आत्मामन के परखा
4
ए मोचो मीत भाईमन, गुलाय संवसार ने खुबे फंदी अगमजानीमन बिगरलासोत। एईकाजे सपाय आत्मामन के नी पतेयाहा, मानतर आत्मामन के परखा कि कोन महापरभु बाटले आय।
2 जोन आत्मा, जीसु किरिस्त के मनुक रूप धरुन ईलो बलुन मानेसे, हुन आत्मा, महापरभु बाटले आय। असन करुन तुमी महापरभु चो आत्मा के चिताउक सकास।
3 आउर जोन आत्मा जीसु के असने नी मानेसे, हुन महापरभु बाटले नोआय। ए हुनी किरिस्त-बयरी चो आत्मा आय, जेचो बारे ने तुमी सुनलासाहास कि हुन एउआय, हुन एबे बले संवसार ने आसे।
4 ए पिलामन, तुमी महापरभु चो लोग आहास, आउर तुमी किरिस्त चो बयरीमन के जीतलासाहास, कसनबलले जोन आत्मा तुमचो भीतरे आसे, हुन संवसार चो आत्मा ले बड़े आय।
5 हुनमन संवसारी आत, एईकाजे संवसारी गोट गोटेयायसोत, आउर संवसार हुनमन चो सुनेसे।
6 आमी महापरभु चो लोग आंव। जोन महापरभु के जानेसे, हुन आमचो गोट धरेसे, मानतर जोन महापरभु के नी जानेसे, हुन आमचो गोट के नी धरे। एचई ले आमी सत आत्मा आउर भरमातो आत्मा के चिताउंसे।
महापरभु मया आय
7 ए मोचो मीत भाईमन, आमी गोटोक-दुसर के मया करुं, कसनबलले मया महापरभु बाटले आय। जोन बले मया करेसे, हुन महापरभु ले जनमलोसे आउर महापरभु के जानेसे।
8 जोन मया नी करेसे, हुन महापरभु के नी जानेसे, कसनबलले महापरभु मया आय।
9 असन करुन महापरभु आपलो गोटकी ची बेटा के संवसार ने पठाउन आमचो काजे आपलो मया के दखालो कि आमी हुनचो बाटले जीव पाउं।
10 सत मया एई आय: आमी महापरभु के मया नी करलु, मानतर हुन आमके मया करलो आउर आमचो पाप खंडान, जतरा होतो काजे आपलो बेटा के पठालो।
11 ए मोचो मीतमन, महापरभु आमके खुबे मया करलो, एईकाजे आमी बले गोटोक-दुसर के मया करतोर आय।
12 महापरभु के कोनी केबई नी दखलासे। आमी गोटोक-दुसर के मया करुंसे जाले हुन आमचो संगे रयसे आउर आमचो भीतरे महापरभु चो मया सिद होयसे।
13 महापरभु आमके आपलो आत्मा ले दिलोसे, एचई ले आमी जानुंसे कि आमी हुनचोने आसुं आउर हुन आमचो भीतरे आसे।
14 आमी दखलुसे बले आउर गवई देउंसे कि बुआ महापरभु आपलो बेटा के ए संवसार चो मुक्ति देउ बनाउन पठालोसे।
15 जोन, जीसु के महापरभु चो बेटा आय मानेसे, महापरभु हुनचोने रयसे, आउर हुन महापरभु ने रयसे।
16 एईकाजे आमी जानुंसे आउर पतेयाउंसे कि महापरभु आमके मया करेसे। महापरभु मया आय, आउर जोन मया ने रयसे, हुन महापरभु ने रयसे आउर महापरभु हुनचोने रयसे।
17 असने मया आमचो भीतरे समपुरन होली गुने नियाव दिने ढाढ़ुस करुक सकवां, कसनबलले जसन किरिस्त ए संवसार ने रलो उसनेची आमी बले ए संवसार ने आसुं।
18 मया ने डर नीआय, मानतर समपुरन मया डर के लापी गुचायसे। कसनबलले डर ले डंड होयसे। जोन डरेसे, हुन मया ने समपुरन नी होलोसे।
19 महापरभु आगे आमके मया करलो एईकाजे आमी मया करुंसे।
20 कोनी बलेसे: मय महापरभु के मया करुआंय, मानतर आपलेई भाई के बईर करेसे जाले हुन फंदी आय। कसनबलले हुन आपलो दखतो भाई के मया नी करेसे जाले, केबई नी दखलो महापरभु के कसन ने मया करुक सकेदे?
21 किरिस्त आमके ए हुकुम दिलोसे: जोन महापरभु के मया करेसे, हुन आपलो भाई के बले मया करतोर आय।