महापरभु चो बेटा-बेटीमन
3
दखा, बुआ आमके कितरो मया करलोसे कि आमके आपलो बेटा-बेटीमन बलेसे, आउर आमी हुनचो बेटा-बेटीमन आंव ची। मानतर ए संवसार चो लोग महापरभु के नी जानोत एईकाजे आमके बले नी जानोत।
2 ए मोचो मीत भाईमन, एबे आमी महापरभु चो बेटा-बेटीमन आंव, आउर एतो समया ने आमी कसन रउंदे, एके एबे नी जानु। मानतर ए गोट के जानु कि किरिस्त फेर ईलोदांय, आमी बले हुनचेई असन दखा देउंदे। कसनबलले हुनके उसनेची आमी दखुंदे जसन हुन आसे।
3 आउर जोन बले हुनचो उपरे असन आसा करसोत, हुनमन आपने के पवितर करसोत जसन किरिस्त पवितर आय।
4 जोन कोनी पाप करेसे हुन महापरभु चो नियम-कानुन चो बिरुद करेसे आउर पाप ओधरम कटार आय।
5 तुमी जानास, जीसु ने काई पाप नीआय। मानतर हुन आमी सपाय चो पाप खंडान करतो काजे ईलो।
6 एईकाजे जोन बले हुनचोने चमकट रयसे, हुन पाप नी करते रयसे, मानतर जोन बले पाप करेसे, हुन हुनके नी दखलोसे आउर नी जानलोसे।
7 ए बेटा-बेटीमन, कोनी तुमके भरमाते रले, तुमी नी भरमा। जोन धरम बुतामन करेसे, हुन किरिस्त असन धरमकारी आय।
8 जोन बले पाप करेसे, हुन सयतान बाटले आय, कसनबलले सयतान, मूर ले ची पाप करेसे। मानतर सयतान चो बुता के नास करुक महापरभु चो बेटा ईलो।
9 जोन बले महापरभु ले जनमलोसे,* हुन पाप नी करेसे, कसनबलले हुनचोने महापरभु चो गुन आसे, आउर हुन पाप करुक ची नी सके, कसनबलले हुन महापरभु ले जनमलोसे।
10 एचई ले महापरभु चो बेटा-बेटीमन आउर सयतान चो बेटा-बेटीमन के चिताउक होयसे। कसनबलले ओधरमीमन आउर आपलो भाई के मया नी करतोमन महापरभु चो बेटा-बेटीमन नोआत।
गोटोक-दुसर के मया करा
11 तुमी ए खबर के मूर ले सुनलासाहास कि आमी गोटोक-दुसर के मया करुं।
12 आउर आमके कईन असन नी होतोर आय जोन सयतान बाटले रये, हुन आपलो भाई के मोरते मारलो। हुन आपलो भाई के काय काजे मोरते मारलो? एईकाजे कि आपलो बुता अडरा रये आउर हुनचो भाई चो बुता धारनिक रये।†
13 ए भाईमन, संवसार चो लोगमन तुमके बईर करलोने तुमी नी भक्याहा।
14 आमी भाईमन के मया करुंसे गुने जानुं कि आमी मोरना के जीतुन जीव ने अमरलुसे। मानतर जोन भाईमन के मया नी करे, हुन मोरना चो हक ने आसे।
15 जोन बले आपलो भाई के बईर करेसे, हुन माने-मारा आय, आउर तुमी जानास कोनी माने-मारा ने जुग-जुग चो जीव नीआय।
16 मया के आमी एचई ले जानुंसे कि किरिस्त आमचो काजे आपलो जीव दिलो, उसने आमके बले भाईमन काजे जीव देतोर आय।
17 जेचो लगे संवसार चो धन-माल आसे आउर हुन, आपलो भाई के गरीब-धुरीब दखुन हुनके जीव नी दुखे जाले, हुनचो मन ने महापरभु चो मया नीआय।
18 ए बेटा-बेटीमन, आमी सोजे आपलो टोंड चो गोट ले ची नाई, मानतर सत मन ले भलई बुता करुन गोटोक-दुसर ले मया करुं।
महापरभु चो पुरे ढाढ़ुस
19 आमचो भलई बुता ले पक्का जानवां कि आमी सत बाटे आसुं, आउर आमचो मन बदी देतो बेरा हुनचो पुरे आपलाहान मन के ढाढ़ुस करुक सकवां,
20 कसनबलले महापरभु आमचो मन ले बड़े आय, आउर हुन सपाय के जाने।
21 ए मोचो मीत भाईमन, आमचो मन आमके बदी नी देये जाले, आमी महापरभु चो पुरे ढाढ़ुस करुक सकुं,
22 आउर जोन बले आमी मांगुंसे, हुन आमके हुनचो बाटले मिरेसे, कसनबलले आमी हुनचो हुकुममन के मानुंसे आउर हुनके भावतो बुतामन ची करुंसे।
23 आउर हुनचो हुकुम ए आय: आमी हुनचो बेटा जीसु किरिस्त के पतेयाउं, आउर किरिस्त दिलो हुकुम असन आमी गोटोक-दुसर के मया करुं,†
24 जोन महापरभु चो हुकुममन के मानेसे, हुन महापरभु संगे आउर महापरभु हुनचो संगे रयसे। महापरभु दिलो आत्मा बाटले आमी जानुंसे कि हुन आमचो संगे आसे।