3
Eshotokanak ka mengitosho son si-kayon aliwen Hodiyos ni pangkep son Cristo
1 Sajay ira day kabol la naka panshewati so nen Apo Shiyos. Si-kak, ebaloshak maypangkep ni naka pengitosho ni esel nen Cristo Jesus son si-kayon aliwen Hodiyos. 2 Amtak ey shinemag jo ey si Apo Shiyos, kinaasi-an towak, isonga shinotokan towak ka mismo ja mengikowan son si-kayo ni maypangkep ni pamati. 3 Amtak ka amtayo pay ey inpa-amta nen Apo Shiyos son si-kak sota ebayag ga plano ton enshiy maka-amta. Si-kato iya ootik ka insolat ko la. 4 Jet no basa-en jo iyay, si-katoy ewatan jo so ey agpayson amtak sota plano nen Apo Shiyos maypangkep so nen Cristo. 5 Sajay ya plano nen Apo Shiyos, eg to inpa-amta so ni angken sipen too nonta epalabas den pigen dasos sa tawen, nem niman inpa-amta ni Ispirito Santo to iyay so ira nonta apostol to, tan sota ira para padto. 6 Jet sotan na plano to, si-katoy nayda-kaman ira nonta aliwen Hodiyos ni kari to ja inkowan to nonta bayag da so nonta ira too to. Nayda-kam ira ta emati ira son Cristo Jesus ni inteneng sha so nonta mapteng nga shamag pangkep son si-kato. Jet niman, naykasakey ira ma so nonta ira sigod ja too nen Apo Shiyos.
7 Jet say kabol la kinaasi-an towak so nen Apo Shiyos, pinidi towak ja ontolong ja mengitosho ni mapteng nga shamag maypangkep son Cristo Jesus. Jet si-kato met laeng i mengosal ni panakabalin ton ontolong son si-kak. 8 Si-kak i kabeba-an so ira nonta too nen Apo Shiyos, nem si Apo Shiyos, kinaasi-an towak et si-kak i mengikowan so nonta ira toon aliwen Hodiyos nonta epateg ga bindisiyon nen Cristo ja enshiy to kay-ingsan. 9 Say sakey mowan na kinaasi-an towak so, say ipalewag ko so ni emin na totoo sota plano nen Apo Shiyos ja istay enshiy maka-amta nontan da. Si Apo Shiyos, ja emalsowa ni emin na banag, eg to nin inpa-amta nonta dinesos den tawen ja epalabas, 10 say niman na timpo i amta-an so ira nonta toray shi naykayang, tan sota ira waray panakabalin tod man, ey say daing nen Apo Shiyos, aliwen etopog. Say in-osal to ni inpangipa-amta to son si-kara, si-katejon emati so nen Cristo. 11 Sajay i sigod ja plano nen Apo Shiyos ngo eshan nonta pilmiro, jet etongpal iyay nonta indaw ali nen Cristo Jesus ja Apo tayo. 12 Jet niman ma, ta emati kito son si-kato, waray shinel tayon on-esop son Apo Shiyos jet eg kito ma onbaing ja manshewat son si-kato. 13 Isonga say kowan ko, karekayo medismaya pangkep ni saja naka pandigdigat pangkep son si-kayo, ta sajay, pansigshan jo.
Isonga takejoka ida-da-kam shi shawat ko son Apo Shiyos
14 Jet sajay ya ebadeg ga plano nen Apo Shiyos, no nemnemen ko, naka mantedimokod ni iyaman ko so nen Apo Shiyos ja Ametayo. 15 Ta agpayso ma niman ey si-katoy Ama ni emin na kalasin too shiya dobong, tan sota ira wared naykayang. 16 Jet say shawat ko so nen Apo Shiyos ja Kangeto-an, kowan ko ey sota Ispirito to komay mengi-kan ni kedsang ni nemnem jo, ta ebadeg i panakabalin to, 17 say si Cristoy nemnemen jo koma ni olay, ni joka pemati son si-kato. Say shawat ko pay son Apo Shiyos, maynadnad kayo shi pamati ja singa ondamot i semek jo shi eshom, 18,19 say emin kayon emati, mebedin jon ewatan sota maypangkep ni semek nen Cristo. Sota semek to, ebadeg ga pasiya ja enshiy maka-inges so; eg mebedin na amta-en tayon emin i itsora to. Nem no emansha-kel i joka pan-amta-i, emanka-shomi ngoy eshiyosan na ogadiyo ingkatod ma-enay.
20 Niman, mayshedjaw koma si Apo Shiyos, ta si-kato i emengosal ni panakabalin ton emengitoshong son si-katejo. Isonga sobden pasiya aliy kabaalan ton i-akan nem say sota nemnemen tayon ibaga. 21 Jet si Apo Shiyos, si-katoy mayshedjaw ni olay so nonta ira emati ja wara so nen Cristo Jesus, tan so ni emin na totoon may-enak ali, jet mayshedjaw ingkatod ingka. Siya, satan koma.