SOTA SOLAT NEN SAN PABLO PARA SO NONTA IRA
I-PILIPOS
1
1 Si-kak si Pablo, ja makasolat niyay et say kadlak, si Timoteo. Si Cristo Jesus i mismon engibetkag son si-kami ja mansilbi son si-kato; isonga itnengi jon pasiya iya ikowan mi. Jet sajay ya solat, para son si-kayon emin ja kait min too nen Jesus ja wared siyodad ni Pilipos, agdalo son si-kayon pangolo ni ematid tan, tan son si-kayon para tolong met laeng so nonta ira emati.
2 Say shawat ko son Apo Shiyos, sapay koma ta kaasi-an shakejo, tan a-shoman to pay sota talna ja wara son si-kayo ja edapo met laeng son Apo Shiyos ja Ametayo, tan si Apo Jesucristo.
No nemnemen takejo, naka man-imdeng
3 Si-kayon tood Pilipos, eg takejo dibdibkan. Isonga no nemnemen takejo, naka man-iyaman son Apo Shiyos ja naka shedjawa, ni maypangkep son si-kayo, 4 jet no manshelatak son Apo Shiyos ni pansigshan jon emin, naka man-imdeng ni olay. 5 Ta ekak dibkan sota inpankakadla tayo ja engikowan nonta mapteng nga shamag pangkep so nen Cristo nanshogi nonta badbado kayo nin ja emati, ingkato niman.
6 Jet ebadeg i namnamak ey si Apo Shiyos, ja engaasi son si-kayo nonta pilmiron emati kayo son Cristo, si-kato met laeng i mengitodoy so nontan na mapteng nga obda to son si-kayo ingkatod onsabi ali sota akew wa idaw mowan nen Jesucristo ja mandepod dangit. Ta sotan aliy ka-enay ni kaysedakan jo. 7 Anam ton sajay mango i wared nemnem ko pangkep son si-kayon emin, ta ebadeg i naka pengisekit son si-kayo. Ta sota kaasi nen Apo Shiyos son si-kak, inbetkag towak ja en mengitosho ni mapteng nga shamag et singa kayoka mayda-kam ni olay inges to nem wara-ak shiya badoran ono nonta ekak naybalod pay laeng. Ta nontan den ewaya-ak pay laeng ja emengitosho nonta mapteng nga shamag pangkep so nen Jesucristo, inatngan jowak, jet niman, eshakel ma iray koston emati. 8 Si Apo Shiyos, amta to ey naka mansespi ja piyan kon pasiya ja asen takejo, ta say semek ko son si-kayo, inges toy semek nen Cristo Jesus son si-kayo. 9 Jet say shawat ko son Apo Shiyos maypangkep son si-kayo, mas ma-shoman komay semek jo ni sakey tan sakey, tan metaksholan koma ni daing ja medepo son si-kato met laeng, tan kosto komay pannemnem jo ni olay. 10 Sajay i shawat ko, say amta-en jon memidi ni kamaptengan na ogadi, say eg kayo manbesol, tan say enshiy jo kebedawan niman na kawashayo pay laeng shiya biyag, ingkatod onsabi sota akew wa idaw ali nen Cristo. 11 Piyan kon waray pengasan ko ey agpayson inonod jo sota mapteng nga ogadi ja edapo so nen Jesucristo, ta no asen ni too ey mapteng i ogadiyo, si Apo Shiyos i ishayaw sha, ta si-katoy kabol ja nanbalbalilan jo.
Saja naybaloshan ko ket, mapteng i nanbanagan to
12 Si-kayon a-aki shi pamati, piyan kon amta-an jo ey emin sota digat ja epasemak son si-kak, waray mapteng nga nanbanagan to. Ta sota mapteng nga shamag maypangkep so nen Jesucristo, eshakel i engitneng. 13 Jet say pilmiron mapteng nga nanbanagan to, inamta-an ira nonta kowadja ni ari shima baley to, tan angken sota ira emin na wared ja badoran, jey say kabol la naybaloshan ko ket sota maypangkep ni pamatik so nen Cristo. 14 Jet say sakey pay, karakdan so nonta ira a-aki tayo shi pamati i kimedsang so nen Apo Jesus jet say kabol la kinedsangan sha, saja inkabedod ko. Jet enshi may takot sha ja mengitosho nonta esel nen Apo Shiyos pangkep so nen Jesucristo.
15 Amtak met kitdi, jey waray eshom ma emengitosho pangkep so nen Cristo, nem say wared nemnem sha, ket apal sha son si-kak, tan piyan sha pay ya onkontra son si-kak. Nem wara ngoy eshom ma emengitosho ja agpayson mapteng i pangkep sha. 16 Jet sota ira mapteng i pangkep sha, si-kara sota waray semek sha son si-kak, ta amtara ey say inpalobosan so nen Apo Shiyos ey maybedorak, say itakshel ko sota mapteng nga shamag pangkep so nen Jesucristo. 17 Sota ira mango emengitosho ja ngaaw i pangkep sha, say wared nemnem sha, sota panmaptengan sha bengat, jet sajay i shaka pandag-a, ta kowan sha ey angka et nem ma-shoman iya naka pandigdigat shiya badoran. 18 Nem ekak panshanagan iyay. Angken ngaaw i pangkep sha, ono mapteng, no itoro sha et i mapteng nga maypangkep so nen Cristo, man-imdengak pay laeng.
Jet mas man-imdengak pay, 19 ta amtak ey sota emepespesamak son si-kak, panmaptengan ko met laeng. Jet amtak ey metongpal ali sota mapteng nga panbenagan ko tep kayoka manshelat so nen Apo Shiyos ni pansigshan ko, tan sota tolong pay nonta Ispirito Santo nen Jesucristo. 20 Jet say wared nemnem kon pasiya, namnamak ey ekak onkapoy ja mansilbi son Cristo, no diket onkedsangak ni olay ja inges toy naka pesing nontan da ingkato niman. Namnamak ey si Cristoy mayshedjaw shi emin na naka dagdag-a, ni kawashak pay laeng shiyay ya biyag, ket no si-katoy kabol la keteyan ko. 21 Ta si-kak, niman na wara-ak pay laeng shi biyag, wara-ak son Cristo et naka pandadsaki; nem no meteyak, mas edaddadsakak pay mowan ali shi dangit. 22 Isonga ekak tongolan shiya showa no toway pidi-en ko, ta no on-onongak pay laeng nga manbibiyag, asdeg toy mebedin na dag-en ko. 23 Isonga entapik i showen panpidi-an ko et ekak tongolan no towed jay ya showa. Singa piyan kon metey say ondawak shagos shima kad-an nen Cristo, ta si-katoy kamaptengan. 24 Nem kasapolan pay laeng ni eshakel la too i kawashak shi biyag, ta waray itolong kon pansigshan jo. 25 Isonga amtak ey ekak nin metey, ta mesepol jo pay laeng i tolong ko, say onkedsang i pamatiyo, jet man-imdeng kayo nodtan na pamatiyo. 26 Kenshat ta mebodosak, ta no sotan i medeka, mas pay ya si Cristo Jesus i panshedjawan jo, ta wara-ak da son si-kayo.
27 Asas joy itsora ni ogadiyo. Mesepol la may-enam shi toro pangkep so nen Cristo, say no angken bilang ey ondawak da, ono enshi, mapteng ali komay shamag maypangkep son si-kayod tan, ja saksakey i nemnem jo; kasta met i pangkep jo. Amta-en ko koma di ey kayoka mantitinolong, say eg kayo ma-ebak no kontra-en shay pamatiyo ja edapo nodta mapteng nga shamag pangkep son Cristo. 28 Jet say piyan kon amta-en pay pangkep son si-kayo, eg jo tekotan sota ira makakontra son si-kayo, angken ngantoy pesing sha. No eg jo ira tekotan, sotan i amta-an sha so ey si-kara et ngo mowan i ma-ebak ni anongosto jet si-kayo i isalakan nen Apo Shiyos. Si Apo Shiyos met laeng i mengipa-amta nontan son si-kara, 29 jet elatan sha ey angken sota joka pandikat, ontolong si Apo Shiyos son si-kayo, ja eg shakayo i-oway. Ta alilen sota inpamatiyo son Cristo bengat i inpalobos nen Apo Shiyos son si-kayo, no diket inpalobos to pay ja manda-kam kayo ngo ni digat pangkep son si-kato. 30 Nontan da, inon-an joy inpalikat sha-ak so ni makakontra son si-kak ni naka pansilbi son Cristo, jet shinemag jo pay jey angken niman, marama pay laeng. Jet niman, angken si-kayo ngo, joka panda-kami iyay ya digat.