बिसवास ले संवसार के जीततोर
5
जोन, जीसु ची किरिस्त आय बलुन पतेयायसे हुन महापरभु ले जनमलोसे, आउर जोन, बुआ के मया करेसे हुन, हुनचो बेटा के बले मया करेसे।
2 जिदलदांय आमी महापरभु के मया करुंसे, आउर हुनचो हुकुममन के मानुंसे, तेबे आमी जानुंसे कि आमी महापरभु चो बेटा-बेटीमन के मया करुंसे।
3 कसनबलले महापरभु चो हुकुममन के मानतोर ची हुनके मया करतो कटार आय, आउर हुनचो हुकुममन के मानतोर काई खट-खट नोआय।
4 कसनबलले जोन महापरभु ले जनमलोसे, हुन ए संवसार के जीतेसे*, आउर ए संवसार के जीततोर आपलो बिसवास किरता चे आय।
5 ए संवसार के कोन जीतुक सके? सोजे हुन, जोन जीसु के महापरभु चो बेटा आय बलुन पतेयायसे।
जीसु किरिस्त चो बारे ने गवई
6 एई आय हुन, जोन आमचो लगे पानी* आउर लोउ* बाटले एउ रलो, बललोने जीसु किरिस्त। सोजे पानी बाटले नाई मानतर पानी आउर लोउ बाटले एउ रलो।
7 आउर जोन एचो गवई देयसे हुन आत्मा आय, कसनबलले आत्मा सत आय।
8 आत्मा, पानी आउर लोउ तीनो गवई देयसोत, आउर तीनो गोटकी गोट ने राजी आसोत।
9 आमी मनुकमन चो दिलो गवई के मानुंसे, मानतर महापरभु चो गवई हुनचो ले खुबे बड़े आय, आउर महापरभु आपलो बेटा चो बारे ने गवई दिलोसे।
10 जोन, महापरभु चो बेटा के पतेयायसे हुन आपलो मन ने ए गवई के मानेसे। जोन, महापरभु के नी पतेयाये, हुन, हुनके फंदी बनायसे, कसनबलले हुन, महापरभु आपलो बेटा चो बारे ने दिलो गवई के बले नी पतेयाये।
11 हुन गवई ए आय: महापरभु आमके जुग-जुग चो जीव दिलोसे, आउर हुन जुग-जुग जीव चो मूर हुनचो बेटा आय।
12 जेचो संगे बेटा आसे, हुनके जीव आसे, आउर जेचो संगे महापरभु चो बेटा नीआय, हुनके जीव बले नीआय।
जुग-जुग चो जीव
13 मय ए चिटी तुमके एईकाजे लिखलेसे कि तुमी महापरभु चो बेटा चो नाव के पतेयातो लोग आहास। कसनबलले तुमी जाना, जुग-जुग चो जीव तुमचो आय,
14 आउर आमके हुनचो पुरे ए गोट चो ढाढ़ुस आसे कि हुनचो मन-इछा असन काई बले मांगलोने हुन आमके देउ ची आय।
15 जिदलदांय आमी जानुंसे कि काई बले मांगलोने हुन आमके देयसे, तेबे एके बले आमी जानुंसे कि जोन बले आमी हुनके मांगलुसे, हुनके आमी पावलुसे।
16 कोनी आपलो भाई के असन पाप करतो के दखलोने, जेचो पलटा मोरना नोआय, तेबे हुनचो काजे पारथना करा, आउर महापरभु हुनके जीव देयदे। मय हुन पाप चो बारे ने बलेंसे जेचो पलटा मोरना नोआय, असन पाप बले होयसे। मानतर जेचो पलटा मोरना आय, एचो काजे पारथना करतो काजे मय नी सांगेंसे।
17 सबु बरन चो ओधरम तो पाप आय, मानतर असन पाप बले आसे जेचो पलटा मोरना नोआय।
18 आमी जानुंसे कि जोन महापरभु ले जनमलोसे, हुन पाप नी करेसे। कसनबलले हुनके महापरभु चो बेटा बचायसे, आउर हुनके सयतान छिंउक नी सके।
19 गुलाय संवसार सयतान चो हक ने आसे, मानतर आमी जानुंसे कि आमी महापरभु चो आंव।
20 आमी जानुंसे कि महापरभु चो बेटा ईलोसे आउर हुन आमके सत महापरभु के चितातो बुद दिलोसे, आउर आमी हुनी सत महापरभु ने आसुं, बललोने हुनचो बेटा जीसु किरिस्त। सत महापरभु आउर जुग-जुग चो जीव हुनी आय।
21 ए बेटा-बेटीमन, तुमी मूरतमन ले बाचुन राहा।