SOTA
INPASPASING
IRA NONTA APOSTOL
1
1 Agi Teopilo, sota epangdon dibshok, insolat koy emin na dingka nen Jesus tan intoro to, 2 ingkato nonta akew wa indaw to la shi dangit. Nonta aneng nin i idaw to led dangit, inshalan ni Ispirito Santo jet inkowan toy pesing ira nonta pinidi ton too to ja apostol. 3 Idi naksheng nga nanbiyag shi patey, eminshakel la nanpa-sas son si-kara ni oneg ni epat ta polon akew, say pati-en sha ey agpayson wara ma shi biyag. Jet nantatabtabalan sha mowan i maypangkep ni pantoshayan nen Apo Shiyos. 4 Idi nonta esa-nop ira son si-kato, inkowan to son si-kara ey, “Karejo nin idekjas i Jerusalem, no diket seked jo nin sota Ispirito Santo nen Apo Shiyos ja inkari to, ja pan-iyan to so ni totoo. Inkowan ko met iyay nontan. 5 Shanom bengat i inosal nen Juan ni inpamonjag to, nem say pemonjag nen Apo Shiyos son si-kayo, Ispirito Santo. Eg medebas i eshakel la akew manipod niman et mebonjagan kayo ma ni Ispirito Santo.”
Kimayang da si Jesus shi dangit ja edapo-an to
6 Jet nonta esa-nop ira sota apostol, inbag-an sha si Jesus ja kowan sha ey, “Apo, aliwen niman ayay pengisaad mo so ni epokaw den gobirno ni Israel?”
7 Simongbat si Jesus ja kowan to ey, “Eg mesepol la amta-an joy akew ono timpo, no pigan ali. Sota piyan nen Apo Shiyos ja Amak ni itongpal to so, si-kato. 8 Nem iyay i ikowan ko son si-kayo. Sota Ispirito Santo nen Apo Shiyos, man-iyan so ni sakey tan sakey son si-kayo say waray panakabalin jon mengikowan ni maypangkep son si-kak shi totoo, manshoki shi Jerusalem, Jodia, Samaria, tan shi emin na sakop niya dobong.”
9 Idi enaksheng nga inkowan to iyay, kimayang ja indekjas to ira et dimaw shi dangit, jet binoja nonta ira apostol to i toka pankedjang ingkatod eg ma mayshedmang, ta dinikopan ni kolpot.
10 Jet idi maramen shaka pan-ishemang i edimosan tod dangit, ebiglen waray showen anghil ja nanbaro ni empoti ja nanpa-sas son si-kara. Sajay iren anghil, enshiy kaydesinan sha shi too. 11 Kowan nonta anghil son si-kara ey, “Daleki ja i-Galilia, ngantoy tinangkakan jo pay laeng shi dangit? Sajay ya si Jesus ja engilekjas son si-kayo ni indaw to la shi dangit ja nay-olop shi kolpot, inges niyay met laeng aliy i-oli to.”
Waray epilin maysa-dat so nen Judas ja istay apostol nen Jesus
12 Jet sota ira apostol, edapo ira nodta shontog ga kowan sha ey Olibas jet imoli ira shi Jerusalem. (Say ka-ashawi nonta Olibas shi Jerusalem, sakey ya kilomitro.) 13 Idi mimotok ira shi Jerusalem, dimaw ira nodta naykayang nga kowadto ni baley ya shaka pan-iyani. Jet iyay i ngarangaran ira nonta apostol nen Jesus: si Pedro, Juan, Santiago, Andres, Felipe, Tomas, Bartolomeo, Mateo, sota sakey ya si Santiago ja anak nen Alpio, si Simon ja bitirano, tan si Judas ja anak ni apil mowan na Santiago. 14 Emin ira jay, tan sota ira bibii, pati si Maria ja ina nen Jesus tan sota ira a-aki nen Jesus, ireka mesa-sa-nop ni olay ja manshewat son Apo Shiyos.
15 Idi edabas i pigen akew, waray esa-nop pa sandasos tan showen polo ja emati son Jesus. Jet nontan, dimayat si Pedro shi sango-an sha jet nan-esel, 16,17 ja kowan to ey, “A-akik shi pamati, sota insolat nen Ari David nonta bayag da ja inshalan ni Ispirito Santo nen Apo Shiyos, etongpal da nonta inpangdo nen Judas Iskariote sota ira makakontra son Jesus ni in-eshel sha so. Jet sajay ya si Judas i istay sakey son si-kamin pinidi nen Jesus ja meki-obda son si-kamin apostol to nontan. Sajay i edaga ta mesepol la metongpal sota naypadto.
18 “Nem si Judas, nanbono, na-kas et pimetnak i ekes to, jet bimo-day ya emin i sosot to. Sota pilak ka inda to ni inbaag to so nen Jesus, intongkal sha ni bo-day. 19 Inamta-an ni emin na totoo shi Jerusalem iyay ya inpanbono nen Judas; isonga sajay ya bo-day, inpanngaran sha ni Akildama, ja say olog to, ‘Baley ni shala.’
20 “Nonta bayag da, waray naysolat shi dibsho ni Salmo ja kowan to ey, ‘Kari, manbedin i baley to ni diyasang jet enshi may man-iyan.’ Tan waray naysolat pay ey, ‘Sota istay obda to, elbaten ni eshom.’ 21,22 Isonga mesepol la waray maysa-dat son Judas, say onkostoy bilang min apostol, ja mengikowan ni inpanbiyag nen Jesus shi patey. Nem say maysa-dat son si-kato ja may-a-shom son si-kami, sota sakey ja eki-odo-odop ni olay son si-katejo manshoki nonta kepemonjag nen Juan ingkato nonta akew wa indekjas shakito so nen Jesus ni indaw to la shi dangit.” Kowan nen Pedro.
23 Jet showen too i nanpili-an sha: si Jose Barsabas, ja Justo met laeng i ngaran to, tan si Matias. 24,25 Nanshawat nin ira son Apo Shiyos ja kowan sha ey, “Apo ja maka-amta ni nemnem ni too, itoshom son si-kami nem sipa so ira niya showa i on-elbat so ni obda nen Judas Iskariote ja istay apostol, ja dimaw shi anam ton dinawan.” 26 Jet nanpipini-not ira jet say bimo-day, si Matias, jet si-kato may nay-eshom so nonta ira sampolo tan sakey ja apostol.