6
जितरो लोग जनम-जात कमेया आत, हुनमन आपलाहान मालिक के खुबे इजित-मान करोत। तेबे महापरभु चो नाव आउर आमचो सिखियामन के बदी नी होए।
2 जोनमन चो मालिक बिसवासी आत, हुनमन के हेला नी पतेयाहा, मानतर भाई मानुन हुनमन चो खुबे सेवा-बुता करा, कसनबलले एचोले बिसवासी आउर मया करतो लोग के नफा होयसे। ए गोट के तुय सिखाते आउर समजाते रा।
फंद सिखिया आउर धन चो लालच
3 कोनी दुसर बरन चो सिखिया देयसे आउर चोखा गोटमन बललोने आमचो परभु जीसु किरिस्त चो भक्ति गोटमन आउर सिखिया के नी माने जाले,
4 हुन मनुक गुमानी होलोसे, आउर हुन काईके नी जाने; हुनके उलटा गोटेयातोर आउर काट-छाट करतो बियाद धरलीसे, जेचोले ईरका, बईर, निंदरतो, बाकना गोटमन, अमदेया दुक-पुछ,
5 आउर हुनमन चो मंजिगता अमदेया झगड़ा होते रयसे, हुनमन चो बुद गुपलीसे आउर सत के छांडलासे आउर महापरभु चो भक्ति ले धन कमातो उआट बनालासे।
6 मानतर मन-मंडाउन महापरभु चो भक्ति करतोर बड़े कमानी आय।
7 कसनबलले आमी संवसार ने काई धरुन नी ईलुसे, आउर ए थान ले काई नेउक नी होए।
8 आमचो लगे खातो आउर पींदतो काजे आसे जाले, उतलीही ने आमके मन-मंडातोर आय।
9 मानतर जोनमन सवकार होउक मन करसोत, हुनमन जचई ने, फोकाहा आउर नोकसान गोटमन ने, लालच चो फांदा ने फसेसोत, जेचोले हुनमन सत्यानास चो दराहां ने बुड़सोत।
10 कसनबलले धन चो लालच सबु बरन चो अडरा बुतामन चो मूर आय। जेके पावतो काजे मसागत करते-करते खुबे लोगमन बिसवास के छांडुन बरन-बरन चो दुख-डंड ने पड़लासोत।
तीमुथियुस काजे पउलुस चो सला
11 मानतर तुय महापरभु चो लोग आस, तुय हुन सपाय गोट के छांड आउर धरम, भक्ति, बिसवास, मया, धीरजा आउर सोज ने चल।
12 बिसवास चो नंगत लड़ई लड़, जुग-जुग जीवना पावतो काजे चमकट रा, जेचो काजे तुके हागदिलोसे, एचो नंगत गवई तुय खुबे गवामन चो पुरे दिलीसीस।
13 सपाय के जीव देउ महापरभु आउर पुन्तियुस पिलातुस चो पुरे सबुले नंगत गवई दिलो किरिस्त जीसु चो पुरे, मय तुके ए हुकुम देयंसे,
14 कि तुय आमचो परभु जीसु किरिस्त एओतले ए हुकुम ने दोख नोहलोर आउर पवितर ले चलते रा,
15 जेके महापरभु नंगत समया ने दखायदे जोन सबुले धन-धन, एकलाय महाराजा, राजामन चो राजा आउर परभुमन चो परभु आय,
16 हुन एकलाय ची अमर आय आउर कोनी दखुक नी सकतो उजर ने रयसे, हुनके कोनी नी दखलासे आउर केबई दखुक बले नी सकदे। हुनचो मान आउर सकत जुग-जुग रओ। आमीन।
17 ए जुग चो सवकारमन के गुमान नी करतो काजे हुकुम देस कि हुनमन हुन धन चो आसा नी करोत, जोन आजी आसे आउर काली के नीआय। मानतर महापरभु उपरे आसा करोत जोन आमचो सुख काजे सपाय बानी खुबे ले देउआय।
18 हुनमन के भलई-बुता करतो हुकुम देस कि हुनमन भलई-बुता ने सवकार होओत, आउर जीव-दुखतोने आउर साका होतोने पुरे रओत।
19 असन करुन हुनमन पुन-फर अरजुन एतो दिनमन काजे गोटोक बरसक पाया बनाउन सत जीवना ने चमकट रदे।
20 ए तीमुथियुस, तुय अरजलो सिखिया चो रखेया कर। जोन गियान के गियान आय बलतोर चे धोका आय, हुन फोकाहा गोट आउर बईर गोटमन ले लापी रा।
21 कसनबलले खुबे लोग ए अडरा गियान के मानुन बिसवास के छांडला।
महापरभु चो दया तुचो उपरे होते रओ।