7
1 Si-kayon a-akik shi pamati, iyay pay i piyan kon ikowan son si-kayo ja toloy nonta inkowan ko la. Sigosho ewaten jo iya piyan kon ikowan tep amtayo met sota bilin nen Apo Shiyos ja naysolat nonta bayag da. Say piyan kon ikowan son si-kayo, sajay. Say penongpal ni too nonta bilin nonta bayag da, sota kawasha to pay laeng shiya biyag; nem no metey, enshi ma.2 Kaspangarigan, sota biin waray asewa to, kapiditan na tongpalen to sota bilin maypangkep ni san-asewa, tep sota asewa ton daki, mabiday pay laeng. Nem no metey sota daki, angken eg to ma tongpalen sota bilin pangkep ni san-asewa.3 Nem no sotan na bii ket waray apil la daki to, angken na wara sota sigod ja asewa to shi biyag, ikowan sha ey ekileki sotan na bii. Nem no etey sota asewa ton daki, asan maki-sawa mowan, eg sha ikowan ey daki to bengat sotan na maykadwen asewa to.
4 Sajay i may-eshig son si-kayon a-akik shi pamati. Singa etey kayo ta enshiy jo kaybiyangan nonta bilin ja naysolat nonta bayag da. Ta nonta etey i bakdang nen Cristo, singa angken si-kayo, etey kayo ngo. Jet si-katoy makatoo son si-kayo. Ta angken etey nontan da, nanbiyag mowan say mebedin na tongpalen jo sota sigod ja piyan nen Apo Shiyos ey dag-en jo. 5 Nonta eg kito pay laeng emati son Cristo, sota ngaaw wa pipiyan ni bakdang tayon dag-en, si-katoy tayoka dagdag-a ni olay. Jet singa pay ya inpaba-deg bengat nonta bilin nonta bayag sota tayoka dagdag-a ja ngaaw. Nakol ni istay patey ingkatod ingka i panpa-no-an tayo. 6 Nem niman ma, ewaya kito tep aliwen kapiditan na tongpalen tayo sota bilin nonta bayag da. Singa etey kito tep enshiy bibiyang tayo nodtan na bilin. Nontan den eg kito pay laeng emati son Cristo, istay sota bilin nonta bayag day tongpalen tayo koma. Nem niman men badoy biyag tayo, kitoka mansilbi son Apo Shiyos jet sota Ispirito Santo nen Apo Shiyos i emengitoshong son si-katejo.
Sota bilin nonta bayag da, eg to kabaalan na mena-dat ni ngaaw wa ogadi ni too
7 Sajay ya inkowan ko la, aliwen kowan ko ey sota bilin nen Apo Shiyos nonta bayag da ja naysolat ket singa emengi-kan ni panbesolan. Enshi, arawi sotan na nemnem. Nem no enshi met kitdi sotan na bilin, istay ekak amta sota maypangkep ni basol. Kaspangarigan sota pengamkam, istay ekak amta ey sota pengamkam ket basol gayam, no eg inkowan nonta bilin ey, “Karam kamkaman i kokowa ni eshom.” 8 Nem idi inamta-an ko sotan na bilin, ema-ma sota sigod ja ngaaw wa wared nemnem ko, jet kinamkaman koy angken nganto. No enshi koma sota sigod ja bilin, istay eg tayo inamta-an i basol. 9 Nontan da, angken si-kak naka manbibiyag ja ekak amta sota maypangkep nonta sigod ja bilin jet ekak panshanagan i emin na naka dagdag-a. Nem idi simabi ali sotan na bilin son si-kak, singa ebangon sota sigod ja ngaaw wa wared nemnem ko jet inamta-an ko may basol. Jet nontan i in-amtak so ey meshosa gayam ingkatod ingka sota toon manbesol. 10 Isonga sotan na bilin ja istay mengitoshong ni too koma shi biyag, sotan et ngo mowan i singa keshosa-an to. 11 Kowan ko nem biyag i panpa-no-an ko ni pengonod ko nonta sigod ja bilin, nem apil gayam! Sotan et i engamta-an ko ey patey i panpa-no-an ko. Isonga singa sinaol towak nonta sigod ja ngaaw wa wared nemnem ko nonta inamta-an ko so nontan na bilin.
12 Sota bilin nen Apo Shiyos nonta bayag da ja naysolat, mismon edapo so nen Apo Shiyos; enshiy kolang to, mapteng nga emin. 13 Jet aliwen na kowan ko ey sotan na mapteng ket si-katoy emono son si-kak. Arawi sotan na nemnem. Say singa emono son si-kak, sota sigod ja ngaaw wa wared nemnem ko. Jet say nanbanagan niyay, inamta-an koy maypangkep nonta sigod ja wared nemnem ko. Ta nonta inamta-an ko sota sigod ja bilin, inamtak ma ey sota ngaaw wa wared nemnem ko ket basol la embel-at ta pasiya gayam.
14 Amta tayo ey sotan na bilin nen Apo Shiyos ja naysolat nonta bayag da ket mapteng ta edapo met laeng son si-kato. Nem si-kak, too-ak bengat. Saja sigod ja ngaaw wa wared nemnem ko, si-katoy emengitoshong son si-kak ni olay; isonga naka dagdag-a ni olay sota pipiyan ni bakdang ko ja ngaaw. 15 Ekak ewatan shorog i bakdang ko, ta sota piyan kon dag-en, aliwen si-kato, no diket say naka dag-a et ngo mowan, sota mismon ekak kosto. 16 No ekak koston dag-en sota ngaaw wa naka dagdag-a, sotan i ka-amta-an to ey naka enogota ey mapteng sota bilin nen Apo Shiyos. Ta eg to ngo kostoy ngaaw. 17 Si-kak, piyan koy mapteng, isonga singa aliwen si-kak ma i emandeka ni ngaaw wa naka dag-a, nem wara met laeng i sigod ja ngaaw wa wared nemnem ko, jet si-katoy kabol la naka panbesoli. 18 Amtak ey no ekak emati son Cristo, enshin polos i mapteng son si-kak. Niman, makedsang mangoy nemnem kon mandeka ni mapteng, nem iso met laeng nga eg kabaalan ni bakdang kon dag-en. 19 Ekak dag-en sota mapteng nga piyan kon dag-en, nem say naka dag-a et ngo mowan, sota ngaaw wa ekak kosto. 20 Jet no dag-en ko sota ekak kosto, sajay i ka-asan to ey aliwen si-kak i emandeka niyay, no diket sota sigod ja ngaaw wa wared nemnem ko.
21 Singa kenshat et ta no piyan kon mandeka ni mapteng ket sota ngaaw et bengat i naka dagdag-a. 22 Say epigsen wared nemnem ko, sota pengonod ni bilin nen Apo Shiyos, 23 nem waray eg man-inawatan shiya bakdang ko. Sota wared nemnem ko, kowan to ey mandeka-ak ni mapteng, nem apil i kedag-a niya bakdang ko, jet sota piyan niya bakdang koy emengebak ni olay; nakol ni naka manbesol. 24 Ara! Kakaasiy kasesaad kon too! Istay enshiy mengisedakan niya bakdang ko ja ontorong shi patey, 25 nem niman ebadeg i iyaman ko so nen Apo Shiyos ta insalakan towak maypangkep so nen Jesucristo ja Apo tayo!
Isonga sajay nin i kasesaad ko: no shi nemnem ko, naka mansilbi son Apo Shiyos, nem saja bakdang ko, ememasig i toka panbesol.