Baoqloq aeqyoyoq e mulhhael gae'lye gee'loqzaeqhoq
10
Ngael Baoqloq noteel'ae mol fu naoqyae'lye e qiq hhaeq lil, noteel e tyuqvae maeq zhol fu noteel'ae neemae bozaeq myel lil, yaeqmeel ngael Jidu e naoqyae'lye mael kaol pinqhoq ae'lye haelmeeqlye gee laeqngeel. 2 Qiqhhaeq laelhhaeq laoq ngaeteel zongl mael cholyaeq e loqho maellye zongl hhae lye kei biq hhae, ngael nyuq laoq xilnye cholyaeq'ae laoq teel eiq maq gu zaq myel zongl biq maoqhhae; ngeelfeiq, ngael laoq ngael tyuqvae zhol fu, xilnye e neemae bozaeq mael haeq bi za laq lye geezaeq lil. 3 Ngaeteel ruqtiq onglci'ae zonglzhol feiq, ruqtiq maellye daqzhangldiq maeqngeel yil. 4 Ngaeteel daqzhangldiq moqgoq mael laoq ruqtiq maellye maeqngeel'ae, Momil e onglzaeq maellye hhae, kaol sseetae'lye diaobaoq mael diq bongq ongl hhae. Aedeeteel lye maeq qiqsheel e zaqgiqgiq e loqho mael, 5 Kaol cholyaeq yaol Momil vae maeq bi siqcongl lye maeq qiqsheel e diqqye e, haeqgaomyel ciqlongl hhei e congqciq mael diqbongq hhei, kaol cholyaeq e neemae mael diqkoq hoqlaeq, kaol Jidu e saeziq mael bi naelhaeq. 6 Ngael paeqgaelsael meeq aeqwae, kaol noteel aeqdilmyel saeziq naelhaeq fu laoq, saeziq maeq naelhaeq e gilzuqmyel cholyaeqhael'ae chenqfaq lal maoqlye hhae.7 Noteel laoq silqinq e nildu'ae maoq maeq fu'ae. Cholyaeq aeqyoyoq laoq Jidu hhae lye xiangxinl kaollaoq, yoqhhaeq zail nyuq fufu maoq wae siq, yoqhhaeq Jidu hhae lye laol, ngaeteel eiq Jidu hhae lye ngeelvae. 8 Hhaoqsongl ngaeteel'ae laqtaq biq hhei laq mael laoq, noteel'ae aqha bi bo'lael maoqlye hhae, noteel yaol zonglleeq maoqlye maeqngeel'ae; ngael laqtaq xilmael gae'lye aelheel hodazaq kaol'eiq saqdol yae lye maeq kei yae. 9 Ngael saeziq xilmael gee mael laoq, aeqgael noteel laoq ngael xinl cu mael noteel'ae hagu maoqlye hhae lye kei biq maeqhe. 10 Qiqhhaeq laelhhaeq xilnye gee kaol'ae: "Yoqhhaeq xinl mael taq'ae gee e saeziq mael laoq aeqlyeq maeq lyeq, kaol aqhabo'lye gee, ngeelfeiq, aeqyoyoq laoq ruanqroq qiqgiq maeq onglzaeq, hael gee e saeziq mael eiq puqqil maqza'ae." 11 Xilnye cholyaeqhael laoq loq maoqhhae, ngaeteel tyuqvae maeq zhol fu xinl mael taq'ae haelmillye gee laol, qiqhhaeq qiqhhaeq'ae mol fu eiq aeqdilmyel tyulnye zongl maoqlye lil.
12 Ngaeteel laoq aeqyoyoq kaol aeqyoyoq'ae gailsaolzaeq e cholyaeqhael nyegael qiqsheel lil lye maeq biqjiaol peq laq kaol'ae; yoqhhaeteel aeqyoyoq laoq aeqyoyoq haelmillye lil lye gee zaeq hhae, aeqyoyoq laoq aeqyoyoq'ae biqjiaolzaeq hoq hhae, xilnye zongl mael laoq geel e maeqngeel'ae. 13 Ngaeteel golyiq myel maq hodazaq goq yae, ngeelfeiq, ngaeteel laoq Momil lye he'qye deelhhei e gailxinl vae maoq maq hodazaq yil. Gailxinl xilmael noteel tyuqvae dyel'eiq zongl heeqdu keelyi aeqwae. 14 Ngaeteel noteel e tyuqvae zongl heeqdu keelyil fu aeqyoyoq e gailxinl mael'ae maeq jyeqli yil, qiqshiq laoq, laefuqmyel noteel tyuqvae keelyi, kaol Jidu e fuqyin mael geegaeq mael laoq ngaeteel kaollil. 15 Ngaeteel ochoq e duqhee'lye mul maellye golyiq myel maq hodazaq yil; ngaeteel xilnye xiwangl lil: Noteel xinlxin hhael meeq lael fu, ngaeteel'ae he'qye deelhhei laeq myel vae eiq noteel gae'lye hhael bi heeq duyil, 16 Xilnye laol, fuqyin mael noteel e milcaeq nildu vae hhae geegaeq duyil wae, ochoq geegaeq gol e milcaeq vae, kaol ochoq lye zonglmeeq hhei e silqinq mael taq'ae hodazaq maeqngeel yil. 17 Ngeelfeiq, "Hoda biq maoq mael laoq, Hhaoqsongl'ae hoda biq maoqhhae." 18 Momil hhaol biq e cholyaeq laoq, aeqyoyoq laqma deiqqeizaeq maeqngeel'ae, Hhaoqsongl laqma deiqqei biq kaol'ae.