6
Kinaasi-an shakito nen Apo Shiyos, nem aliwen piyan mon a-selen ey bolos may panbesol
1 Jet sotan den inkowan ko, baka ikowan jo et ey mapteng noitoltoloy tayon manbesol, ta no onba-ba-deg i basol, ma-ma-shoman i kaasi nen Apo Shiyos. 2 Nem enshi! Arawi itan na nemnem. Say agpayso, enshi may bibiyang tayon manbesol ja inges to sota etey ja eg ma manbesol. 3 Amtayo met ey nonta ebonjagan kito ja nayda-kam son Cristo Jesus ket ebonjagan kito ngo ja nayda-kam ni inkatey to. 4 Sota inpanbonjag tayo, say kay-eshigan to, singa etey kiton nayda-kam so nen Cristo ja naybeka. Jet say sakey pay ja kay-eshigan ni inpanbonjag tayo, singa nayda-kam kito so nen Cristo nonta inpanbiyag so nen Apo Shiyos maypangkep ni panakabalin to, say mebado-an ngoy biyag tayo niman na wara kitod biyag.
5 Ta no si-katejo ket nayda-kam kiton singa etey, ja kadwa nen Cristo, mayda-kam kito met laeng son si-kato ja man-ongal ja inges to. 6 Amta tayo met ey sota sigod ja ogadi tayo nonta eg kito pay laeng emati ket singa ekilansa sotan na ogadi so nen Cristo shi koros, say sotan na ngaaw wa aramid ni bakdang tayo, mesa-datan, jet aliwen sota basol ma i ontengel son si-katejo. 7 Singa kowinta ey etey kito jet amtayo ey say etey ya too ket eg mebedin na manbesol tep etey ngarod.
8 Nem no etey kito ja nayda-kam so nen Cristo, waray shinel tayo ey mayda-kam kito ngo ali ja mekibiyag son si-kato. 9 Ta amta tayo ey si Cristo, nanbiyag shi patey jet eg ma metmetey, ta sota patey, enshiy to naybiyangan son si-kato. 10 Say kabol la eteyan to, say ikaro toy basol ni totoo, jet etey ni pinsak bengat para so ni emin na too. Nem sota biyag ja wara son si-kato ma niman, para sota kayshedjawan nen Apo Shiyos. 11 Isonga angken si-kayo, ibidang jo ngoy bakdang jo shorog ey etey kayo da ja enshiy jo kaybiyangan ni basol, nem nemnem jo ngo ey ebiyag kayo met laeng para sota kayshedjawan nen Apo Shiyos maypangkep ni pamatiyo so nen Cristo Jesus.
12 Karejo ipalobos ja sota basol i mengebak son si-kayo, say eg jo onoren sota pipiyan ni bakdang jo ja ngaaw; 13 karejo itolok shorog i bakdang jon mandeka ni ngaaw wa aramid, no diket say dag-en jo koma, itodok jon osalen shakejo nen Apo Shiyos ja mansilbi met laeng son si-kato ni pandeka ni mapteng. Ta si Apo Shiyos i engi-kan ni biyag son si-kayo nonta singa etey kayo. 14 Nemnem jo ey enshiy pesing ni basol son si-kayo, ta say kasesaad jo niman, wara kayo ma son Apo Shiyos ja kinaasi-an shakejo; isonga sota kaysedakan tayo ket eg maybetay nodta pengonod tayo nonta bilin ja nay-awat nonta bayag da.
15 Nem eg jo koma ikowan ey, “Angken manbesol kito, sagang mango et aliwen sota pengonod ni bilin i kaysedakan tayo, nem eg sota kaasi nen Apo Shiyos son si-katejo.” Nem enshi! Arawi itan na nemnem! 16 Amtayo met ey no ngantoy naydowaman jon dag-en, sotan i singa enanngel son si-kayo. Isonga no naydowam kayon manbesol, singa sotan i enanngel son si-kayo. Jet say panpa-no-an ni joka panbesbesol, patey ja enshiy to engintegan. Nem no naydowam kayon memati son Apo Shiyos, say panbenagan jo, ewaten shakejo nen Apo Shiyos jet maybidang kayo ma ey enshiy basol jo. 17 Nontan da, naydowam kayon manbesol, nem niman, man-iyaman kito so nen Apo Shiyos, ta say pinatiyon nay-edet shi poso jo ma, sota koston toro, jet si-kato may joka on-onora ni olay. 18 Jet niman ma, enshiy pesing ni basol ja menngel son si-kayo, ta say singa nanngel son si-kayo niman, naydowam kayon mandeka ni piyan nen Apo Shiyos. 19 (Saja inosal kon esel, sota nam-ay ya esel la tayoka osala ni olay, tep si-katoy nam-ay ya ewatan tayon too.) Nontan da sota bakdang jo, joka osala ja mandeka ni ensekig ga aramid, jet emankema-ma sotan na aramid jon ngaaw. Nem niman ma, baliwiyo, osal jo ta bakdang jo ja mandeka nonta piyan nen Apo Shiyos, say mapteng ni olay i dagdag-en jo.
20 Nontan da, naydowam kayon manbesol, isonga eg jo ngo nemnemen ja mandeka ni mapteng nga aramid ja kekosto-i nen Apo Shiyos. 21 Nem enshi met i jo kinon-od ja mapteng nodta dingdingkayo nontan da, ja si-katoy joka ibebaing niman. Patey ingkatod ingka i panpa-no-an ni inges ira nontan na aramid. 22 Nem niman ma ja aliwen basol i timengel son si-kayo, si Apo Shiyos i naydowaman jon onoren, jet asdeg to may kinon-od jo tep emanmapteng may ogadiyo, ja mebedin na waray kay-ingesan to son Apo Shiyos. Jet say panpa-no-an niyay, mewad-an kayo ni biyag ja enshiy to engintegan. 23 Isonga say sobadit ni basol, patey ingkatod ingka, nem waray dibshin i-akan nen Apo Shiyos so nonta ira wara son Cristo Jesus ja Apo tayo; si-kato sota biyag ja enshiy to engintegan.