21
Si Jesus, nanpa-sas so nonta ira piton emati son si-kato
1 Idi edabas i pigen akew, nanpa-sas mowan si Jesus so nonta ira too to shima kilig ni baybay shi Galilia. Jet say inpasing nen Jesus ja nanpa-sas son si-kara, iyay i istoriya to. 2 Si Simon Pedro, si Tomas ja inbeshay sha ey Epin, si Natanael ja i-Kana ja sakop ni Galilia, tan sota san-agin potot nen Sibidi, nan-o-odop ira, pati sota showen too met laeng nen Jesus. 3 Ta si Simon Pedro, kowan to son si-kara ey, “Nak mannikay.” Jet kowan sha son si-kato ey mekidaw ira ngon mekinikay. Nandogan ira nodta bangka, jet indabbira ja nannigay ingkato nonta palbangon, nem angken sakey, enshiy sha ninikay.
4 Idi na-akew ma, ja emanbo-day i sekit, dimayat si Jesus nodta kilig ni baybay, nem eg sha inimatonan ey si-kato. 5 Jet kowan to son si-kara ey, “Towa? Waray kinnayo?”
Simongbat ira ja kowan sha ey, “Enshi.”
6 Jet kowan to ma son si-kara ey, “I-kas jo ita balshew shita apit ni kanawan nita bangka, say waray kekna-en jo.”
In-ekas sha nga agpayso nodta kanawan ni bangka, jet idi natnaten sha ma sota balshew, eg ira makakoyod, ta eshakel i enakna.
7 Jet sota sakey ya apostol ja ensemek nen Jesus, inimatonan to ey si Jesus sota imesel, jet kowan to ey, “Si Apo Jesus met iman!”
Idi intenengan nen Simon Pedro sota kowan to, insikkot to sota baro tod bakdang to, tep nandabos ni toka pannikay, jet imabtok da shima shanom ja nimangoy. 8 Nem sota eshom, nandogan ira nodta bangka, ingkato da nodta naykilig, jet inkoyod sha ma sota balshew ja enapno ni nigay. Say ka-ashawi sha nodta kilig ni baybay, ondaw wa sandasos sa mitoro.
9 Idi simabi ira ma nodta kilig ni baybay, waray inon-an shen emankedoton nigay ya naykedot nodta ngalab, jet wara pay i tinapay ja naysaganen kaytaksholan to. 10 Jet si Jesus, kowan to son si-kara ey, “Alekayo di nita nigay ya kinnayo.”
11 Jet si Simon Pedro, dimaw nodta bangka jet to inkoyod ali nodta naykilig sota nigay ja enakna ja kakembaleg, jet say bilang nonta nigay, sandasos tan dimen polo, tan tedo. Enapno sota balshew, nem mapteng ta eg epi-kat. 12 Jet si Jesus, tinewal to ira ja kowan to ey, “Kalejo, mengan.”
Jet nontan, angken sakey, enshiy engitoded son si-kara ja engibeka son Jesus no sipa si-kato, ta amtara ey si-kato si Apo Jesus. 13 Jet si Jesus, inda to sota tinapay, jet shinowashowa to asan toka i-ekan son si-kara, asan ma sota naykedot ta nigay.
14 Sajay i maykatdon inpanpa-sas nen Jesus so nonta ira too to, manipod nonta inpan-ongal to.
Sota inpantabtabal nen Jesus tan si Pedro
15 Idi enaksheng nga engan ira, inbag-an nen Jesus si Simon Pedro, ja kowan to ey, “Wa-wa-sha ngatay semek mo son si-kak ey say sota semek ira niya kait mo?”
Jet si Simon Pedro, simongbat ja kowan to ey, “Owen Apo, amtam met ey ensemek taka.”
Jet si Jesus, kowan to son si-kato ey, “Ajowanim ira sota emati son si-kak, ta si-kara, may-eshig ey singa kalnirok.”
16 Pininshowa to mowan ja kowan to ey, “Simon, ja anak nen Juan, waray semek mo son si-kak?”
Simongbat si Pedro ja kowan to ey, “Owen Apo, amtam met ey ensemek taka.”
Jet si Jesus, kowan to mowan son si-kato ey, “Singpet mo ira sota emati son si-kak, ta si-kara, may-eshig ey singa kalnirok.”
17 Jet nonta maykepintedo, kowan nen Jesus mowan so nen Pedro ey, “Simon, ja anak nen Juan, waray semek mo son si-kak?”
Si Pedro, nandaringit ma, ta emintedo ja inbaga nen Jesus iyay son si-kato, jet si Pedro, simongbat ja kowan to ey, “Apo, amtam ma emin, angken nganto. Amtam ey ensemek taka.”
Jet si Jesus, kowan to ma son Pedro ey, “Ajowanim sota ira emati son si-kak ta si-kara, may-eshig ey singa kalnirok. 18 Ikowan ko son si-kam i kinapodpodno. Nonta nga-nga ka, si-kam ngoy emengi-mag shorog ni balkes mo, jet sota piyan mon dawan, si-katoy toshongen mo. Nem no ma-ema ka ali, apil ngo. Onshepa ka jet bedoren shaka, asan idaw shaka shima dogad ja eg mo koston dawan.” 19 (Sajay i inkowan nen Jesus, ta piyan ton ewatan koma nen Pedro i itsora ni ketey to ali, ja si-katoy kayshedjawan nen Apo Shiyos.) Jet si Jesus, kowan to pay so nen Pedro ey, “Onod mowak.”
20,21 Jet si Pedro, wimingi jet inon-an to sota sakey ya apostol la ensemek nen Jesus ja timened son si-kara, jet kowan to son Jesus ey, “Apo, jet si iyay ngay? Eg ngo mepesamak son si-kato?” (Sajay sota sakey ya apostol ja nay-askang son Jesus nonta ka-onoran na inpandilikob sha, tan si-katoy engikowan ey, “Sipa ta kowan mo ey mengibaag son si-kam?”)
22 Jet si Jesus, simongbat ja kowan to son Pedro ey, “Kaspangarigan ey piyan kon si-katoy manbiyag ingkato alid imotok ko mowan, enshiy mo naybiyangan. Si-kak i onoren mo.”
23 Jet sajay ya inkowan nen Jesus pangkep so nonta sakey ya apostol, shinemag ira nonta eshom ma emati, jet say wared nemnem sha, kowan sha ey eg metmetey sota sakey ya apostol. Nem si Jesus, aliwen sotan i olog nonta inkowan to, no diket say inkowan to, no bilang ey piyan ton manbiyag sotan na apostol ingkatod imotok to mowan ali, enshiy naybiyangan nen Pedro.
24 Si-kak sota sakey ya apostol. Jet emin iyay ya insolat ko, inon-an kon mismo. Jet agpayson emin iya insolat ko; enshiy showashowa to.
25 Nem eshakel pay i dingdingka nen Jesus ja ekak insolat shiyay, ta no sa-sa-keyen kon isolat ja emin shi kedibdibsho, eg emo on-anay iya dobong ja kaytedo-an sha.