Momil e yohael kaol Jidu'ae diqqye e yohael
4
Ngael gaeq e yelchoqhael o, hae qiqsheel e yohael myel xiangxinl hhaeq maeqngeel'ae, yohael tyuhael laoq Momil ae'lye lael hhaemaeq lye shilfu biq maoqhhae, haelnaeqmyel jaq xianzhi milcaeq taq'ae keellael kaol'ae. 2 Noteel senllinq mael xilnye fudu hhei ongl'ae: Yesu Jidu laoq cholyaeq peqlal kaol yi hhae lye cenqrenl hael laoq, yohael tyulmael laoq Momil ae'lye lael ngeelvae. 3 Yesu Jidu laoq cholyaeq peqlal kaol yi hhae lye maeq cenqrenl hael laoq, yohael tyulmael laoq Momil ae'lye lael maeqngeel'ae, Jidu'ae diqqye e qiq hhaeq e yohael mael'ae; noteel yoqhhaeq lael maoqlye hhae lye gaeq gol vae, kaol yaeqmeel yoqhhaeq milcaeq taq'ae zhol wae.4 Yaeqguqhael o, noteel laoq Momil hhae, kaol jaq xianzhihael'ae zonglyinq wae, kaol noteel onglci vae zhol e tyutaeq laoq milcaeq taq'ae zhol e tyutaeq taq'ae hhael heeq kaol'ae. 5 Yoqhhaeteel laoq shilgail hhae, tyulkaol, gee mael eiq milcaeq taq e silqinq'ae, kaol shilgail mael eiq yoqhhaeteel e saeziq mael'ae naelhaeq vae. 6 Aedeeteel laoq Momil hhae, kaol Momil'ae siqcongl e cholyaeqhael laoq aedeeteel gee mael naelhaeq'ae, Momil hhae lye maeqngeel e cholyaeq laoq aedeeteel gee mael maeq naelhaeq'ae. Xilnye laol, aedeeteel zhen'liq e yohael mael kaol maq hoq e yohael mael fudu ongl'ae.
Momil laoq gaeq mael ngeelvae
7 Ngael gaeq e yelchoqhael o, aedeeteel qiqhhaeq qiqhhaeq'ae gaeq maoqhhae, gaeq mael laoq Momil ae'lye lael kaol'ae. Cholyaeq'ae gaeq hael laoq, Momil ae'lye du'lal hhae, kaol Momil'ae siqcongl'ae. 8 Momil laoq gaeq mael ngeelvae, tyulkaol, cholyaeq'ae maeq gaeqhael laoq, Momil'ae maeq siqcongl'ae. 9 Momil lye yoqhhaeq e Yaqyo qiq hhaeq mael eiq milcaeq taq'ae bi yi mael laoq, aedeeteel yoqhhaeq ae'lye hha dyeq maoqlye hhae; kaol Momil e gaeq mael aedeeteel onglci'ae mol du'lal vae. 10 Aedeeteel Momil'ae gaeq biq maeqngeel'ae, Momil aedeeteel'ae gaeq laeq hhae, kaol yoqhhaeq e Yaqyo yaol aedeeteel e golsiq gae'lye, Golsiq Zaelheel bi geiq maoqlyekaol moqheilheil du hhei hhae; xilmael laoq gaeq mael ngeelvae. 11 Kaol ngael gaeq e yelchoqhael o, Momil aedeeteel'ae dyel'eiq xilnye gaeq laeq, kaol aedeeteel eiq qiqhhaeq qiqhhaeq'ae gaeq maoqhhae. 12 Cholyaeq Momil yaol qiqzael eiq maeq mol gol'ae, ngeelfeiq, aedeeteel qiqhhaeq qiqhhaeq'ae gaeq kaollaoq, Momil aedeeteel onglci vae zhol, kaol yoqhhaeq e gaeq mael aedeeteel onglci'ae maq lo myel qiqgiq maqza vae.
13 Momil yoqhhaeq e yohael mael aedeeteel'ae biq hhei laq, tyulkaol, aedeeteel laoq aedeeteel yoqhhaeq onglci vae zhol, yoqhhaeq eiq aedeeteel onglci vae zhol'ae lye loq'ae. 14 Aeqdae lye Yaqyo yaol milcaeq taq e cholyaeqhael e jiulzuq geiq lye moqheilheil du hhei, xilmael laoq aedeeteel mol gol wae, kaol yaeqmeel zoqzenlkei. 15 Aeqsul laoq Yesu Momil e Yaqyo'ae lye cenqrenl laol, Momil yoqhhaeq onglci vae zhol'ae, kaol yoqhhaeq eiq Momil onglci vae zhol'ae. 16 Momil aedeeteel'ae gaeq laeq mael aedeeteel loq'ae, kaol xiangxinl vae. Momil laoq gaeq mael ngeelvae; kaol gaeq e onglci vae zhol laol Momil onglci vae zhol ngeelvae, kaol Momil eiq yoqhhaeq onglci vae zhol'ae. 17 Xilnye laol, gaeq mael aedeeteel onglci vae qiqgiq geehhael maqza vae, kaol aedeeteel'ae shenqpanl laeq fu laoq, qiqgiq maq gu kael vae. Yesu haelmillye laol, aedeeteel milcaeq taq vae eiq haelmillye kaol'ae. 18 Gaeq e onglci'ae gu mael maqza'ae, qiqgiq geehhael maqza myel e gaeq mael laoq gu mael lyeqdu ongl'ae, gu e onglci'ae laoq chenqfaq za hhae, kaol gu e cholyaeq laoq gaeq e onglci'ae qiqgiq geehhael maqza myel maeqngeel wae siq. 19 Aedeeteel gaeq mael laoq, Momil laefuqmyel aedeeteel'ae gaeq laeq kaol'ae. 20 Aeqsul "Ngael Momil'ae gaeq lil lye" gee, ngeelfeiq, yoqhhaeq e aqsseq aeqnil'ae neemasu zaq kaollaoq, zaqgiqgiq ngeelvae. Mol laelkiq e aqsseq aeqnil'ae maeq gaeq laol, maeq mol laelkiq e Momil'ae maeq gaeq'ae. 21 Momil aedeeteel'ae minllinl laeq mael laoq, Momil'ae gaeq laol, aqsseq aeqnilhael vae eiq gaeq maoqhhae lye hhae.