4
1 Jet si Abraham ngay, ja apo tayo da nonta bayag? Ngantoy inpasing to ja kinosto-an so nen Apo Shiyos son si-kato?2 No si Abraham ket sota maypangkep ni dingka to i kinosto-an so nen Apo Shiyos son si-kato, istay wara komay idastog to. Nem enshi; isonga angken si Abraham, enshiy to idastog son Apo Shiyos ja dingka to.3 Niman, nemnem jo kari sota naysolat nonta bayag da, ja kowan to ey, “Si Abraham, emati so nen Apo Shiyos jet sotan i kabol la kinosto-an so nen Apo Shiyos son si-kato, ja naybilangan to ey singa enshiy basol to.”
4 Arig to sota dagbo ni sakey ya toon nan-obda. Aliwen in-akan nonta toon nandagbo-an ja kaasi to son si-kato, no diket indigatan nonta nandagbo. 5 Nem say itsora ni kepesing nen Apo Shiyos, dibshin kaasi, isonga toka ibilang sota emati son si-kato ey singa enshiy basol sha, angken say kinapodno to ket ebadeg i basol sha. Nem sotan na too, mesepol la manshinel ira son Apo Shiyos, ja eg manshinel nonta dingkara, ey si-katoy kosto-an so nen Apo Shiyos son si-kara. 6 Jet angken si Ari David nonta bayag da, inges niyay met laeng i kowan to. Inkowan to ey say too ja inbilang nen Apo Shiyos ja singa enshiy basol to, man-imdeng ma, ta sota inpangaasi nen Apo Shiyos son si-kato, aliwen sobadit iyay ni dingka to. 7 Say insolat nen Ari David, sajay: “Man-imdeng sota toon epakawanan i basol to, ta may-eshig ey sotan na basol to, singa enshi mala. 8 Man-imdeng sota toon eg ibilang ma nen Apo Shiyos sota basol to.” Kowan nen Ari David.
9 Jet iyay pay i piyan kon nemnemen jo. Sajay ya inkowan nen Ari David maypangkep ni pan-imdeng, ja inkaasi nen Apo Shiyos, aliwen na para so ni Hodiyos bengat, no diket pati sota ira aliwen Hodiyos, mayda-kam ira ngo. Tayoka pati-a ey sota pamati nen Abraham i inbilangan so nen Apo Shiyos son si-kato ey singa enshiy basol to. 10 Nem nontan, aliwa nin na maykowan ey Hodiyos si Abraham, ta eg pay laeng ekogit. Nem sigod ja inbilang ngo eshan nen Apo Shiyos ey singa enshiy basol nen Abraham, 11 jet idi in-onod ton mekokit, say olog nontan, sigorado ma ey si-kato ket too ma nen Apo Shiyos. Nem kinosto-an na sigod nen Apo Shiyos si Abraham nonta inpamati to son si-kato. Say kabol la dingka-an so nen Apo Shiyos so niyay, say si Abraham i panbedin to ja ama ni emin na memati ali. Angken sota ira aliwen Hodiyos ja eg ekogit, ibilang nen Apo Shiyos ira ngo ey enshiy basol sha. 12 Si Abraham met laeng i ama ira nonta Hodiyos ja imonod so ni ogadi ja kogit, nem aliwen sota inkakogit sha i nayda-kaman sha son Abraham, no diket mesepol la memati ngo ira ja onoran shes Abraham ja apo tayo da, ta emati ngo eshan si Abraham nonta aneng i i-onod to so nonta ogadi ni Hodiyos ja kowan sha ey kogit.
13 Sota inkari nen Apo Shiyos so nen Abraham nonta bayag da ey si-kato tan sota poli to ali i ontawid so niya dobong, aliwen na nay-awat son si-kato ja sobadit nonta inpangonod to so ni bilin nen Apo Shiyos ja nay-awat so ni Hodiyos. No diket say kabol la inkari-an to so, sota inpamati nen Abraham son si-kato. Sotan i kinosto-an son Apo Shiyos son si-kato. 14 Ta no bilang ey say i-awatan so nen Apo Shiyos so nonta dobong ja inkari to ket sota emengonod so nonta bilin ja nay-awat so ni Hodiyos, eg to tongpalen i kari to gayam. Jet angken sota pamati son Cristo, enshiy silbi to, no sotan i pesing nen Apo Shiyos. 15 Enshiy eshom ma tayo tinewid shima bilin na nay-awat so ni Hodiyos nem eg sota keshosa ali ni totoon eg imonod so. Sajay i itsora ni angken nganton bilin, ta no waray amtam ma bilin, ey eg mo onoren, basol mo.
16 Isonga sota kari nen Apo Shiyos, in-awat to son Abraham tep emati son si-kato. Sotan i inpasing nen Apo Shiyos ta piyan ton kaasi-an si Abraham. Jet aliwen sota emengonod ni bilin ja nay-awat so ni Hodiyos bengat i maybidang ey poli to, no diket angken sota ira memati ja inges toy inpasing nen Abraham, mayda-kam ira ngo. Ta si-katoy ametayon emin shi pamati. 17 Owen, si-katoy ametayon emin ja emati, jet naytotop iyay nodta naysolat nonta bayag da ja kowan to ey, “Si-kam Abraham i panbedin kon ama ni tood ka-ili-ili.” Si Apo Shiyos i makakowan niyay, isonga amta tayo ey si-katejon emati, shakitoka ibilang ey poli nen Abraham, ta angken si Abraham, emati son Apo Shiyos ja ememiyag nonta nanketey, tan emengikowan ey mepalsowa i angken nganto, jet siya, emayto-to-wa.
18 Si Apo Shiyos, inkari to son Abraham ey mebonat sota poli to. Isonga si Abraham ja istay enshiy namnama ton on-anak si asewa to tep eba-kol ma, pinati to sota inkowan nen Apo Shiyos jet isonga ewad-an ni namnama. 19 Singa eg mebedin men mengipotot, nem makedsang ngoreshan i pamati to, angken na edakay ya pasiya (tep say tawen to nontan, sandasos ma), tan angken si Sara ja asewa to ket kowan sha ey basig. 20 Nem nontan, makedsang ngo eshan i pamati to ja enshiy showashowa to maypangkep nonta kari nen Apo Shiyos son si-kato. Eg kimapoy i pamati to; intoltoloy to ngoreshan ja nanshayaw so nen Apo Shiyos. 21 Ta ebadeg i namnama to ey sota kari nen Apo Shiyos son si-kato, kabaalan ton dag-en. 22 Isonga sota pamati to i inbilangan so nen Apo Shiyos son si-kato ey enshiy basol to.
23 Sota naysolat nonta bayag da, jey inbilang nen Apo Shiyos si Abraham ey enshiy basol to, aliwen naysolat maypangkep son si-kato bengat, 24 no diket si-katejo ngo ket maybidang kito ngo ey enshiy basol tayo, no memati kito son Apo Shiyos ja inpan-ongal so nen Jesus ja Apo tayo. 25 Si Jesus, intolok toy bakdang ton metey shi koros say ikaro toy basol tayo, tan nanbiyag mowan say mebedin na kosto-an shakito ma nen Apo Shiyos no memati kito son Cristo.