3
1 Sotan den inkowan ko, baka ikowan jo et ey sota ira Hodiyos, enshiy sha nandasinan, jet kowan jo ey enshiy silbi gayam nonta ogadira.2 Kina-agpayso to, eshakel i nandasinan sha so ni emin na totoo. Say pilmiro, si-karay naypiyalan nonta esel nen Apo Shiyos ja naysolat.3 Agpayson waray eshom ma kait kon Hodiyos ja eg memati nonta kowan nen Apo Shiyos, nem angken eg memati i eshom, aliwen sotan i eg itoloyan so nen Apo Shiyos nonta sigod ja bindisiyon ja inkari to so ni poli nen Abraham.4 Si Apo Shiyos, emin na kowan to, tongpalen to, angken emin na too ket ma-o-owap. Isonga waray naysolat nonta bayag da ja kowan to ey, “Sota moka itongpal so ni kowan mo, Apo Shiyos, si-katoy asanan so ni totoo ey enshiy o-owap son si-kam; si-kam ngo eshan i mengebak, angken sipen too i makakowan ey eg mo di tongpalen i kowan mo.”
5 Sajay met laeng i ka-osala ni eshom ni dason sha, ja kowan sha ey, “No kasta, eg shakito koma shosa-en nen Apo Shiyos tep no enshi komay kakedsel ni too, eg maykowan ey mapteng si Apo Shiyos, ta enshiy kay-eshigan to. No sotan i pesing nen Apo Shiyos, singa inba-ngat toy shosa son si-katejon totoo!” (Aliwen si-kak i makanemnem niyay; naka pan-ikowan bengat, ta si-katoy kowan ni eshom.) 6 Nem arawi sotan! Si Apo Shiyos, enshiy kolang to, isonga koskostoy toka pengigsheng no sipa so ni tood ja dobong i maysedakan. 7 Kowan pay ni eshom ni dason sha ey, “No sota naka pengi-owap ket si-katoy ka-amta-an ton pasiya ey si Apo Shiyos ket enshiy o-owap pa toka ikowan, apay nga kowan to ey ikarok pay laeng i inpan-owap ko?” 8 Singa kowan sha ey angken mandeka kito ni basol ta say panbenagan to, panmaptengan met laeng. Say kowan kono ni eshom, sotan i mismon mika pan-itoro, nem angkena. Ta si Apo Shiyos, esaganen menosa nonta ira totoon maledamsis, jet sotan i anam ton mepesamak son si-kara.
9 Jet niman, enshiy nandasinan ni Hodiyos shi sango-an nen Apo Shiyos. Si-kato sota inkowan ko la, ey sapasap i toon kanayon na emanbesol—angken sipa, Hodiyos ono aliwen Hodiyos. 10 Sajay met laeng sota kowan nonta naysolat nonta bayag da ey,
“Angken sipa, enshiy toon mapteng ni olay i toka dagdag-a; 11 enshiy maka-awat nonta inpa-amta nen Apo Shiyos, enshi pay i kaonnemnem son Apo Shiyos. 12 Emin na too, inbiyang sha si Apo Shiyos, jet nan-i-inges iren ngaaw i shaka dagdag-a. Angken sakey, enshiy ogadi ton naytotop shi piyan nen Apo Shiyos. 13 Say eman-ekad shi bagang sha, edogit ta esel, isonga may-eshig ira ey naydiyangan ni etey ja epo-jasan. Angken pay sota shaka pekitbal, olbod. Sota esel la emanbo-day shi bongot sha, may-eshig ey singa sota shita ni oleg, tep emeneshal ni kait shen too. 14 Say shaka ikowan ni olay, sota abig tan empait ta esel. 15 Jet say aramid sha pay, alisto iren menekit ni kait sha, tan angken pay bono-en sha. 16 Jet angken toway toshongen sha, shaka pedigatay too nodtan, tan shaka kodo-a. 17 Sota mengi-kan ni olnos ni biyag sha, eg sha amta, 18 jet eg sha pay amten tekotan si Apo Shiyos.”
Sajay i kowan nonta naysolat ja bilin nen Apo Shiyos nonta bayag da, 19 jet amta tayo ey sota kowan nonta bilin ja nay-awat nonta bayag da, say kaytoshongan to, sota ira toon nay-awatan to ngo ja Hodiyos. Jet say kabol la naysolatan nontan, say angken sipen too, mayda-kam ira ngo ja enshiy sha idason son Apo Shiyos, tan say amta-an pay ni emin na tood ja dobong ey waray ikaro sha so nen Apo Shiyos ja basol sha. 20 Ta angken sipen too, enshiy kosto-an nen Apo Shiyos ni kabol bengat ni pengonod to so nonta kowan ni bilin ja nay-awat nonta bayag da. Ta sotan na bilin, si-katoy mengipa-amta bengat ey waray basol tayon totoo.
Emin na tood ja dobong, sota pamati to son Cristo i kosto-an so nen Apo Shiyos son si-kato
21 Nem niman, inpa-sas nen Apo Shiyos so ni totoo ey aliwen sota pengonod nonta bilin nonta bayag da bengat i kosto-an to so ni too. Jet angken sotan na bilin ja naysolat, tan sota kowan ni para padto nonta bayag da, toka ipalewag met laeng ey aliwen sotan i kosto-an so nen Apo Shiyos so ni too. 22 Say kosto-an so nen Apo Shiyos so ni too, sota pamati to so nen Jesucristo. Jet sama ira Hodiyos, eg to paboran; nan-i-inges i pesing to so ni emin na too. 23 Ta sapasap ja nanbasol i toon emin. Enshiy en pimosin engonod nonta kowan nen Apo Shiyos, isonga emin na too, arawi ira nodta eshiyosan na ogadi ja istay piyan to komen dag-en sha. 24 Nem niman si Apo Shiyos, kosto-an shakito ta ebadeg i kaasi to, jet sajay ya kaasi to, dibshi; aliwen sobadit ni dingka tayo. Sajay i dag-en to, ta inkaro nen Cristo Jesus shi koros sota istay keshosa tayo. 25 Si Apo Shiyos, ninemnem to ngo eshan ey si Cristo, metey ja maybokbok i shaleto shi koros, say emin na memati son si-kato, mepekawanan i basol sha. Sajay i dingka nen Apo Shiyos say ma-amta-an ey kosto ngo eshan i toka dagdag-a. Ta angken inpalebas to nin nontan da sota basol ni totoo ta na-anos, 26 niman na etey si Cristo, inpa-sas to ey eg to mala pedabas. Jet niman ma, toka kosto-iy too no memati son Jesus.
27,28 Jet enshi mala niman i tayo idastog, ta say kosto-an shakito so nen Apo Shiyos, aliwen sobadit nonta dag-en tayon mapteng ja pengonod ni bilin to. Say kowan ko, say kekosto-i so nen Apo Shiyos so ni too, sota pemati to son Cristo. 29,30 Jet nan-i-inges i Hodiyos tan aliwen Hodiyos ja kosto-an nen Apo Shiyos maypangkep ni pamatira. Ta si Apo Shiyos, abos ton Shiyos ja podno, jet aliwen sota Hodiyos bengat i maka-Shiyos so, no diket Shiyos ngo met laeng ira nonta aliwen Hodiyos. 31 Sajay ya inkowan ko la, aliwen kowan ko ey ibiyang tayo sota bilin nen Apo Shiyos nonta bayag da, ja naysolat; ekak ikowan ey sina-datan niya pamati son Cristo. Enshi, arawi itan. Say agpayso, si-kamiy emengitosho ni koston olog nontan na bilin.