6
1 Si-kayon a-anak, mesepol la pati-en jo ni olay sota kowan ni maka-anak son si-kayo, ta sajay i mapteng nga pesing ni emati so nen Apo Jesus.2,3 Waray bilin nen Apo Shiyos maypangkep niyay, ja kowan to ey, “Shayaw jo si amejo nen inejo, jet si Apo Shiyos, bindisiyonan shakejo jet onshokey i biyag jo shiya dobong.” Sajay i maykedima nodta sampolon bilin nen Apo Shiyos, nem sajay i pilmiron etaksholan ni mapteng nga sobadit so nonta ira onpati so.4 Jet si-kayo ngon a-ama, karejo ida-karan i annak jo ni seg-ang, say enshiy sha bongetan; no diket say pesing jo et mango, bilin jo ira, tan tod-iyo ira pangkep so nen Apo Jesus.
5 Si-kayon baga-en, patiyo ni olay ja emin sota ikowan ni apo jo. Shayaw jo iren pasiya, topog jo iren pansilbi-an, ja inges toy joka pandag-a maypangkep so nen Cristo. 6 Aliwen man-edisto kayo bengat nem wara sota apo jo ja emanbantay son si-kayo, say ikowan jo ey ikowan nonta apo jo ey ma-obda kayo. Aliwen sotan i pesing jo, no diket pansi-met kayon man-obda, jet say nemnemen jo, joka pandag-a iyay pangkep so nen Cristo ta sotan i piyan nen Apo Shiyos. 7 Pan-alisto kayon man-obda et karejo nemnemen ey too bengat i joka pansilbi-i no diket nemnem jo ey joka pandag-a sotan maypangkep so nen Apo Jesus. 8 Amtayo met ey angken sipen too—baga-en man, ono aliwen baga-en—waray ewaten ton i-akan nen Apo Jesus ja konkona to ja sobadit nonta mapteng nga dingka to.
9 Kasta met son si-kayon waray baga-en to, asas jo ngoy nebeng nga pedekayo son si-kara. Aliwen jo ira ta-koten say man-obda ira, ta sota ira baga-en, tan si-kayon apo sha, saksakey i Apo jo ja wared dangit, jet say toka pesing son si-kayon showa, nan-inges ja mapteng.
10 Jet niman, say ma-onod ja ikowan ko son si-kayo, sajay. Say nemnemen jo ja mengi-kan ni kedsang jo, si Apo Jesus, tan sota panakabalin to. 11 Jet nemnem jon osalen sota in-akan nen Apo Shiyos son si-katejo ja may-eshig shi almas ja para kobat, say eg shakejo ebaken nonta taktiko nen Satanas. 12 Tep aliwen kait tayon too i kabakal tayo, no diket si Satanas, tan sota ira kait to ja ispiriton ngaaw ja toka ibetbetkag. Jet angken pay sota ira kait to ja singa enanngel ono emengitoshay niya dobong niman, si-karay makakontra son si-katejon emati. 13,14 Isonga niman, karekayo mebegnad; osal jo et ja emin sota almas nen Apo Shiyos ja wara son si-kayo, say eg kayo ma-ebak no onsabi sota timpon paladoy pemekal nen Satanas son si-kayo, tan say wara kayo pay laeng shi pamati ingkatod anongosto. Say kay-eshigan ni almas nen Apo Shiyos, sajay. Daga jo sota agpayso, aliwen sota o-owap, ta sotan i may-eshig ey singa balkes jo. Onod jo ni olay sota bilin nen Apo Shiyos ja kowan to ey dag-en jo, jet sotan i may-eshig ey danshok ka sa-din ni pagew jo. 15 Mesepol la esagana kayo ja mengikowan nonta maypangkep ni mapteng nga shamag ja mengi-kan ni talna, jet sotan i may-eshig ey singa sapatos jo. 16 Say epateg so niyay ya emin, sota pamati so nen Cristo. Say arig niya pamatiyo, singa kalasay jo ja pena-din jo ni bakdang jo no waray diy ipana nen Satanas ja singa apoy ya emanshedang, ja may-eshig shi aramid ton meneshal ni too. 17 Jet say nemnemen jo ni olay, sota kaysedakan jo, ta sotan i may-eshig ey hilmit ja sa-din ni toktok jo. Itoshoyo sota esel nen Apo Shiyos, ta sotan i may-eshig nodta kampilan ja in-akan ni Ispirito Santo nen Apo Shiyos. 18 Panshawat kayo ni olay so nen Apo Shiyos say todongan shakejo, jet karekayo on-ekdas ja manshewat ni olay para so nonta ira emin na emati. Onod jo ni olay sota pengiredan ni Ispirito Santo son si-kayo ni joka panshewat. 19 Pati si-kak ngo, irewati jowak so nen Apo Shiyos say osalen towak ja mengikowan nonta mapteng nga shamag maypangkep son Cristo ja istay enshiy maka-amta. Irewat jo pay ey ekak ontakot ja mengikowan niyay ya mapteng nga shamag. 20 Ta say kabol la naybaloshan ko shiya badoran ket, sota inbetkagan towak nen Apo Shiyos say nak ikowan sota mapteng nga shamag maypangkep so nen Cristo. Isonga kowan ko ey irewati jowak so nen Apo Shiyos, say aknan towak ni toled ja mengikowan nonta maypangkep ni esel to, ta si-katoy nebeng nga dag-en ko.
21 Si Tikiko ja ensemek tayon agi shi pamati, emepiyal la mansilbi so nen Apo Jesus, isonga si-katoy mengikowan da ni emin maypangkep son si-kak, no ngantoy naka dagdag-a, say amta-en jo. 22 Say kabol la ibetkagan ko la so nen Tikiko shita kadnan jo, piyan kon say amta-en jo i maypangkep son si-kamid jay. Tan piyan ko pay ya pekedsang toy nemnem jo, say eg kayo medisdismaya.