आमके साका होउ किरिस्त
2
ए मोचो बेटा-बेटीमन, तुमी पाप नी करा बलुन मय, ए गोटमन तुमके लिखेंसे, मानतर कोनी पाप ने पड़ेसे जाले, आमचो बुआ लगे गोटकी ची धरमी, जीसु किरिस्त आसे जोन आमके साहरा होउक सके।
2 हुनी आमचो पापमन चो खंडान काजे जतरा होलो, सोजे आमचेई पापमन काजे नाई, मानतर संवसार चो सपाय चो पापमन काजे बले आय।
3 आमी हुनचो हुकुममन मानुन हुनचेई असन चललोने, आमी महापरभु के जानलुसे बलुन पक्का होयसे।
4 कोनी बलेसे: मय हुनके जानले, मानतर हुनचो हुकुममन असन नी चलेसे जाले हुन फंदी आय आउर हुनचोने सत नीआय।
5 जोन बले महापरभु चो बचन असन चलेसे, एचोले पक्का होयसे कि हुन महापरभु के सत-मया करेसे। एचई ले आमी जानुंसे कि आमी हुनचोने आसुं।
6 जोन कोनी बलेसे: मय हुनचोने आंसे, हुनके जीसु ची असन चलतोर आय।
नवा हुकुम
7 ए मोचो मीत भाईमन, मय तुमके काई नवा हुकुम के नाई, मानतर हुनी जुना हुकुम के लिखेंसे, जोन तुमके मूर ले मिरलीसे। ए जुना हुकुम हुन बचन आय जेके तुमी सुनलासाहास।
8 तेबले बले मय तुमके नवा हुकुम लिखेंसे, आउर ए हुकुम हुनचोने आउर तुमचो ने सत दखा देयसे, कसनबलले अंधार सरेसे आउर एदांय सत-उजर बरेसे।
9 जोन बलेसे: मय उजर ने आंसे आउर आपलो भाई के बईर करेसे, हुन एबे बले अंधार ने ची आसे।
10 जोन आपलो भाई के मया करेसे, हुन उजर ने रयसे, आउर आपलो मीत भाई के धोकड़ातो काई गोट हुनचोने नीआय।
11 मानतर जोन आपलो भाई के बईर करेसे, हुन अंधार ने आसे आउर अंधार ने चलेसे। हुन नी जाने कहां जायसे, कसनबलले अंधार हुनचो आंईकमन के काना बनालीसे।
12 ए बेटा-बेटीमन, मय तुमके लिखेंसे कि
तुमचो पापमन जीसु किरिस्त चो नाव ले खेमा होलीसे।
13 ए आया-बुआमन, मय तुमके लिखेंसे कि
जोन मूर ले आसे, हुनके तुमी जानलासाहास।
ए जुवानमन, मय तुमके लिखेंसे कि
तुमी सयतान के जीतलासाहास।
ए बेटा-बेटीमन, मय तुमके लिखेंसे कि
तुमी बुआ के जानलासाहास।
14 ए आया-बुआमन, मय तुमके लिखेंसे कि
जोन मूर ले आसे हुनके तुमी जानलासाहास।
ए जुवानमन, मय तुमके लिखेंसे कि तुमी सकत बीता आहास
आउर महापरभु चो बचन तुमचो ने आसे आउर तुमी सयतान के जीतलासाहास।
संवसारी तीजमन के मया नी करा
15 तुमी, ए संवसार के नोहले संवसार चो काई तीजमन के मया नी करा। कोनी ए संवसार के मया करेसे जाले, हुन महापरभु के मया नी करे।
16 कसनबलले ए संवसार ने रतो - देहें चो लालचमन†, आंईक चो लालचमन आउर धन-माल चो गुमान - ए सपाय महापरभु बाटले नोआय, मानतर ए संवसार बाटले ची आय।
17 ए संवसार आउर संवसारिक लालचमन दुनो नास होयसे, मानतर महापरभु चो मन-इछा ले चलतो लोग जुग-जुग रदे।
किरिस्त चो बयरी
18 ए बेटा-बेटीमन, तुमी सुनलासाहास कि सरासरी समया ने किरिस्त-बयरी एउआय, आउर उसनेची एबे बले खुबे फंदी किरिस्तीमन होलासोत। एचई ले आमी जानुसे कि ए सरासरी समया आय।
19 हुनमन आमचेई मंजी चो लोग आत, मानतर आमचो संग चो नोआत। हुनमन आमचो संग चो होले, आमचो संगे रता। हुनमन आमचो ले अलगे होतोके आमी जानलु कि हुनमन आमचो संग चो नोआत।
20 मानतर तुमके हुन पवितर (किरिस्त) आपलो आत्मा ले अबिसेक* करलोसे। एईकाजे तुमी सपाय, सत के जानास।
21 मय एईकाजे लिखले कि तुमी सत के जानास, आउर तुमी जानास सत ने काई फंद गोट होउक नी सके।
22 फंदी कोन आय? फंदी हुनी आय जोन जीसु के किरिस्त नी मानेसे, आउर किरिस्त-बयरी हुनी आय, जोन बुआ के आउर बेटा के नी मानेसे।
23 जोन बेटा के नी मानेसे, हुनचो संगे बुआ नीआय, जोन बेटा के मानेसे, हुनचो संगे बुआ बले आसे।
24 जोन नंगत खबर के तुमी मूर ले सुनलासाहास, हुनी बचन ने तुमी चमकट राहा, तेबे तुमी बले बेटा आउर बुआ संगे चमकट राहासे।
25 आउर किरिस्त आमके जुग-जुग चो जीव देतो बायदा करलोसे।
26 ए गोट के तुमके भरमातो लोगमन ले बाचुन रतो काजे मय लिखलेसे,
27 मानतर तुमी तो किरिस्त बाटले पवितर आत्मा चो अबिसेक पावलासाहास आउर हुनचेई ने चमकट आसास। एईकाजे तुमके कोनी सिखाउक नी पड़े। कसनबलले पवितर आत्मा तुमके सपाय सिखायसे जोन सत आय, फंद नोआय। एईकाजे हुन जोन बले तुमके सिखायसे उसनेची किरिस्त ने चमकट राहा।