno i ikowan jo so ni kait jo, ta emin kiton emati, saksakey kito so nen Cristo. 26 Isonga no bilang ey waray bongetan jo, aliwen kayo mandeka ni ngaaw. Tan aliwen jo isan-akew i bonget, 27 say enshiy pengiringanan nen Satanas ja mengewis son si-kayo.
28 No waray makibot ja naykait son si-kayo, ibi-jag to komen mengibot. Man-obda et koma ni kosto say makatolong so nonta ira makasapol ni tolong.
29 Karekayo mengikokowan ni kasesakit ta esel. Say pesing jo komen mekitbal, i-enam jo nodta kasapolan ni mengitneng, say mapteng i pengitneng sha, tan say onkedsang i pamatira. 30 Aliwen kayo mandeka ni ngaaw ja kesekitan ni Ispirito Santo nen Apo Shiyos. Sota Ispirito Santo ja wara son si-kayo, si-katoy may-eshig ey malka nen Apo Shiyos son si-kayo. Si-katoy ka-asan to ey kokowa shakejo ma et si-katoy amta-an so ey enayen to ali sota inkaysalakan jo.
31 Emin iyay ya aramid, ibi-jag jo: sota bonget, igem, kolkol, somang, tan sota pengokes so ni kait; tan aliwen waray jo pa-paiten. 32 Say mapteng koma ja dag-en jo, sota pansigshan ni sakey tan sakey son si-kayo, tan pankinaasi kayo, tan mesepol pay ya amtayon memekawan ni kait jo no waray nanbasolan to son si-kayo. Ta angken si Apo Shiyos, pinekawan shakejo ni basol jo, kabol ni inpamatiyo son Cristo.