जूहन्ना
चो पईल चिटी
जीव देतो बचन
1
जीव देतो बचन, जोन संवसार चो मूर ले आसे हुनचो बारे ने आमी सांगुसे। हुन बचन के आमी खुदे सुनलु, आपलो आंईक ले दखलु बललोने धियान ले दखलु आउर आमचो हाथमन ले छिंवलु बले -
2 हुन जीव देतो बचन, देहें-चोला धरुन दखा दिली, हुनके आमी दखलु आउर हुनचो गवई देउंसे। एदांय आमचो दखलोर जुग-जुग चो जीव चो खबर आमी सुनाउंसे जोन बुआ संगे रये आउर आमके दखा दिली,
3 जोन बले आमी दखलु-सुनलु हुनी खबर तुमके बले सुनाउंसे कि तुमी बले आमचो संगे हुन जुग-जुग चो जीव चो संगी होआ, जसन आमी बुआ महापरभु आउर हुनचो बेटा जीसु किरिस्त संगे संगी आसुं।
4 आमी ए गोटमन एईकाजे लिखुंसे कि आमचो हरिक पुरा होओ।
उजर ने चलतोर
5 आमी हुनचो ले सुनलो खबर के तुमके सुनाउंसे कि महापरभु उजर आय आउर हुनचोने खिंडिक बले अंधार नीआय।
6 आमी हुनचो संगी आव बलुन बले अंधार चो बाट* ने चलुंसे जाले आमी फंदी आंव आउर आमी सत चो बाट* ने नी चलुंसे।
7 मानतर जसन हुन उजर ने आसे, उसनेची आमी बले उजर ने चलुंसे जाले, गोटोक-दुसर चो संगी आंव। हुनचो बेटा जीसु चो लोउ, आमके सपाय पाप ले सुद करेसे।
8 आमचो ने काई बले पाप नीआय बलुंसे जाले, आमी आपने के धोका देउंसे, आउर आमचो ने काई सत नीआय।
9 आमी आमचो करलो पापमन के महापरभु पुरे मानलु जाले हुन आमचो करलो पापमन के खेमा करुन सपाय ओधरम ले सुद करतो काजे पतेयातो लाईक आउर धरमी आय।
10 आमी पाप नी करलु बलुंसे जाले, महापरभु के फंदी बललो कटार चो आय, आउर आमीमन ने हुनचो बचन नीआय।