2
Sota Ispirito Santo nen Apo Shiyos, dimespag ali ja nan-iyan so ni emati
1 Idi simabi sota akew wa timpon piyasta ni Hodiyos ja kowan sha ey Pintikostis, emin ira sota emati, esa-nop ira shi sakey ya kowadto. 2 Jet ebigla ja waray emanbongog alid dangit ja singa shagem, jet pinno ton emin sota baley ya kawad-an sha ja shaka pantetongawi. 3 Jet waray inon-an shen nay-epeng nga simepa son si-karen emin, ja apoy ja singa shila i itsora to. 4 Jet nontan ma, enapno ira ni Ispirito Santo nen Apo Shiyos, jet nan-esel ira ni ekalkalasin esel ja aliwen sigod ja esel sha. Nan-esel ira ni apil ngon esel tep inshalan ira ni Ispirito Santo.
5 Naytompong nontan ja wara iray Hodiyos ja edapod ka-ili-ilid ja dobong ja eman-iyan nin shi Jerusalem ja makedsang i pamatira son Apo Shiyos. 6 Idi itenengan ira nonta totoo sota emanbongog ja edapo alid naykayang, dimaw ira ja sha inon-an, jet enasshaaw iren pasiya ta idi intenengan sha sota esel ira nonta emati, sota mismon esel ni sakey tan sakey son si-kara i bolikas nontan na esel. 7 Jet sota ira totoo, ireka emesshaaw, ta eg sha ewatan no ngantoy inpasing niyay, jet kowan sha ey, “Apay sajay iren emin na eman-a-sel ket, i-Galilia met ira? 8 Ngaranto ayay inpasing niyay? Amtara met ja man-a-sel ni esel shi dogad ja nay-anakan tayo, ket aliwen esel sha? 9 Edapo kito met ali shi Partia, Midia, Ilam, Misopotamia, Jodia, Kapadosia, Ponto, Asiya, 10 Prigia, Pampilia, Egypt, tan sakop ni Libya ja naysakop ngo shi Sirini. Wara pay i eshom son si-katejo ja bisita alid Roma, ja Hodiyos i eshom, tan sota ira eshom, aliwen Hodiyos ja etod-an ja manshedjaw son Apo Shiyos. 11 Sota ira eshom, edapo ired Crete tan shi Arabia!” Jet sajay iren totoo ja edapod ja kalkalasin dogad, kowan sha ey, “Amta met iren jay i esel tayon kalkalasi. Si-katoy shaka pan-a-sel ni maypangkep ni kaskasshaaw wa inpaspasing nen Apo Shiyos.”
12 Jet emin ira, ireka messhaaw ta eg sha ewatan iyay, jet kowan sha ey, “Ngaranto emo iya emankepasemak niman?”
13 Nem sota ira eshom, endedamsis sha, ja kowan sha et ey, “Enshi—eboteng ira tan ni adak!”
Indawag nen Pedro ey sajay i tongpal nonta padto nonta bayag da
14 Sota sampolo tan showa ja apostol, si Pedro i tima-shel son si-kara ja nan-esel, jet inkedsang toy esel to ja kowan to ey, “Si-kayon totoo ja i-Jodia, tan si-kayon emin na eman-iyan shiya Jerusalem, mesepol la amta-an jo iyay! Itnengi jon pasiya iya ikowan ko son si-kayo! 15 Sajay iren kait ko, aliwen eboteng ira ja si-katoy pangkep jo; ta alas nowibi pay laeng ni agsapa! 16 Sajay sota tongpal ni inpadto nen Joel nonta bayag da, 17 ja esel met laeng nen Apo Shiyos, ja kowan to ey,
‘Shi ka-onoran alin timpo, sajay i pesing ko: pan-iyan ko i Ispiritok so ni emin na totoo jet sota ira annak sha, mengipadto ira ni maypangkep son si-kak, jet waray pa-amtak so ni bedoleki tan nankedakay shi kokokip sha. 18 Owen, angken sota ira daleki tan bibii ja mansilbi son si-kak ni sajay alin timpo, pan-iyan koy Ispiritok son si-kara, jet si-karay mengikowan ni ipa-amtak son si-kara. 19 Waray ipa-sas ko so ni totoo ja medeka shi naykayang nga kaskashaaw, tan angken shiya dobong, waray ipa-sas ko son si-kara ja panakabalin ko: waray maybokbok ka shala tan waray apoy ya eposkol i dowet to. 20 Ma-shep i sekit, tan onbalenga i bolan ja singa shala, jet no meksheng nga mepesamak iyay, si-kato ma diy idaw ko. Sajay alin akew, kaskasshaaw wa enshiy to kay-ingesan. 21 Jet sajay alin timpo, sota ira manbeka son si-kak ni kaasi, kaasi-an kon isalakan.’ Sajay day padto nen Joel.
22 “Si-kayon kait kon Hodiyos, itnengi jo iya ikowan ko son si-kayo! Si Jesus ja i-Nasarit, inpandaga nen Apo Shiyos ni kaskasshaaw wa milagro, ja inon-an jon mismo, jet si-katoy pengamta-an jo ey si-katoy inbetkag nen Apo Shiyos. Amtayon emin iyay. 23 Sigod ja amta nen Apo Shiyos i mepesamak ali son Jesus shiya dobong tep plano to ngoreshan na sigod. Jet siya, intolok ton metey si Jesus. Nem si-kayon Hodiyos i mismo emono son si-kato! Inpabonoyo so nonta ira i-Roma ja nankekedsel jet indansara shi koros. 24 Nem si Apo Shiyos, eg to intolok ja on-onong si Jesus ja metey; isonga inpanbiyag to, ta say patey, enshiy panakabalin ton mengipked son Jesus. 25 Si-kato sota nantongpalan nonta padto nen Ari David nonta bayag da, ja kowan to ey,
‘Si Apo Shiyos, wara ni olay son si-kak, wara ni olay shi apit ni kanawan ko, say ekak ontakot. 26 Isonga naka man-imdeng tan naka man-iyaman, jet angken saja bakdang ko, sigoradoy namnama to, 27 ta eg mowak baybay-an shi dogad ja kawad-an ni etey. Jet eg mo ipalobos ey saja bakdang ko ket mebojok, ta ensemek mowak. 28 Inpa-amtam i shalan son si-kak ja ontorong shi biyag, jet enapno-ak ni imdeng ta wara ka son si-kak.’ Kowan ni padto nen Ari David.”
29 Jet si Pedro, intoloy to ja kowan to so nonta totoo ey, “A-akik, idawag ko son si-kayoy olog nonta padto nen Ari David ja makapoli son si-katejo. Etey si David jet naybeka, jet sota dobok to, wara shiya kad-an tayo ingkato niman. 30 Isonga aliwen si-katon shorog i kaytoshongan nonta inpadto to, no diket inpadto to bengat. Amta to sota kari nen Apo Shiyos son si-kato ja kowan to ey, ‘Wara aliy sakey so nonta polim ja panbedin kon ari ja inges mo jet si-katoy on-elbat so ni intorayan mo.’ 31 Si Ari David, amta toy plano nen Apo Shiyos; isonga inpadto toy maypangkep so nonta amta ton ibetkag ali nen Apo Shiyos ja mengisedakan nonta inkowan to ey, ‘Eg mowak baybay-an shi dogad ja kawad-an ni etey’, tan nonta inkowan to ey, ‘Eg mebojok iya bakdang ko.’ 32 Si Apo Shiyos, inpanbiyag to si Cristo shi patey, jet inon-an min mismoy bakdang to alid patey! 33 Jet niman, wared apit ni kanawan nen Apo Shiyos; isonga in-akan nen Ameto sota Ispirito Santo son si-kato ja inkari to, jet sajay ya Ispirito Santo iya intenengan jo niman tan inon-an jo ja in-awat ngo nen Jesus son si-kami. 34 Jet angken si Ari David nonta bayag da, eg dimaw shi dangit, nem si Cristo, si-katoy dimaw shi dangit; isonga inkowan nen David ey, ‘Kowan nen Apo Shiyos so nonta apok ey ontongaw shi apit ni kanawan to, jet pan-eshi to, 35 jet sota kabakal to, panbedin to ja panpetokan ni sedi to.’
36 “Isonga si-kayon emin ja kait kon Hodiyos, mesepol la amta-an jon pasiya ey si Jesus ja inpaidansayo shi koros, si-kato sota inpanbalin nen Apo Shiyos ni Apo tayon emin! Si-kato sota singsingked tayon inkari nen Apo Shiyos ey ibetkag to din mengisedakan!” Sajay i kowan nen Pedro.
37 Jet idi intenengan sha iyay, nandaringit ira, ja kowan sha so nen Pedro tan sota eshom ma apostol ey, “A-aki, ngaranto ngarod i pesing mi?”
38 Si Pedro, simongbat ja kowan to ey, “Panbebawi kayo et emin kayo, panpabonjag kayo ja si Jesucristo i toshongen jon pati-en ni olay, say mepekawanan i basol jo. Jet ewaten jo sota Ispirito Santo nen Apo Shiyos ja i-akan to. 39 Ta sota Ispirito Santo ja inkari nen Apo Shiyos, para so ni emin na toon pinidi ton manbedin na too to, jet mayda-kam kayo, pati sota ira annak jo, tan angken pay sota ira toon aliwen kait tayon Hodiyos.”
40 Jet si Pedro, eshakel pay i adok to so nonta totoo, ja kowan to ey, “Mesepol la itolok jon si Apo Shiyos i mengisedakan son si-kayo, say eg tokejo pekishosa so ira niya toon ngaaw i aramid sha.”
41 Jet sota emati ni inkowan nen Pedro, binonjagan sha ira, jet say kabebilang sha ja nay-eshom so nonta sigod ja emati son Jesus nontan na akew, tedon dibo. 42 Jet sajay ira, intoloy sha ja tinod-an ira nonta apostol. Nontan ma, ireka mesa-sa-nop ni olay ja manshedjaw tan manshewat son Apo Jesus, jet ireka pay mandilikob ja mengan.
Sota itsora ni biyag ira nonta emati
43 Jet sota ira apostol, eshakel i kaskasshaaw wa dingkara jet nontan, emin ira sota totoo, etakot ira tep inewatan sha ey panakabalin gayam nen Apo Shiyos iyay. 44 Emin ira sota emati, saksakey i wared nemnem sha, jet emin sota kokowa ni sakey tan sakey son si-kara, kokowaren emin. 45 Jet indako shay bo-day sha, angken pay sota ira kompormin kokowara, jet inwaris sha sota nandako-an sha so nonta ira makasapol. 46 Inakew ja ireka ondaw shi Timplo, jet shima balebaley sha, ireka mandilikob, jet ebadeg i imdeng sha ni shaka pengan, ta saksakey i nemnem sha son Jesucristo. 47 Si Apo Shiyos ni olay i shaka ishayshayaw, jet angken sota emin na totoo, kowan sha ey mapteng ira sota emati. Jet si Apo Shiyos, inakew ja waray toka i-eshom son si-kara ja maysedakan.