Fenglxianl mael
8
Aqsseq aeqnilhael o, ngaeteel laoq Momil Maqqiqdunl e jiaolhuilhael'ae biq biq e enhuil mael, noteel'ae geegaeq laeqngeel: 2 Yoqhhaeteel'ae saeqlael onglci'ae guaeq'ei shilfu biq fu, hhaol mael bong'lye za wae siq, yoqhhaeteel laoq yoqhhaeteel'ae qiqgiq maq zacongl biq feiq, zhee heildu sheqhhaq myel fenglxianl hhae. 3 Ngael zoqzenlkei hhaeq, yoqhhaeteel laoq hael zonglkeel ongl maellye zongl hhae, zonglkeel ongl mael'ae jyeqli myel fenglxianl nae hhae, 4 Yoqhhaeteel aeqyoyoq ngaeteel'ae hae'nae pu myel, senltuqhael meeq e silqinq zongl mael taq'ae mulyo biq mael bi bael fenglxianl laeq lye guaeq'ei geezaeq lael laeq hhae; 5 Kaol yoqhhaeteel zongl mael ngaeteel chifu deelzaeq hhei dyul maeqcilmyel, Momil e zhiqyil laoqmyel laefuqmyel aeqyoyoq yaol Hhaoqsongl'ae sheeqmoq hhei biq, kaol ngaeteel'ae yol heil laeq. 6 Tyulkaol, ngaeteel Tiqdo'ae haelmeeqlye gee biq, noteel onglci'ae meeq e silqinq xilmael zhoq zongl vae laol, xilmael zonglmeeq hhei maoqhhae. 7 Ngeelfeiq, noteel xinlxin, myeqbongqdyeq, zhishiq, laqheiqqyel, kaol ngaeteel noteel'ae neegaeqgaeq biq mael taq'ae, ochoq taq'ae hhael naeq'ae, aelmaol, noteel meeq e silqinq xilmael taq vae eiq ochoq taq'ae hhael zonglmeeq hhei maoqhhae.8 Ngael saeziq xilmael gee mael laoq, noteel'ae minllinl maeqngeel yil, ochoq e laqheiqqyel ae'lye noteel e neegaeqgaeq mael aeqdilmyel hhaemaeq lye shilfu lil. 9 Noteel aedeeteel e Hhaoqsongl Yesu Jidu e endianq mael loq'ae: Yoqhhaeq aeqdilmyel zacongl hhae, ngeelfeiq, noteel gae'lye maq zacongl e peqyil hhei, kaol noteel'ae yoqhhaeq e maq zacongl gae'lye zacongl e bi peqlal. 10 Ngael xilmael taq'ae neemae nyuq mael noteel'ae geegaeq biq mael laoq, noteel'ae bi meeqyo'li maoqlye lil, noteel zhoqmyel xilmael zongl, zail laoq, xilmael zongl maoqlye nyuqdu hhei mael qiq hoq zoq vae kaol'ae. 11 Yaeqmeel noteel xilmael zonglbyel maoqhhae, zongl nae e neemae za laol, noteel hael zonglkeel ongl maellye zonglmeeq hhei maoqhhae. 12 Cholyaeq zongl nae e neemae za kaollaoq, Momil yoqhhaeq'ae halza maellye hhaol gae'lael aeqmyel mul laq'ae, yoqhhaeq'ae maqza maellye maeqngeel kaol'ae. 13 Ngael ochoq'ae laoq saelza'lye bi ngeel, noteel'ae laoq hhaeqdyul bi dyul myel xilnye maeq zongl yil, saeqsaeldye'lye bi ngeel maoqlye lil: 14 Yaeqmeel noteel e zacongl mael yoqhhaeteel'ae maq zacongl fu heil hhei biq, kaol yoqhhaeteel e zacongl mael aeqgael noteel'ae bi heil hhei, xilnye laol saeqsaeldye wae. 15 Momil e Suqhhaq taq'ae cu deelhhei laoqmyel:
Haelnaeqmyel heille hhei hael maeq naeq du'lal,
aelheellye heille hhei hael eiq maq lo yae lye maqza'ae.
Tiqdo kaol yoqhhaeq nyegael mulhhael qiqgael mul e cholyaeq
16 Ngael Momil'ae meeqyaevae lye gee lil, ngael noteel'ae laqheiqqyel mael Tiqdo e neemae vae eiq bi za wae. 17 Yoqhhaeq laoq ngaeteel hael geezaeq biq mael naelhaeq do hhei'laol, laqheiq nyeq'ei hhael qyel biq kaol aeqyoyoq noteel tyuqvae yil nae hhae. 18 Ngaeteel lye aqsseq aeqnil qiq hhaeq yaol yoqhhaeq nyegael bal yil lye moqheilheil du hhei, cholyaeq xitaeq fuqyin geegaeq e silqinq mael taq'ae jiaolhuilhael e cholyaeqhael laqma deiqqei gil biq hhae; 19 Xilnye dyul maeqcil, jiaolhuilhael e cholyaeq lye yoqhhaeq yaol saelpodu hheikaol ngaeteel nyegael bi bael deel hhae, kaol ngaeteel'ae toqshiq hhei laeq e dyuqbaqjin hhei e xilmael heil keelli vae, xilnye zongl mael laoq, Hhaoqsongl'ae rongqyaol, kaol ngaeteel e meeq e yilsi mael eiq zenlminq du hhei maoqlye hhae. 20 Ngaeteel xilnye zongl mael laoq, aeqgael qiqhhaeq laelhhaeq laoq ngaeteel heil'eeq e fenglxianl hhei e dyuqbaq mael naeq laol, ngaeteel'ae xilnye yulnye lye gee lael maeqhe. 21 Ngaeteel haelmeeqlye meeq e silqinq zongl lil, Hhaoqsongl e yiqsi'ae xilnye zongl dyul maeqcil, cholyaeq e yiqsi vae eiq xilnye zongl lil. 22 Ngaeteel lye aqsseq aeqnil qiq hhaeq yaol bal yil lye moqheil yol heil du hhei. Xitaeq e laqheiqqyel mael, ngaeteel haelnaeqmyel silqinq mael taq'ae hae'nae pu myel shilfu gol aeqwae, yaeqmeel yoqhhaeq noteel'ae zhee xiangxinl gae'lye, laqheiq nyeq'ei hhael qyel biq'ae. 23 Tiqdo yoqhhaeq laoq ngaeq e yelchoq'ae, noteel'ae fuqsil maoqlyekaol ngaeq nyegael mulhhael qiqgael mul e cholyaeq geiq hhae. Aqsseq aeqnil tyu niq nulhhaeq laoq jiaolhuilhael e moqheilheil duyil e cholyaeq'ae, Jidu e rongqyaol'ae. 24 Tyulkaol, noteel aeqdilmyel jiaolhuilhael e cholyaeq e yiqsi'ae lye, noteel e neegaeqgaeq mael, kaol ngael noteel'ae hoda biq mael zenlminq du hhei maoqhhae.